ADZESUA 59
Ibotum Egyina Ɔsoɛrtsia Ano
Yɛyɛ Christianfo yi ara dze, sɛ yɛkɔ sor ba famu mpo a, nkorɔfo bɔsoɛr etsia hɛn anaa wɔbɛtan hɛn. Aso ɔsɛ dɛ iyi bɔ hɛn hu?
1. Ebɛnadze ntsi na yɛhwɛ kwan dɛ nkorɔfo bɛtan hɛn?
Bible no ma yenya hɛnho ntseasee dɛ: “Hɔn a wɔpɛ dɛ wɔdze nyamesompa tsena ase wɔ Christ Jesus mu nyina bɔsɔw ahohia.” (2 Timothy 3:12) Osiandɛ Jesus ammfa noho ammbɔ Satan wiadze no ntsi, nkorɔfo taan no. Hɛn so, yɛmmfa hɛnho mmbɔ wiadze no, iyi ntsi sɛ aban ahorow na ɔsom ahorow dze hɔn enyiwa si hɛnho na wɔtan hɛn a, ɔnnyɛ hɛn nwanwa koraa.—John 15:18, 19.
2. Yɛbɛyɛ dɛn ada hɛnho do prɛko ama sɛ ɔsoɛrtsia bi ba a yeetum egyina ano?
Ɔsɛ dɛ yɛhyɛ gyedzi a yɛwɔ wɔ Jehovah mu no mu dzen. Ntsi, da biara, ɔsɛ dɛ egye ber bɔ no mpaa na ekenkan n’Asɛm no. Mma asafo nhyiamu kor mpo mmpa wo tsir do. Sɛ eyɛ dɛm ndzɛmba yi nyina a, ɔbɛhyɛ wo dzen ma edze akokodur eegyina ɔsoɛrtsia biara a w’ebusuafo mpo botum dze aba wo do no ano. Ma yɛmfa ɔsomafo Paul dɛ nhwɛdo. Nna nkorɔfo mmpɛ n’asɛm koraa, ntsi wɔtaan no. Naaso ɔkaa dɛ: “[Jehovah] nye mo boafo; murunnsuro.”—Hebrewfo 13:6.
Sɛ yɛyer hɛnho wɔ asɛnka edwuma no mu a, ɔno bɔboa hɛn ma yeenya akokodur. Ebɛnadze ntsi na yɛreka dɛm? Dza ɔwɔ mu dɛ, asɛnka edwuma no boa ma yɛdze hɛnho to Jehovah do, na ɔmma yennsuro nyimpa. (Mbɛbusɛm 29:25) Sɛ inya akokodur dze ka asɛmpa no dɛm aber yi a, ɔbɔboa wo ma sɛ daakye bi aban no dze ne nsa to hɛn edwuma no do mpo a, irinngyaa asɛmpa no ka.—1 Thessalonicafo 2:2.
3. Sɛ wɔtan hɛn na yɛkɔ do dzi Jehovah nokwar a, ebɛn mfaso na yebenya?
Wɔka dɛ, ‘Ɔnnyɛ dza adwen pɛ nye dɛ da biara ɔhow gya do.’ Dɛmara na hɛn so ɔnnyɛ dza yɛpɛ nye dɛ nkorɔfo bɛtan hɛn. Naaso sɛ yemia hɛn enyiwa gyina ano a, ɔma hɛn gyedzi yɛ dzen paa. Bio so, ɔma yɛbɛn Jehovah kɛse osiandɛ sɛ odu ma ɔyɛ dzen a, ɔboa hɛn. (Kenkan James 1:2-4.) Sɛ Jehovah hu dɛ yeruhu amandze a, ɔyɛ no yaw paa. Naaso ne nyina ekyir no, sɛ ohu dɛ yɛmmpa abaw, mbom yɛda ho ara ridzi no nokwar a, n’enyi gye. Bible no ka dɛ: “Sɛ hom yɛ papa na hom hu amandze, na hom [nya] abotar a, iyi na ɔyɛ adom wɔ Nyankopɔn enyim.” (1 Peter 2:20) Sɛ yɛkɔ do dzi Jehovah nokwar ɔmmfa ho ɔsoɛrtsia biara a, ɔbɛma yeenya nkwa a onnyi ewiei wɔ wiadze fofor no mu. Wɔ dɛm wiadze no mu dze, yɛdze asomdwee bɔsom Jehovah, na obiara renntan hɛn.—Matthew 24:13.
PƐNSAPƐNSA MU KƆ EKYIR
Ma yɛnhwɛ mbrɛ sɛ nkorɔfo dze hɔn enyi si hɛn ho na wɔtan hɛn a, yebotum akɔ do edzi Jehovah nokwar. Afei yebohu kwan a Jehovah bɛfa do ehyira hɛn aber a yɛayɛ dɛm no.
4. Ibotum egyina ɔsoɛrtsia a w’ebusuafo dze bɛba wo do no ano
Nna Jesus nyim paa dɛ sɛ yɛka dɛ yɛbɔsom Jehovah a, bi a ɔrennyɛ hɛn ebusuafo binom dɛw koraa. Ma yɛnkenkan Matthew 10:34-36, na yensusu asɛmbisa yi ho:
-
Sɛ obi si gyinae dɛ ɔbɔsom Jehovah a, ebɛnadze na n’ebusuafo botum dze ayɛ no?
