SHIRONGWA 59
Kuvhura u kudidimikire mahepeko
Vakriste navantje ngava kugwanekera namarwanito ndi mahepeko weno ndi kumeho. Hepero vi tu tjilite ovyo ndi?
1. Morwanke tu taterera ashi ngava tu hepeka?
Bibeli yaghamba nawa-nawa ashi: “Navantje ovo va tokoro kukarera Karunga nakukara muumwe naJesus Kristus, navo ngava va hepeka.” (2 Timotheus 3:12) Jesus va mu hepekire mbyovyoshi kapi a hamenine kuudjuni waSatana. Natweshi kapi twa hamena kuudjuni uno, mpo ngoli, kapi vi tu tetukita ntjeneshi gha tu hepeke mapangero ndi mbunga damaukareli karunga.—Johannes 15:18, 19.
2. Weni tu kuwapaikira mahepeko?
Tuna hepa kunkondopeka lihuguvaro lyetu mwaJehova weno. Tura po ruvede kehe liyuva lyakuraperera kwendi nakuvarura nkango dendi. Yenda kumapongo kehe pano. Ntjene au vi rughana vino, nga vi kupa nkondo una hepa u pite mumahepeko, nakushimapara mpiri mahepeko ghatunde kuvakaliro. Mupostoli Paulus ogho kava hepekanga kehe pano kwa tjangire ashi: “Jehova ndje mukwafi wande, kapi ngani tjira.”—Heberi 13:6.
Ntjene atu yuvhita kehe pano ngavi tu vatera tu shimapare. Kuyuvhita kutushonga kuhuguvara mwaJehova nakutuvatera tu funde po kutjira vantu. (Vishegho 29:25) Ntjene au kara wakushimapara pakuyuvhita weno, ngavi ku vatera u kare una kuwapaikire kuyuvhita mpiri lipangero lishweneke virughana vyetu.—1 Tesalonika 2:2.
3. Weni tu wanena mo uwa pakukudidimikira mahepeko?
Atwe kapi twa haferanga mahepeko ngoli opo vya tu tompokanga kukudidimikira mahepeko, lipuro lyetu kuyakara lyankondo. Atwe kuyashweghenena Jehova pepi unene opo twa monanga omo ana kutuvatera ntjene kuna kukuyuvha ashi kapi tuna kara nankondo dakutwikira kukudidimikira. (Varura Jakobus 1:2-4.) Vyavyo kukolita Jehova opo a tu monanga kuna kuhepa ngoli kumuhafita opo a tu monanga kuna kukudidimikira. Bibeli kughamba ashi: “Karunga kuvihafera opo wa kudidimikiranga maudito morwa kurughana uwa.” (1 Petrus 2:20) Mfuto oyo Jehova nga pa navantje va kudidimikango naulimburukwi kuna kara liparu lyanaruntje muudjuni wa hana marwanito.—Matheus 24:13.
TEDA KO
Kushonge ashi morwanke vina karere ashi kuvhura vikutompoke kukwaterera kwaJehova naulimburukwi mpiri mumahepeko ntani omo Jehova nga kutungika.
4. Kuvhura vikutompoke kukudidimikira marwanito ghakutunda kuvakaliro
Jesus a yivire ashi vakaliro kuvhura ngava pire kukwatitako litokoro lyetu lyakukarera Jehova. Varura Matheus 10:34-36, makura timwitirenu lipuro lino:
-
Vinke vi vhuro kushoroka ntjene ashi umwe wamulikoro a tokora kukarera Jehova?
Mukumona shihonenito, kengera VIDIYO, makura timwitirenu lipuro lino.
-
Vinke u rughana ntjeneshi umwe walikoro ndi muholi woye a shetekere ko kukushaghekita kukarera Jehova?
Varura Pisalme 27:10 ntani Markus 10:29, 30. Pakumana kuvarura kehe litjangwa, timwitirenu lipuro lino:
-
Weni litwenyidiro lino li kuvatera ntjeneshi kuna kukurwanita vakaliro ndi vaholi voye?
5. Twikira kukarera Jehova mpiri mumahepeko
Ngavi kara hepero tu kare tuna shimapara pakukarera Jehova ntjene vapeke kuna kutushweneka. Kengera VIDIYO, makura timwitirenu lipuro lino.
-
Vinke vina kupo nkondo muvihonena vyamuvidiyo?
Varura Virughana 5:27-29 ntani Heberi 10:24, 25. Pakumana kuvarura kehe litjangwa, timwitirenu lipuro lino:
-
Morwanke vina karere mulyo kutwikira kukarera Jehova mpiri lipangero li shaghekite po virughana vyetu vyakuyuvhita ndi mapongo ghetu?
6. Jehova nga kuvatera u kudidimike
Mbangi daJehova vamwaka nantundiliro dakukushuva-shuva kwa twikira kukarera Jehova naulimburukwi mpiri mumahepeko. Mukuyiva ovyo vya va vateliro, kengera VIDIYO. Makura timwitirenu lipuro lino.
-
Muvidiyo, vinke vya vateliro vaMbangi vano vakudidimikire?
Varura Roma 8:35, 37-39 ntani Filipi 4:13. Pakumana kuvarura kehe litjangwa, timwitirenu lipuro lino:
-
Weni litjangwa lino lina kukupa lihuguvaro ashi kuvhura u kudidimikire kehe uno udito?
Varura Matheus 5:10-12, makura timwitirenu lipuro lino:
-
Morwanke u karera naruhafo mpiri mumahepeko?
Mamiliyona ghavakareli vaJehova vyavatompoka kukudidimikira mahepeko. Noveshi kuvhura vikutompoke!
VAMWE KUGHAMBA ASHI: “Kapi ngani vi vhura kukudidimikira mahepeko.”
-
Matjangwa munke u vhura kuvanegheda gha vhuro kuvapa lihuguvaro vana hepa?
LIKAMO
Jehova kuvimona ashi mulyo opo twa kondjanga tu mu karere mpiri mumahepeko. Nalivatero lyendi kuvhura ngavi tu tompoke kukudidimikira!
Livyukuruko
-
Morwanke Vakriste va vi taterera ashi ngava va hepeka?
-
Nke u vhura kurughana weno u kare una kuwapaikire opo ngagha ya mahepeko?
-
Vinke vi kuvatero u kuyuvhe mukumo ashi kuvhura vikutompoke kukarera Jehova mpiri mwa kehe udito?
YIVAKO VYAVINGI
Kengera omo monanyokweturume wamudinkantu a faturura omo Jehova a mu vatelire opo va mu tulire mudorongo mukonda yakupira kuhama kehe kuno muupolitika.
Kona-kona ovyo vya vateliro vantu namukadendi va karere Jehova naulimburukwi mwaka dadingi mpiri mumarwanito.
Omo twa rughanenine Jehova mumaukaro ghakukutjindja-tjindja (7:11)
Kushonge omo u pita mumahepeko oku una shimapara.
Weni tu mona mahepeko ghakutunda kuvakaliro ntani weni vi tu tompoka tu kare nampora navo nakukarera Jehova naulimburukwi?
“Usili kapi wa, ‘reta mpora nye kwa reta rufuro’” (Ruhungu, Sikukutu 2017)
