LECCION 59
Puede Tu Esta Fiel Maskin Tiene Persecucion
Todo maga Cristiano hay experiencia oposicion o persecucion pa gane. Debe ba kita man lingasa?
1. Porque kita ta expecta que tiene persecucion?
El Biblia ta habla: “Aquellos quien quiere vivi un vida religioso unido con Cristo Jesus, ay sufri gayot maga persecucion.” (2 Timoteo 3:12) Ya persigui con Jesus cay gendeh le parte del mundo de Satanas. Gendeh tambien kita parte del mundo poreso gendeh mas kita estraña si persigui kanaton el gobierno y el maga organizacion del religion.—Juan 15:18, 19.
2. Paquemodo kita prepara para na persecucion?
Necesita kita hace fuerte con el diaton confianza con Jehova ahora. Dale tiempo cada dia para reza y para le con el Biblia. Regular atende maga miting. Todo este hay dale contigo fuerza para puede aguanta con el persecucion maskin pa estaba este na de tuyu familia. Si apostol Pablo, quien manada beses ya experiencia persecucion, ya escribi: “[Si Jehova] amo el quien ta ayuda conmigo. Gendeh yo ay tene miedo.”—Maga Hebreo 13:6.
Mas tene tambien kita coraje si regular kita predica. Por causa con este, ta aprende kita confia con Jehova y ganá con el miedo na maga gente. (Proverbio 29:25) Si tiene tu coraje ahora para predica, hay queda tu preparao para continua predica maskin pone restriccion el gobierno con el diaton trabajo.—1 Tesalonica 2:2.
3. Cosa el beneficio si aguanta kita con el persecucion?
Gendeh kita alegre si ta persigui kanaton. Pero si puede kita aguanta, el diaton fe hay queda mas fuerte. Ta queda kita mas cerca con Jehova cay ta experiencia kita el de suyu ayuda na tiempo que dol nuay mas kita fuerza para continua. (Le con el Santiago 1:2-4.) Triste si Jehova si ta sufri kita pero alegre le si ta aguanta kita. El Biblia ta habla: “Si ta hace ustedes bueno y ta sale pa castigao y ta aguanta ese con paciencia, entonces Dios ta aproba [con ese].” (1 Pedro 2:20, El Nuevo Testamento) El premio que hay dale si Jehova con aquellos quien esta fiel amo el vida eterna na un mundo que nuay mas oposicion na verdadero adoranza.—Mateo 24:13.
APRENDE PA MAS
Aprende si porque posible esta fiel con Jehova maskin tiene persecucion y si paquemodo le hay premia kanaton.
4. Puede tu aguanta con el oposicion na familia
Sabe gayot si Jesus que el cuanto na diaton familia posible gendeh quierre que sirvi kita con Jehova. Le con el Mateo 10:34-36 y despues, discuti con este pregunta:
-
Cosa posible sucede si el un miembro del familia ya decidi que sirvi con Jehova?
Para mira un ejemplo de este, man play con el VIDEO y despues, discuti con el pregunta.
-
Cosa tu hace si el un pariente o amigo ta sangga contigo para sirvi con Jehova?
Le con el Salmo 27:10 y Marcos 10:29, 30. Despues le con el cada texto, discuti con este pregunta:
-
Paquemodo este promesa puede ayuda contigo si ta experiencia tu oposicion estaba na familia o na maga amigo?
5. Continua adora con Jehova maskin tiene persecucion
Necesita kita coraje para sirvi con Jehova si el otro ta pricura sangga kanaton. Man play con el VIDEO y despues, discuti con el pregunta.
-
Na cosa manera el maga ejemplo na este video ta dale contigo coraje?
Le con el Maga Actividad 5:27-29 y Maga Hebreo 10:24, 25. Despues le con el cada texto, discuti con este pregunta:
-
Porque bien importante que continua adora con Jehova maskin ya prohibi con el diaton trabajo predicacion o maga miting?
6. Si Jehova hay ayuda contigo para aguanta
El maga Testigo de Jehova na entero mundo, de edad man o joven, leal ta continua sirvi con Jehova maskin ta experiencia sila persecucion. Para mira si cosa ya ayuda kanila, man play con el VIDEO. Despues, discuti con este pregunta.
-
Na video, cosa ya ayuda con el maga Testigo de Jehova para aguanta?
Le con el Roma 8:35, 37-39 y Filipo 4:13, NWT. Despues le con el cada texto, discuti con este pregunta:
-
Na cosa manera este texto ta asigura contigo que puede tu aguanta con el maskin cosa probanza?
Le con el Mateo 5:10-12 y despues, discuti con este pregunta:
-
Porque tu puede queda alegre maskin ta experiencia persecucion?
Millones de maga siervo de Jehova el ya puede gayot aguanta con el oposicion. Puede tambien tu se hace!
EL CUANTO TA HABLA: “Gendeh yo puede aguanta con el persecucion.”
-
Cosa maga texto el puede dale kanila el confianza que necesita sila?
SUMARIO
Ta aprecia gayot si Jehova con el diaton maga esfuerzo para sirvi con ele maskin tiene persecucion. Na de suyu ayuda, puede gayot kita aguanta!
Repaso
-
Porque debe expecta el maga Cristiano que experiencia sila persecucion?
-
Cosa tu puede hace ahora para queda tu preparao si llega el persecucion?
-
Cosa puede ayuda contigo para tene confianza que puede tu sirvi con Jehova na maskin cosa probanza?
SABE PA MAS
Mira si cosa ya habla el un joven hermano acerca si paquemodo con ele ya ayuda si Jehova para aguanta cuando talla le na preso por causa na de suyu neutralidad.
Considera si cosa ya ayuda con el un man maridable para fiel sirvi con Jehova por manada año maskin tiene oposicion.
Aprende si paquemodo enfrenta con el persecucion con coraje.
“Prepara Ahora Para na Persecucion” (El Torre de Guardia, Julio 2019)
Cosa debe el diaton mirada na oposicion na familia y cosa kita puede hace para mentena con el paz y esta siempre fiel con Jehova?
“El Verdad Gendeh Ta ‘Lleva Paz, Sino Espada’” (The Watchtower, Octubre 2017)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
