ˈWƆN ˗GƆ 59
Ü ꞊mɔɔn˗ ˗bha ˈü bɔ ˈˈklʋʋbhɔdhe ˈgü zuʋ̈saadhɛ ˈka
Kletiɛn ꞊dede ˗nu kwa dua ˗mü ˈkwa˗ ˈwɔn dɔ ꞊dhɛ ˗wo ꞊mɔɔn˗ ˗bha ˈwo ˗gban kwa ˗gɔ yi ˈbhaa ˈka ɛɛnˈˈ ˈwo kwa ˈˈklʋʋbhɔ. ˈˈKɛɛ ü dua ˗mü kö ˈˈsuʋ̈ ˗yö ü kë ˗ee?
1. ˈMën ˗kë ˈö ˈkwa˗ ˈwɔn dɔ ꞊dhɛ ˗wo ˗dho kwa ˈˈklʋʋbhɔ?
Biblö ˗ya ˗pö ˈˈpuu ˈka ꞊dhɛ: «Mɛ ˈˈpɛpɛ ˈwo˗ ˈˈpiʋ̈ ˈwo ˗kplü Yesu Klisi ˗bha kpɛnngkpɛnngdhö kö ˈwo [˗Zlan] dhɔɔbhaawɔn kë bha ˗wo ˗dho ˗a ˗nu ˗wëëdhɛ bho.» (2 Timote 3:12) ˗Wo Yesu ˈˈklʋʋbhɔ ˈyö ˈtɔ˗ ꞊dhɛ ˗a ˗kɔ ˈyaa kun Sɔtraan ˗bha ˈˈkpɔnŋtaadhɛ ˈö yö ˗a ˈgüwɔn ˗nu ˈgü. Kwa ˗de ˈpö kwa ˗kɔ ˈyaa ˈˈkpɔnŋtaawɔn ˗nu ˈgü. ˗Dhɛ ˈö ˈˈdhʋ̈, ˈˈsɛgɔdhiʋ̈mɛn ˗nu ɛɛnˈˈ ꞊sua ˗zlanwo ˗bha ˗kɔlokota ˈgümɛn ˗nu ꞊wa kwa ˈˈklʋʋbhɔ, ˗a ˈwɔn ˈyaa kwa ˈkun.—Zan 15:18, 19.
2. Kwa ˗dho ˈˈklʋʋbhɔdhe ˈto ˈˈdhiʋ̈ ˈö ˈkwa kwa ˗de ꞊baa ˗a ˗bha ˗kɔ ˗kë ꞊dhɛ?
Kwa dua ˗mü kö ˈkwa kwa ˗bha ˗zo ˗yö Zoova ˗dhɛ ˗sü ˗gɛn ˗gban ꞊dɛɛ. ˗Dhɛkpaɔyi ˈˈpɛpɛ ˈka, ˗kwa ˈˈtʋ̈ŋ ˈsü kö ˈkwa bhɛɛˈˈ, kö ˈkwa Biblö ˗wo pö. ˗Kwa ˈdho ˗bhɔkwëë ˗nu ˗ta ˗kplawo. Kö ˈkwa˗ kë ˈˈdhʋ̈, ꞊faan ˗dho kë kwa ˗gɔ, ˈö ˈkwa bɔ ˈˈklʋʋbhɔdhe suu ˈˈoo ˗su ˈö˗ ˈbhaa ˗nu dho ˈgo ˗ʒiaanwo kwa ˗bha ˈkɔdhi ˈgü bhë ˗an ˈgü. Bɔmɛn Pɔdhö ˈö bɔ ˈˈklʋʋbhɔdhe ꞊va ˈgü bhë, ˗yö ˈsëëdhɛ ˗bɛnzë ˈö˗ pö: «N Dëmɛ [Zoova] bha ꞊në ˗nu n ˗dhɛ ˗mɛ ˈka, ˗a ˗kë ˈˈdhʋ̈ ˗sü bha˗ ˈgü, ˈˈsuʋ̈ ˈyii ˈdho n kë.»—Eblö 13:6.
