LESEN 59
Ka Tongeni Likiitú Atun Kopwe Kúna Riáfféúmwáál
Epwe wor atun, Chón Kraist meinisin repwe kúna weires pwal mwo nge riáfféúmwáál. Sipwe lólilen ika a fis ena?
1. Pwata sia silei pwe sipwe kúna riáfféúmwáál?
Iei met Paipel a affata ngenikich: “Aramas meinisin mi mochen manaueni eu manauen souläng lon Kraist Jesus repwe tolong lon ninni.” (2 Timoty 3:12) Pokiten Jesus ese pop seni án Satan ei ótót, iwe a kúna riáfféúmwáál. Sise pwal pop seni ei ótót, ina popun sise máirú atun ekkewe mwúún fénúfan me mwicheichen lamalam ra eriáfféúúkich.—Johannes 15:18, 19.
2. Ifa usun sia tongeni mmólnetá ngeni riáfféúmwáál?
A lamot ach sipwe apéchékkúla ach lúkúlúk wóón Jiowa iei. Awora fansoun iteiten rán le iótek ngeni me álleani an we Kapas me fiffiti ekkewe mwich. Ekkena mettóch repwe apéchékkúlok le likiitú fán ese lifilifil sókkun riáfféúmwáál epwe toruk, pwal mwo nge riáfféúmwáál seni chón óm famili. Aramas ra soun eriáfféwú aposel Paulus, nge iei met a makkeei: “Ewe Samol i ai Soualilis, üsap fokun niuokus.”—Ipru 13:6.
Ach fiffiti ewe angangen afalafal iteitan, a pwal tongeni alapaaló ach pwora. Atun sia afalafal, sia káé ifa usun sipwe lúkúlúk wóón Jiowa me pworacho ngeni ach niwokkusiti aramas. (Än Salomon Fos 29:25) Ika ka ámááraatá óm pwora le afalafal ngeni aramas iei, iwe kopwe mmólnetá le akkafalafal inaamwo ika ewe mwú epwe pinei ach angang.—1 Tesalonika 2:2.
3. Ifa feiéchún ach likiitú fán riáfféúmwáál?
Ewer, kich sise sani ach sipwe kúna riáfféúmwáál, nge ika sia likiitú, iwe epwe péchékkúleló ach lúkú. Epwe péchékkúleló ach riri ngeni Jiowa pún sia kúna an álisikich atun sia meefi pwe ese chúen wor ach péchékkúl le likiitú. (Álleani James 1:2-4.) Jiowa a weires atun a kúna ach riáfféú, nge a pwapwa atun sia likiitú. Ewe Paipel a erá: “Are oua likitü fän ämi riaföü lupwen oua föri mine a pwüng, Kot epwe afeiöchükemi.” (1 Petrus 2:20) Ika sia tuppwél, Jiowa epwe fang ngenikich manaw esemuch lón ewe ótót séfé. Iwe, meinisin chókkewe mi nóm ikena, repwe angang ngeni i me esap wor ié epwe ú ngeniir.—Mateus 24:13.
KÚTTAFICHI
Ppii pwata a tufich ach sipwe akkamwéchú ach tuppwél ngeni Jiowa inaamwo ika aramas ra eriáfféúúkich, me ifa usun epwe efeiéchúkich.
4. Ka tongeni likiitú ngeni án chón óm famili eriáfféuk
Jesus a fókkun silei pwe epwe wor ekkóch chón ach famili resap sani ach sipwe angang ngeni Jiowa. Álleani Mateus 10:34-36, me mwirin pwóróusfengen wóón ei kapas eis:
-
Met a tongeni fis ika emén lón ewe famili a filatá le angang ngeni Jiowa?
Ren óm kopwe silei, fichi ei VIDEO, me mwirin pwóróusfengen wóón ei kapas eis.
-
Met kopwe féri ika emén aramasom are chienom a sótun pinei óm angang ngeni Jiowa?
