LÈSON 59
Ou pé rété fidèl lè yo ka pèwsékité-w
Ki nou vé ki nou vé pa, ni moun ki ké éséyé anpéché-nou sèvi Jéova. Yo pé jous rivé a fè-nou bon méchansté. Èskè fò sa fè-nou pè ?
1. Nou ja sav yo ké pèwsékité-nou. Poukwa nou sèten dè sa ?
Labib ka di franchman : « Tout moun ki vlé montré an vi a yo kè yo enmé Bondyé é kè yo vlé vin disip a Jézi ké jwenn pèwsékisyon osi » (2 Timoté 3:12). Konm Jézi pa té ka mélanjé-y adan mond a Satan, yo pèwsékité-y. Nou pa’a mélanjé-nou adan mond-la nonplis. Kifè, sa pa ka étoné-nou lèwvwè sèwten gouvènman oben sèwten rèlijyon ka pèwsékité-nou (Jan 15:18, 19).
2. Nou ja sav yo ké pèwsékité-nou. Kijan pou nou préparé-nou ?
Dépi konnyéla, fò-nou fè éfò pou nou konsolidé fwa an nou. Chakjou, fò-nou pran on ti tan pou priyédyé é pou li Bib an nou. Anplisdisa, fò-nou ay réinyon chak simenn. Grasa sé bon labitid-lasa, nou ké ni fòs é kouraj pou nou pé sa kenbé douvan tout kalté pèwsékisyon, menmsi sé pwòp fanmi an nou ki ka tigonné-nou. Yo pèwsékité lapòt Pòl onlo menm ! Mi sa i maké : « Jéova sé sèkou an mwen, an pé ké pè » (Ébré 13:6).
Si nou ni labitid préché, sa ké édé-nou ni plis kouraj. Lè nou ka préché, nou ka aprann fè Jéova konfyans é sa ka édé-nou pou nou pa tranblé douvan ponmoun (Pwovèb 29:25). Konsa, menmsi sé gouvènman-la bizwen arété aktivité an nou, nou ké byen préparé é nou ké ni fòs é kouraj pou nou kontinyé préché (1 Tésalonisyen 2:2).
3. Ki byenfé sa ka pwokiré-nou si nou ka rété fidèl a Jéova lè yo ka pèwsékité-nou ?
A pa enmé nou enmé pèwsékisyon ! Men lè nou ka rivé kenbé lèwvwè yo ka pèwsékité-nou, sa ka konsolidé fwa an nou. É lè nou ka santi kè nou pé pa ankò é kè Jéova ka ban-nou fòs, nou ka vin pibon zanmi èvè-y ankò (li Jak 1:2-4). Lè nou ka soufè, sa ka fè Jéova lapenn, men sa ka fè-y plézi lè i ka vwè jan nou ka tchenbé rèd. Mi sa Labib ka di : « Si zò ka andiré lè zò ka soufè paskè zò fè sa ki byen, sé on biten ki ka fè Bondyé plézi » (1 Pyè 2:20). Si nou ka rété fidèl, Jéova ké rékonpansé-nou. I ké ban-nou lavi étèwnèl adan mond nouvo la. É adan mond-lasa, ponmoun pé ké anpéché-nou sèvi Jéova (Matyé 24:13).
AN-NOU FOUYÉ PI FON
An-nou vwè poukwa ni mwayen nou rété fidèl a Jéova menmsi yo ka pèwsékité-nou. É an-nou vwè kijan Jéova ké rékonpansé-nou.
4. Siwvwè fanmi a-w ka pèwsékité-w, ni mwayen ou rété solid
Jézi té ja di-nou kè sèwten moun adan fanmi an nou té’é pé rivé a pèwsékité-nou davwa nou désidé sèvi Jéova. Li Matyé 10:34-36 é fè on ti kozé asi kèsyon-lasa :
-
Ka fanmi a on moun pé rivé a di oben ka yo pé rivé a fè difètkè moun-lasa désidé sèvi Jéova ?
Si ou vlé vwè on ègzanp asi sa, gadé VIDÉO-la é fè on ti kozé asi sé kèsyon-la ki ka vin la.
