Tro kö a traqa kowe la itre keresiano la icilekeu me iaxösisi. Hapeu, tro kö sa xou?

1. Pine nemene matre kola axösisi së?

Öni Tusi Hmitrötr: “Ame la itre ka ajane troa mele thenge la aja i Akötresie, me casi me Keriso Iesu, tro fe a hane axösisi angatr.” (2 Timoteo 3:12) Hna axösisi Iesu ke, tha ka sine kö nyidrë la fene i Satana. Ceitu hi lai me easë, tha ka sine kö së la fen. Celë hi kepin matre, tha tro kö sa sesëkötr la kola axösisi së hnene la itre mus, me itre organizasio ne la hmi ka thoi.​—Ioane 15:18, 19.

2. Tune kaa la aqane tro sa hnëkë kowe la iaxösisi?

Loi e tro sa acatrene la mejiune së koi Iehova enehila. Loi e tro mina fe sa xomi ijine troa thith, me e la Tusi Hmitrötr e nöjei drai me sine lapane la itre icasikeu. Tro la itre hna majemine cili a xatua së troa cile catre ngöne la iaxösisi, ngacama traqa ju hë qaathene la fami së. Öni Paulo, ketre keresiano hna axösisin ka hape: “Iehova la ixatuang, tha tro kö ni a xou.”​—Heberu 13:6.

Tro fe a hetre trengecatre së, e ka majemine së cainöj. Matre jëne la hne së hna cainöje lapa, tro hë sa mejiune catr koi Iehova, me atreine elë hune la xoue atr. (Ite Edomë 29:25) Nge, e traqa ju wathebon la itre huliwa së hnei mus, tha tro hë sa xou, ngo tro pe sa catre cainöj.​—1 Thesalonika 2:2.

3. Nemene la itre eloine e tro sa xomihnine la iaxösisi?

Tha aja së kö troa axösisi së. Ame pe, e tro sa xomihnine la iaxösisi, tro hë lai a acatrene la lapaune së. Ketre, ame la easa öhne la Iehova a xatua së ngöne la easa kucakuca hnine la iaxösisi, kolo hi lai a easenyi së catre koi Nyidrë. (E jë la Iakobo 1:2-4.) Hace catre koi Iehova la easa akötr. Ame pe, Nyidrëti a madrine troa öhnyi së a xomihnine la iaxösisi. Öni Tusi Hmitrötr: “Maine nyipunie a xomi akötr pine kuca la loi, ewekë ka lolo lai koi Akötresie.” (1 Peteru 2:20) Tro kö Iehova a amanathithine la itre ka xomihnine la iaxösisi. Nge tro fe Nydrëti a hamë angatr la mele ka pë pun ngöne la fene laka, pëhë ka icilekeu memine la hmi ka wië.​—Mataio 24:13.

 TROA CE ITHANATAN

4. Ijije hi tro epuni a xomihnine la kola icilekeu hnene la fami epun

Öni Iesu lo ka hape, maine tro sa iëne troa nyihlue i Iehova, tro ha icilekeu la itre atrene la fami së. E jë la Mataio 10:34-36, nge ce ithanatane jë cahu hnying:

• E traqa ju iëne hnene la ketre atr troa nyihlue i Iehova, tune kaa jë la aqane troa ujë hnene la fami angeic?

5. Catre jë nyihlue i Iehova ngacama kola axösisi epun

6. Tro kö Iehova a xatua epun troa xomihni

 HANE HI LA HNE SË HNA CE WANG

Iehova a wangatrune la aqane mele nyipici së koi Nyidrë. Jëne la ixatua i Nyidrë, ijije hi tro sa xomihnine la iaxösisi!

Nyine Amekunën

• Hnauëne laka, tha tro kö la itre keresiano a sesëkötr e traqa ju axösisi angatr?

• Nemene la aqane tro epuni a hnëkë göne la itre iaxösisi?

• Pine nemene matre xecie hnyawa koi epun ka hape, tro epuni a mele nyipici koi Iehova ngöne la itre itupath?