Kö ˈkwa ˗zlanwopö ˗kplawo, kwa ˗zo ˗dho ˗gban ˈzü ꞊dedewo. ˗Zlanwopösü ˗yö kwa ˗takun ˈö ˈkwa kwa ˗zo yö Zoova ˗dhɛ, ˈö ˗suʋ̈ mɛnbhɩɩdhe ˗gɔ ˗sü ˗yö go kwa zuʋ̈ˈˈ ˗ta. (Proverbes 29:25) Kö ˈkwa˗ kë ˈˈdhʋ̈ ꞊dɛɛ, yi ˈö ˈˈsɛgɔdhiʋ̈mɛn ˗nu dho kwa ꞊kiɛɛ ˈˈkan ˗zlanwopösü ˗bha ˗a ˈka bhë, ꞊faan ˗dho kë kwa ˗gɔ ˈö ˈkwa ˗zlanwopö ˗kplawo.—1 Tesadhonikö 2:2.
3. Kö ˈkwa bɔ ˈˈklʋʋbhɔdhe ˈgü zuʋ̈saadhɛ ˈka, ˈwɔn ˗së ˗mɛɛn ˈö ˈkwa˗ ꞊slɔɔ ˗a ˈgü?
ˈKwaa˗ ˈˈpiʋ̈ kö ˈˈklʋʋbhɔdhe ˗yö nu kwa ˗ta, ˈˈkɛɛ kö ˈkwa bɔ ˗a ˈgü zuʋ̈saadhɛ ˈka, kwa ˗bha ˗zoyödhe ˗gɛn ˗dho ˗gban. ˈKwa˗ yö ˈpö ꞊dhɛ Zoova ˗yö kwa ˗takun kö ˈkwa bɔ ˗an ˈgü, kwa ˗bha ˈˈtɔŋdëdhɛ ˗yö ˗kë ˈˈgbɩɩ˗. (Zakö 1:2-4 ˗an ˗wo pö.) Kö ˈkwa kë ˈwɔn ˈˈgbɩɩ˗ ˈgü ˗yö ˗mën Zoova ˈka, ˈˈkɛɛ kö ˈkwa bɔ ˗a ˈgü zuʋ̈saadhɛ ˈka, ˗yö ˗kë ˗a ˗dhɛ ˗së. Biblö ˗ya ˗pö: «ˈKa ˈwun ˗së kë ˈö ꞊wa ˈgo mü, ꞊wa ka ˈklo bhɔ, kö ka ˗bha ˈwun ˗së ꞊nɛ bhë ˗Zlan wö ˈdhiö.» (1 Piɛdhö 2:20, NTBL) Kö ˈkwa ˈto ˗klu ˗sü ˈka Zoova ˗bha, ˗yö ˗dho ˈdhuëë˗ ˈkpɔ kwa ˗bha ˈö ˗tosɛta ˈö ˈyaa ɲën bhë, ˈö˗ nu kwa ˗dhɛ ˈˈkpɔnŋtaadhɛ ˗dɛɛ ˈgü. ˈˈKpɔnŋtaadhɛ ˗dɛɛ ˈö bhë ˗a ˈgü, kwa ˗dho Zoova ˗dhɔkë kwa ˈflëëgü, ˈö ˗gban kwa ˗gɔ ˗mɛn yö ˈti ˗dho kë ˗dhö.—Matiö 24:13.
˗KAA ˈˈPIƲ̈ ˈPƆN
ˈPë ˗dho kwa ˗takun kö ˈkwa ˈto ˗klu ˗sü ˈka Zoova ˗bha ˈwɔn ˈˈgbɩɩ˗ ˗nu ˈgü waa ˗kɔ ˈö ˗dho ˈdhuëë˗ ˈkpɔ ˗a ˈka kwa ˗bha, ˗kwaa ˗ga.
4. Ü ˗bha ˈkɔdhi ˈgümɛn ˗nu ˗wa ˗gban ü ˗gɔ, ü ꞊mɔɔn˗ ˗bha ˈü to ˗a ˈˈgbɩɩ˗ ˈka.
Yesu ˗yö kwa ˗zokpɔɔ ꞊dhɛ ˈkwa˗ pö ˈkwa Zoova ˗dhɔkë, ˗yö ꞊mɔɔn˗ ˗bha ˈö kë kwa ˗bha ˈkɔdhi ˈgümɛn ˗nu ˗dhɛ ˈya˗. ˗Ka Matiö 10:34-36 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
Mɛn ˈbha ꞊ya˗ pö ˈö Zoova ˗dhɔkë, ˗yö ꞊mɔɔn˗ ˗bha ˈö ˗kë ˗a ˗bha ˈkɔdhi ˈgümɛn ˗nu ˈgü ˗kɔ ˗kë ꞊dhɛ?