-
Ka ou ké fè si fanmi a-w oben zanmi a-w ka chèché on mwayen pou anpéché-w sèvi Jéova ?
Li Sòm 27:10 é Mawk 10:29, 30. Apré ou li chak pasaj, fè on ti kozé asi kèsyon-lasa :
-
Si on moun an fanmi a-w oben on zanmi a-w vlé anpéché-w sèvi Jéova, kijan pwomès-lasa pé édé-w ?
5. Kontinyé sèvi Jéova menmsi yo ka pèwsékité-w
Fò ou ni kouraj pou sèvi Jéova lèwvwè yo ka mèt baton an wou a-w. Gadé VIDÉO-la é fè on ti kozé asi kèsyon-la ki ka vin la.
-
Adan tout sé ègzanp-lasa, ka ki ankourajé-w ?
Li Akt 5:27-29 é Ébré 10:24, 25. Apré ou li chak pasaj, fè on ti kozé asi kèsyon-lasa :
-
Menmsi sé gouvènman-la ka défann-nou préché oben ka défann-nou ay réinyon, fò-nou kontinyé sèvi Jéova. Poukwa sa enpòwtan toubònman ?
6. Jéova ké édé-w andiré
Toupatou asi latè, ni onlo Témwen ki rété fidèl a Jéova magré yo jwenn pèwsékisyon. Pawmi yo, ni sa ki té jenn é ni sa ki té ni on bèl laj. Si ou vlé vwè ka ki édé-yo, gadé VIDÉO-la. Aprésa, fè on ti kozé asi kèsyon-la ki ka vin la.
-
Ka ki ba sé frè é sè la fòs pou yo té pé kenbé ?
Li Women 8:35, 37-39 é Filipyen 4:13. Apré ou li chak pasaj, fè on ti kozé asi kèsyon-lasa :
-
Kijan pasaj-lasa ka édé-w konprann kè ou ké pé rété fidèl kèlkèswa éprèv-la ou ké jwenn la ?
Li Matyé 5:10-12 é fè on ti kozé asi kèsyon-lasa :
-
Poukwa nou pé ni tchè-kontan menmsi yo ka pèwsékité-nou ?
Ni plizyè milyon sèwvitè a Jéova ki rété fidèl a-y. Vou osi, ou pé rété fidèl !
MI SA MOUN KA DI : « Mwenmenm, zafè a pèwsékisyon-la, an pé’é pé sipòté sa menm ! »
-
Si on moun ka di-w sa, ki vèwsé ou té’é pé itilizé pou ankourajé-y ?
ON TI RÉZIMÉ
Lè nou ka fè éfò pou rété fidèl, Jéova ka ba sa onlo valè. Grasa-y, nou pé andiré lè yo ka pèwsékité-nou.
Ka ou woutyenn
-
Fò sé krétyen-la mèt an tèt a yo kè yo ké jwenn pèwsékisyon. Poukwa ?
-
Dépi konnyéla, ni mwayen ou préparé-w pou ou rété doubout lè ou ké jwenn pèwsékisyon. Kijan ou pé fè sa ?
-
Poukwa ou pé sèten kè ou ké pé rété fidèl a Jéova menmsi ou té’é jwenn éprèv ?
AY GADÉ SA OSI
Yo mèt on jenn frè lajòl pas i pa té vlé mélanjé-y adan zafè a mond-lasa. I ka èspliké kijan Jéova édé-y.
Yo pèwsékité on frè é madanm a-y pannan plizyè lanné. Gadé ka ki édé-yo rété fidèl a Jéova.
Yo rivé sèvi Jéova magré té ni onlo biten ki té ka chanjé an vi a yo (7:11)
Ka ou pé fè pou montré-w brav lè ou ké jwenn pèwsékisyon ?
« Préparé-w dépi konnyéla pou pèwsékisyon-la » (Tou dè Gad a juiyé 2019)
Si fanmi a-w ka pèwsékité-w, kijan pou-w pran sa é ka ou pé fè adan on ka konsa ?
« La vérité apporte, “non pas la paix, mais l’épée” » (Tou dè Gad a òktòb 2017 an fransé)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
