TOƁƁERE 59
Hiɗon waawi yonndinaade cukkeede
Woni hannde maa janngo kala almasiiyaajo dartete maa cukkete. Ɗun no haani en hulɓinde ?
1. Fii honɗun hiɗen habbori cukkeede ?
Deftere Alla nden no holli ko laaɓi pos : « kala faalaaɓe wuurude e hoore dewal e nder humondiral e Iisaa Almasiihu on ɓen fow cukkete » (2 Timotee 3:12). Annabi Iisaa cukkano ɓay o tawanooka e aduna Seytaane. Menen kadi, men tawaaka e oo aduna. Ko sabu ɗun, men ŋalɗataa si guwernemanji e feddeeji diina oo aduna no cukkaade men (Yuuhanna 15:18, 19).
2. Ko honno hebilortoɗen fii cukkeede ?
Ko hannde haanuɗen tiiɗinde hoolaare men nden e Yahuwah Alla. Waɗee saa’i ɲannde woo fii toragol mo e janngugol lowre Daaluyee makko on. Tawee e pottite moftal ngal soono woo. E hoore waɗugol ɗun, on heɓay doole ɗe hatonjiniɗon fii dartagol cukkeede e hoore cuucal, hay si ko ɓeynguure mon nden cukkii on. Puulusa sahaabaajo cukketenooɗo soono woo winnduno : « Ko [Yahuwah, NWT] Joomiraaɗo on woni faabo an ngon, mi hulataa » (Yahuudiyankeeɓe 13:6).
En waaway kadi tiiɗinde cuucal men ngal si en waajike soono woo. Waajagol ngol wallay en hoolagol Yahuwah Alla e foolugol kulol yimɓe (Tindi 29:25, VPFJ). Si on tiiɗinii cuucal mon ngal hannde fii waajagol, on hebilanto fii jokkugol waajagol hay si laamuuji ɗin haɗii golle men ɗen (1 Tesalonii 2:2).
3. Ko nafa honɗun heɓeten si en yonndinike cukkeede ?
Ko goonga, hay gooto yiɗaa cukkeede. Kono si en yonndinike cukkeede, gomɗinal men ngal ɓurtay tiiɗude. En ɓadoto Yahuwah Alla ɓay hiɗen anndi o wallay en si en waawataa waɗude hay huunde (janngee Yaaquuba 1:2-4). No metta Yahuwah Alla yi’ugol hiɗen tampa, kono o weltoto si en yonndinike cukkeede. Deftere Alla nden wi’i : « si on muɲɲike tampere sabu waɗugol ko moƴƴi, ɗun ko huunde moƴƴere yeeso Alla » (1 Petruusu 2:20). Si en yonndinike e hoore sella-finndeyaagal, Yahuwah Alla okkay en ngurndan poomayankejan e nder aduna mo aldaa e dartotooɓe dewal goongawal ngal (Matta 24:13).
LUGGINEE
Ndaaren ko wallata en luttugol wonude sella-finndeeɓe hay si hiɗen cukkeede e no Yahuwah Alla barkinirta en.
4. Hiɗon waawi yonndinaade si ɓeynguure mon nden no cukkaade on
Annabi Iisaa anndinno en no gasa ɓeynguure men nden jaɓataa fewjoore men nden fii rewugol Yahuwah Alla. Janngee Matta 10:34-36 e yewton fii ngal lanndal :
-
Ko honɗun feƴƴata wonnde si goɗɗo ka ɓeynguure fewjii rewugol Yahuwah Alla ?
Fii y’iugol misal, fijinee VIDIO on e yewton fii lanndal jokkitungal ngal.
-
Si siɗɗo mon maa weldiiɗo mon faalaama haɗude on rewugol Yahuwah Alla, ko honɗun waɗoton ?
Janngee Zabuura 27:10 (VPFJ) e Markuusa 10:29, 30. Ɓawto janngugol kala aaya, yewtee fii ngal lanndal :
-
Ko honno ndee fodoore wallirta on si siɗɗo mon maa weldiiɗo mon no cukkaade on ?
5. Jokkee rewugol Yahuwah Alla hay si hiɗon cukkeede
Hiɗen haani wakkilaade fii rewugol Yahuwah Alla si woɓɓe no etaade haɗugol en waɗugol ɗun. Fijinee VIDIO on e yewton fii lanndal jokkitungal ngal.
-
Ko honno ɗee mise okkirta on wakkilaare ?
Janngee Kuuɗe sahaabaaɓe ɓen 5:27-29 e Yahuudiyankeeɓe 10:24, 25. Ɓawto janngugol kala lowre, yewtee fii ngal lanndal :
-
Fii honɗun no hitti jokkugol rewugol Yahuwah Alla hay si waajagol men ngol maa pottite men ɗen no toŋaa ?
6. Yahuwah Alla wallay on yonndinagol
Seedeeɓe Yahuwah ɓen, ɓe duuɓi sertuɗi maa ɓe leyɗe sertuɗe, no jokki rewugol Yahuwah Alla e hoore sella-finndeyaagal hay si hiɓe cukkeede. Fii anndugol ko honɗun woni e wallude ɓe, fijinee VIDIO on. Ɓawto ɗun, yewtee fii lanndal jokkitungal ngal.
-
Ko honɗun wallunoo Seedeeɓe Yahuwah ɓen ka nder vidio on yonndinagol ?
Janngee Roomu 8:35, 37-39 e Filipii 4:13. Ɓawto janngugol kala lowre, yewtee fii ngal lanndal :
-
Ko honno oo aaya okkirta on pellital hiɗon waawi yonndinaade kala satteende ?
Janngee Matta 5:10-12 e yewton fii ngal lanndal :
-
Ko honno heɓirton weltaare hay si hiɗon cukkeede ?
WOƁƁE GOO NO WI’A : « Min, mi waawataa yonndinaade cukkeede. »
-
Ko aayeeje honɗe huutorton fii fellintingol wi’oowo ɗun on ?
RAWNOODE
Yahuwah Alla no teddina moƴƴa wakkilaare men nden fii rewugol mo hay si hiɗen cukkeede. E dow ballal makko, en waaway yonndinaade.
Ndartannde
-
Fii honɗun almasiiyaaɓe ɓen no habbori cukkeede ?
-
Hannde, ko honno hebilortoɗen yonndinagol cukkeede ko aroyta ?
-
Ko honɗun wallata on rewugol Yahuwah Alla e hoore sella-finndeyaagal hay si no sattani on ?
TASKEE
Suka ka dewal no sifii no Yahuwah Alla wallirnoo mo yonndinagol ko o sokaa sabu ko o wonani laamu Alla ngun tun.
Ndaaree ko wallunoo jommbindirɓe rewugol Yahuwah Alla e hoore sella-finndeyaagal fii duuɓi ɗuuɗuɗi hay si hiɓe cukkano.
Hiɓe rewude Yahuwah Alla fii kala saa’iiji ɗin waylike (7:11)
Anndee ko honno wakkilortoɗon si hiɗon cukkeede.
« Hebilee hannde yonndinagol cukkeede fii ko aroyta » (Suudu Aynirdu ndun, suwiye 2019)
Ko honno haanuɗen yiirude cukkannde ɓeynguure men nden e ko honno gerdirten fii heɓugol jam e rewen Yahuwah Alla e hoore Sella-finndeyaagal ?
« Wonaa ɓuttu goonga on addi, kono ko kaafa » (Suudu Aynirdu ndun, ottoombur 2017)