Ma yɛnhwɛ VIDEO yi, na ibohu asɛm a yɛreka yi ho nhwɛdo. Yewie a, yebosusu asɛmbisa a odzi do no ho.
-
Sɛ wo busuanyi anaa wo nyɛnko bi mmpɛ dɛ esom Jehovah a, ebɛnadze na ebɛyɛ?
Ma yɛnkenkan Ndwom 27:10 na Mark 10:29, 30. Sɛ yɛkenkan kyerɛwnsɛm no mu biara wie a, yebosusu asɛmbisa yi ho:
-
Sɛ w’ebusuafo anaa w’anyɛnkofo mmpɛ dɛ esom Jehovah a, kyerɛwsɛm yi besi dɛn aboa wo?
5. Sɛ nkorɔfo tan wo dɛ dɛn mpo a, kɔ do ara som Jehovah
Yehia akokodur ama yeetum edzi Jehovah nokwar aber a nkorɔfo mmpɛ dɛ yɛsom no no. Ma yɛnhwɛ VIDEO yi, na yensusu asɛmbisa a odzi do no ho.
-
Ebɛnadze na hɔn a wɔwɔ video no mu no yɛe a wɔahyɛ wo dzen?
Ma yɛnkenkan Asomafo Ndwuma 5:27-29 na Hebrewfo 10:24, 25. Sɛ yɛkenkan kyerɛwnsɛm no mu biara wie a, yebosusu asɛmbisa yi ho:
-
Sɛ aban no ka dɛ yengyaa adzesua na asɛnka kɔ a, ebɛnadze ntsi na ɔsɛ dɛ ekɔ do ara som Jehovah?
6. Jehovah bɔboa wo ma eegyina mu
Jehovah Adasefo mpanyin na mbofra a wɔwɔ wiadze yi mu beebiara no hyia ɔsoɛrtsia, naaso ne nyina ekyir no, wɔkɔ do ara dzi Jehovah nokwar. Ebɛnadze na wɔaboa hɔn ma woetum ayɛ dɛm? Ɔwodze, ma yɛnhwɛ VIDEO yi. Yewie a, yebosusu asɛmbisa a odzi do no ho.
-
Ebɛnadze na ɔboaa enuanom a wɔwɔ video no mu no ma wogyinaa ɔsoɛrtsia a wohyiae no ano?
Ma yɛnkenkan Romefo 8:35, 37-39 na Philippifo 4:13. Sɛ yɛkenkan kyerɛwnsɛm no mu biara wie a, yebosusu asɛmbisa yi ho:
-
Ebɛnadze na ɔwɔ kyerɛwsɛm yi mu a ɔma inya awerɛhyɛmu dɛ ibotum egyina ɔsoɛrtsia biara ano?
Ma yɛnkenkan Matthew 5:10-12, na yensusu asɛmbisa yi ho:
-
Sɛ nkorɔfo tan hɛn mpo a, ebɛnadze ntsi na hɛn enyi botum agye?
Jehovah n’asomfo ɔpepem pii egyina ɔsoɛrtsia ano. Woara so botum!
BINOM KA DƐ: “Emidze, menngye nndzi dɛ sɛ mihyia ɔsoɛrtsia a, mubotum egyina ano.”
-
Sɛ obi ka dɛm a, ebɛn kyerɛwsɛm na edze bɔboa no ma oeenya awerɛhyɛmu dɛ obotum egyina ano?
DZA ESUA
Sɛ nkorɔfo tan hɛn, na Jehovah hu dɛ yɛreyɛ dza yebotum biara dze asom no a, n’enyi gye paa. Obotum aboa hɛn ma yeegyina ɔsoɛrtsia biara a yebehyia no ano!
Mbobɔdo
-
Ebɛnadze ntsi na ɔsɛ dɛ Christianfo hwɛ kwan dɛ nkorɔfo bɛtan hɔn?
-
Ebɛnadze na ibotum ayɛ dze ada woho do, ama sɛ ɔsoɛrtsia bi ba a eetum egyina ano?
-
Ebɛnadze na obotum ama enya awerɛhyɛmu dɛ Jehovah bɔboa wo ma eetum egyina ɔsoɛrtsia biara a ibehyia no ano?
HWEHWƐ PII KA HO
Aberantsɛ bi kaa dɛ ɔronnkɔ sogya. Iyi ntsi wɔdze no kɔtoo efiadze. Hwɛ video yi, na ibohu mbrɛ Jehovah boaa no ma ogyinaa dza ohyiae no ano.
Hwɛ dza ɔboaa awarfo bi ma wɔkɔr do dzii Jehovah nokwar ɔmmfa ho dɛ wohyiaa ɔsoɛrtsia mfe pii no.
Kenkan asɛm yi, na ibohu dza obotum aboa wo ma edze akokodur eegyina ɔtaa ano.
Sɛ hɛn ebusuafo soɛr tsia hɛn a, ɔsɛ dɛ yɛyɛ hɛn adze dɛn, na ebɛnadze na yebotum ayɛ na yɛnye Jehovah ntamu aannsɛɛ?
“Nokwar No, Ammfa Asomdwee Ammba, Na Mbom Nkrantsee A” (Ɔweɔn-Aban, October 2017)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
