JOKWA 59

We ná o lembe̱ mitakisan

OKA

Pomane̱ to̱ jindea, kriste̱n ye̱se̱ i me̱nde̱ be̱ne̱ bato ba mate̱nge̱ne̱ babo̱, to̱ mitakisan mo̱me̱ne̱. Mo̱ nika ńangame̱n bwese̱ biso̱ bo̱ngo̱ e?

1. Ońola nje mitakisan mi s’angame̱nno̱ ńakisane̱ biso̱ e?

Bibe̱l e makwala ná bwē ná: “Be̱se̱ bena ba mapule̱ dangwane̱ longe̱ la dube̱ la Loba o Kristo Yesu ba me̱nde̱ kusa mitakisan.” (2 Timoteo 3:12) Yesu a takisabe̱ ebanja a si ta a no̱ngo̱ dongo na was’a Satan. To̱ biso̱ pe̱ di si mano̱ngo̱ dongo na wase; di s’angame̱n so̱ ńaka ponda di matakisabe̱no̱ na manea ma wase name̱ne̱ pe̱ na bebasi.—Yohane 15:18, 19.

2. Ne̱ni jeno̱ ná di boṅsane̱ o lembe̱ mitakisan e?

Tatan nde jangame̱nno̱ jouse̱ lakisane̱ di be̱nedino̱ Yehova. No̱ngo̱ ponda o kane̱ mo̱ na o langa Eyal’ao buńa te̱. Ukea o ndongame̱n ponda ye̱se̱. Ma mambo me̱se̱ ma me̱nde̱ bola wa ngińa ni mapule̱ ná o lembe̱ mitakisan na ngiń’a mulema, to̱ e be̱ nde ná mi mawa nde na mbia mo̱ngo̱. Ńamuloloma Paulo ńena nu takisabe̱ jita, a tili ná: “Sango [Yehova] nde e jongwane̱ lam, na si mabwa bo̱ngo̱.”—Bonahebe̱r 13:6.

Di mate̱ te̱ dikalo ponda ye̱se̱, nik’e mongwane̱ biso̱ o bata be̱ne̱ ngiń’a mulema. Di mokwa pe̱ o lakisane̱ Yehova na o buka bwa la bato bo̱ngo̱. (Minia 29:25) O be̱n te̱ ngiń’a mulema o te̱ dikalo tatan, o me̱nde̱ benga bola nika yete̱na manea ma we̱le̱ ebol’asu owas’a mwekan.—1 Tesalonika 2:2.

3. Nje di matombwane̱no̱ ke̱ di lembe̱ mitakisan e?

Di si mabwa muńe̱nge̱ ke̱ di matakisabe̱, nde di we̱li te̱ lembe̱ mitakisan, dube̱ lasu di mabata be̱ ngińa. Di mabata sisea be̱be̱ na Yehova, ebanja di me̱ne̱ jongwane̱ lao ponda di si be̱nno̱ pe̱ ngudi. (Langa Yakobo 1:2-4.) Yehova a mabwa ndutu ke̱ a me̱ne̱ biso̱ di mataka, nde e muńe̱nge̱ o je̱ne̱ ná di malembe̱. Bibe̱l e makwala ná: “Lo mawe̱lisane̱ te̱ ndutu lo makusano̱ ońola bwam lo mabolano̱, ke̱ nika ńe bonam oboso ba Loba.” (1 Petro 2:20) Je te̱ jemea nate̱n’o su, Yehova a me̱nde̱ bola biso̱ longe̱ la bwindea ka bowe̱n, o wase ńena to̱ moto a si me̱nde̱no̱ pe̱ te̱nge̱ne̱ jowe̱ la mbale̱.—Mateo 24:13.

ALA O NJIBA

Bata jokwa ońola nje jeno̱ ná di we̱le̱ be̱ Yehova jemea owas’a mitakisan, na tombwane̱ nik’e mawaneano̱ biso̱.

4. We ná o be̱ jemea ke̱ mbia mo̱ngo̱ mu mate̱nge̱ne̱ wa

Yesu a ta a bia ná mbia masu mwe ná mu si sue̱le̱ bedomsedi basu ba bolea Yehova. Langa Mateo 10:34-36, nde lo kwaleye pe̱ ońola min myuedi:

Moto a no̱ngi te̱ bedomsedi ba bolea Yehova, nje mbia mao mweno̱ ná mu bola e?

Ná we̱ne̱ eyembilan ewo̱, ombwa SINIMA, nde lo kwaleye pe̱ ońola myuedi mi mabupe̱.

SINIMA: Yehova a kasi biso̱ (5:13)

Nje o me̱nde̱no̱ bola yete̱na elong’a mbia to̱ diko̱m lo̱ngo̱ ba keki jeka wa ná o si bolea pe̱ Yehova e?

Langa Myenge 27:10 na Marko 10:29, 30. Ombusa bolanga b’epas’a Bibe̱l te̱, kwalea ońola min myuedi:

Ne̱ni din kakane̱ leno̱ ná longwane̱ wa yete̱na mbia to̱ mako̱m ba mate̱nge̱ne̱ wa e?

5. Benga jowe̱ Yehova owas’a mitakisan

E mapula ngiń’a mulema ná di boleye Yehova ke̱ bane̱ ba makeka o jeka biso̱ ná di si bola nika. Ombwa SINIMA, nde lo kwaleye pe̱ ońola myuedi mi mabupe̱.

SINIMA: Ba lee̱le̱ ngiń’a mulema owas’a mitakisan (6:27)

O byembilan be o nin sinima, nje e membe̱ wa e?

Langa Bebolo 5:27-29 na Bonahebe̱r 10:24, 25. Ombusa bolanga b’epas’a Bibe̱l te̱, baise̱ min myuedi:

Ońola nje yeno̱ mweńa ná di benge jowe̱ Yehova to̱ e be̱ nde ná manea ma we̱le̱ mbenda ná di si te̱ pe̱ dikalo, to̱ ná di si ko̱to̱me̱ pe̱ e?

6. Yehova a me̱nde̱ jongwane̱ wa o lembe̱

Mboṅ a Yehova o wase ńe̱se̱, badun na beso̱mbe̱, i bengi bolea Yehova na jemea to̱ owas’a mitakisan. Ná we̱ne̱ nje yongwane̱ babo̱, ombwa SINIMA. Ombusa nika kwalea ońola myuedi mi mabupe̱.