˗Kaa ˈwɔnzuan do do VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
-
Kö ü ˗bha ˈkɔdhi ˈgümɛn ɛɛnˈˈ ü ˈˈtɔŋdë do ˗ya ˈˈslö mɛɛnˈˈ kö ˈö ü ˈˈkan Zoova ˗dhɔkësü ˗bha, ü ˗dho ˗a kë ꞊dhɛ?
˗Ka Psaume 27:10 waa Makö 10:29, 30, NTBL ˗an ˗wo pö. ˈKa ka bo ˗a Biblö ˈˈɲan ˈdhɛ ˈö ˈdhö ˗a ˗wo pö ˗sü ˈka kö ˈka dhɛɛˈˈ ˈö yö ˗a ˗yɔ mɛɛnˈˈ:
-
˗Wo ˈö bhë, ˗yö ˗dho ü ˗takun ˗kɔ ˗kë ꞊dhɛ kö ü ˗bha ˈkɔdhi ˈgümɛn ɛɛnˈˈ ü ˈˈtɔŋdë ˈˈgbɩɩ˗ do ˗ya ˗gban ü ˗bha Zoova ˗dhɔkësü ˗gɔ, kö ü ˈgü ˈya ˗dho ga?
5. ˈKö ˗kë ꞊dhɛ ˗wo ü ˈˈklʋʋbhɔ, ˗bhö Zoova ˗dhɔkë ˗kplawo.
Kwa ˗bhawɔn ˗yö ˈgüdɔgbɩɩsü ˗bha kö ˗wa ˗gban kwa ˗gɔ, kö ˈkwa ˗dho ˈˈkan Zoova ˗bha. ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
-
˗Mën ˗nu ˈwo ü ꞊faanmën video ˈö bhë ˗a ˈgü?
˗Ka Këwɔn ˗nu 5:27-29 waa Eblö 10:24, 25 ˗an ˗wo pö. ˈKa ka bo ˗a Biblö ˈˈɲan ˈdhɛ ˈö ˈdhö ˗a ˗wo pö ˗sü ˈka kö ˈka dhɛɛˈˈ ˈö yö ˗a ˗yɔ mɛɛnˈˈ:
-
ˈKö ˗kë ꞊dhɛ ˗wo kwa ꞊kiɛɛ ˗kan ˗zlanwopösü waa ˗dho ˗bhɔkwëë ˗nu ˗ta ˗sü ˗bha, ˈmën ˗kë ˈö kwa dua ˈdhö ˗mü kö ˈkwa Zoova ˗dhɔkë ˗kplawo?
6. Zoova ˗dho ü ˗takun kö ˈü bɔ ˈˈklʋʋbhɔdhe ˈgü zuʋ̈saadhɛ ˈka.
Zoova ˗bha ꞊Gbɛkiö ˗nu ˈö ˈwo zii ɛɛnˈˈ ˈwo wlüünën ˗nu ˈka ˈö ˈwo ˈˈkpɔnŋtaadhɛ ˗todhʋ̈sü ˈgü, ˗wo ˗to ˗klu ˗sü ˈka Zoova ˗bha ˈˈklʋʋbhɔdhe ˗nu ˈgü. ˗Kaa VIDEO ˗ga, kö pë ˗nu ˈö ˗an ˗takun kö ˈka˗ dɔ. ˈKa ka bo kö dhɛɛˈˈ ˈö ˈˈshia bhë, ˈka˗ ˗yɔ mɛɛnˈˈ:
-
Video ˈö bhë ˗a ˈgü, ˈmën Zoova ˗bha ꞊Gbɛkiö ˗nu ˗takun ˈö ˈwo bɔ ˈwɔn ˈˈgbɩɩ˗ ˗nu ˈgü zuʋ̈saadhɛ ˈka?
-Ka Wlɔmö 8:35, 37-39 waa Fidhipö 4:13 ˗an ˗wo pö. ˈKa ka bo ˗a Biblö ˈˈɲan ˈdhɛ ˈö ˈdhö ˗a ˗wo pö ˗sü ˈka kö ˈka dhɛɛˈˈ ˈö yö ˗a ˗yɔ mɛɛnˈˈ:
-
Biblö ˈˈɲan ˈö bhë, ˗ya ˗zɔn ü ˗dhɛ ˗kɔ ˗kë ꞊dhɛ ꞊dhɛ ü ꞊mɔɔn˗ ˗bha ˈü bɔ ˈwɔn ˈˈgbɩɩ˗ suu ˈˈoo ˗su ˈgü zuʋ̈saadhɛ ˈka?