Álleani Kölfel 27:10 me Markus 10:29, 30. Mwirin álleaan eú me eú ekkena wokisin, pwóróusfengen wóón ei kapas eis:
-
Ifa usun ei pwon epwe álisuk ika ka kúna riáfféúmwáál seni chón óm famili are chiechiom?
5. Sópweló le angang ngeni Jiowa inaamwo ika ka kúna riáfféúmwáál
A lamot ngenikich pwora lón ach angang ngeni Jiowa atun aramas ra sótun eppetikich. Fichi ei VIDEO, me mwirin pwóróusfengen wóón ei kapas eis.
-
Ifa usun pwóróusen chókkewe lón ei video a apéchékkúlok?
Álleani Föför 5:27-29 me Ipru 10:24, 25. Mwirin álleaan eú me eú ekkena wokisin, pwóróusfengen wóón ei kapas eis:
-
Pwata a fókkun lamot ach sipwe sópweló le feffel ngeni Jiowa inaamwo ika a aúkúk ach angangen afalafal are ach fiffiti mwich?
6. Jiowa epwe álisuk le likiitú
Wóón unusen fénúfan, Chón Pwáraatá Jiowa kúkkún me watte, ra tuppwél le angang ngeni Jiowa inaamwo ika ra kúna riáfféúmwáál. Ren óm kopwe kúna met a álisiir, fichi ei VIDEO. Mwirin pwóróusfengen wóón ei kapas eis.
-
Lón ewe video, met a álisi ekkewe Chón Pwáraatá le likiitú?
Álleani Rom 8:35, 37-39 me 1 Korint 10:13. Mwirin álleaan eú me eú ekkena wokisin, pwóróusfengen wóón ei kapas eis:
-
Ifa usun ei wokisin a alúkúlúkú ngonuk pwe ka tongeni likiitú fán ese lifilifil sóssót?
Álleani Mateus 5:10-12, me mwirin pwóróusfengen wóón ei kapas eis:
-
Pwata ka tongeni pwapwa inaamwo ika ka kúna riáfféúmwáál?
A wor fite million chón fel ngeni Jiowa ra sópwéch lón ar likiitú fán riáfféúmwáál. Ka pwal tongeni sópwéch!
EKKÓCH RA ERÁ: “Use tongeni likiitú fán riáfféúmwáál.”
-
Ikkefa ekkewe wokisin a tongeni alúkúlúkúúr?
MENLAPAN
Jiowa a aúcheani ach achocho le angang ngeni inaamwo ika a fis ngenikich riáfféúmwáál. Ren an álillis, sia tongeni sópwéch lón ach likiitú!
Enniwili
-
Pwata a lamot án Chón Kraist repwe silei pwe repwe kúna riáfféúmwáál?
-
Met ka tongeni féri iei pwe kopwe mmólnetá ngeni riáfféúmwáál?
-
Met a tongeni alúkúlúkú ngonuk pwe ka tongeni likiitú fán ese lifilifil sóssót?
PWAL EKKÓCH PWÓRÓUS
Katol ifa usun emén alúwél Chón Kraist a áweweei ifa usun Jiowa a álisi le likiitú atun a kalapus pokiten ese angolong lón mwékútúkútún ei fénúfan.
Ppii met a álisi eú pean pwúpwúlú le angang ngeni Jiowa fán tuppwél ren fite fite ier inaamwo ika ra kúkkúna riáfféúmwáál.
Ppii ifa usun ka tongeni pwora le likiitú fán riáfféúmwáál.
“Mmólnetá Iei fán Iten Riáfféúmwáál” (Ewe Leenien Mas, July 2019)
Met meefiach usun riáfféúmwáál seni chón ach famili, me ifa usun sia tongeni likiitú fán ekkewe weires mi pop seni?
“Ewe Enlet Ese Atoto Kinamwe Nge ‘Ketilas’” (Ewe Leenien Mas, October 2017)