˗Ka Matiö 5:10-12 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
-
ˈMën ˗kë ˈö ꞊wa kwa ˈˈklʋʋbhɔ ˈö kwa dua ˈdhö ˗mü kö kwa zuʋ̈ˈˈ ꞊nii ˗yö ˗da?
Zoova ˗dhɔkëmɛn ˈˈmliɲɔn ꞊va ꞊dede ˗wo ˗to ˗klu ˗sü ˈka ˗a ˗bha ˈˈklʋʋbhɔdhe ˗nu ˈgü. Bhi ˗de ˈpö ü ꞊mɔɔn˗ ˗bha!
MƐN ˈBHAA ˗NU ˗WA ˗PÖ: «N ˗kɔ ˈyaa ˗mɔn ˈˈklʋʋbhɔdhe bun ˗sü ˗bha.»
-
Mɛn ˈö˗ pö ˈˈdhʋ̈, Biblö ˈˈɲan ˗mɛɛn ˈö ꞊mɔɔn˗ ˗bha ˗ya ˗zogban?
˗A ˈDHƐ TO KWA ˈˈƝAAN
Kwa kwa ˈgü dɔ ˗ni ˈgü ˈˈgbɩɩ˗ kö ˈkwa ˈto ˗klu ˗sü ˈka Zoova ˗bha, ˗yö ˗kë ˗a ˗dhɛ ˗së. ˗A ˗bha ˗takundhe ˈsaa˗ ˈgü, kwa ꞊mɔɔn˗ ˗bha ˈkwa bɔ ˈˈklʋʋbhɔdhe ˗nu ˈgü zuʋ̈saadhɛ ˈka!
˗Zobuödhe
-
ˈMën ˗kë ˈö kletiɛn ˗nu ˗wa ˈwɔn ˗dɔ ꞊dhɛ ˗wo ˗dho wo ˈˈklʋʋbhɔ?
-
ˈMën ˈü ꞊mɔɔn˗ ˗bha ˈü˗ kë ꞊dɛɛ kö ˈü ü ˗de baaˈˈ ˈˈklʋʋbhɔdhe bun ˗sü ˗bha?
-
ˈMën ˗dho ü ˗takun kö ˈü˗ ˈwɔn dɔ ꞊dhɛ ü ꞊mɔɔn˗ ˗bha ˈü ˈto ˗klu ˗sü ˈka Zoova ˗bha ˈˈklʋʋbhɔdhe suu ˈˈoo ˗su ˈgü?
˗AN ˗GA ˈPÖ
Kwa ꞊dhegblü wlüünën do ˈö yö ˈti ˈˈwɩ ˗a ˗bha kö ˈö ö ˗kɔ ˗da ˈˈsɛkɔɔwɔn ˈgü ˈö ˈwo˗ ˗da ˗kasho ˈgü, Zoova ˗ya ˗takun. ˗Kɔ ˈö˗ ꞊blɛɛ ˗a ˈka, ˗a ˗ga.
ˈKö -kë ꞊dhɛ -wo kwa -wëëkëwo, -kwa kwa zuʋ̈ˈˈ kë -saa (2:34)
Kwa ꞊dhegblü do waa ö ˗bha dhebɔ ˈö ˈwo ˗gban ˗an gɔ ˗kwɛ ꞊va ˈˈpiʋ̈, ˈpë ˗an ˗takun ˈö ˈwo to ˗klu ˗sü ˈka Zoova ˗bha, ˗a ˗ga.
˗Wo ˗to ˗klu ˗sü ˈka Zoova ˗bha ˈˈtʋ̈ŋ ˈö ˈwɔn ˗nu ˗wo go ˈˈgblʋʋ ˗a ˈka ˗a ˈgü (7:11)
˗Kɔ ˈö ˈkwa ˗dho ˗a ˗zɔn ˗a ˈka ꞊dhɛ kwa ˈgü ˗yö ˈˈgbɩɩ˗ ˈˈklʋʋbhɔdhe ˈgü, ˗a ˗ga.
«˗Kwa kwa ˗de baaˈˈ ˈˈklʋʋbhɔdhe nu ˗sü ˗gɔ» (˗Kwɛ 2019 Ʒue ˗bha ˈˈGlaadhiʋ̈ ˗tɔn)
Kwa ˗bha ˈkɔdhi ˈgümɛn ˗ya ˗gban kwa ˗gɔ, ˗kɔ ˈö ˈkwa ˗dho ˗a ˈsü ˗a ˈka waa ˈpë kwa dua ˈdhö ˗mü kö ˈkwa˗ kë, ˗a ˗ga?
