REIREI 59
Ko Boni Kona n Nanomwaaka i Aan te Bwainikirinaki
A na bane Kristian ni boo ma te kakaaitara ao te bwainikirinaki imwina riki. Ti na mimi n rikin anne?
1. E aera bwa ti kantaningaa te bwainikirinaki?
E kamataata te Baibara ni kangai: “A na bane naba ni bwainikirinaki te koraki ake a kani maiuakina tangiran te Atua ngkai taan rimwini Kristo Iesu ngaiia.” (2 Timoteo 3:12) E bwainikirinaki Iesu ibukina bwa e aki arona aroia kaain ana aonnaba Tatan. Ngaira naba ti aki arona aroia kaain te aonnaba, ngaia are ti aki mimi ngkana ti bwainikirinaki irouia tautaeka n te aonnaba aei ao botaki n Aro.—Ioane 15:18, 19.
2. Ti na kangaa ni katauraoira imwain te bwainikirinaki?
Ti riai ni kakorakoraa onimakinan Iehova ngkai. Karekea am tai ni katoabong n tataro nakoina ao ni wareka teuana mwakoron ana Taeka. Katoatai n irira te taromauri n te ekaretia. Karaoan aei e na anganiko te korakora ni kaaitarai aeka ni bwainikirinaki ma te ninikoria, e ngae ngkana e riki mairouia am utu. E korea ae kangai te abotoro Bauro, are e a aki toki ni bwainikirinaki: “Te tia buokai Iehova, N na aki maaku.”—Ebera 13:6.
Ti kona naba ni karikirakea ninikoriara man te katoatai n uarongorongo. Ti reireinaki man te uarongorongo bwa ti na onimakina Iehova ao n tokanikai i aoni maakakia aomata. (Taeka N Rabakau 29:25) Ngkana ko karikirakea te ninikoria n uarongorongo ngkai, ko na bon tauraoi raoi ao n teimatoa n uarongorongo e ngae ngkana e a katabuakaki ara mwakuri iroun te tautaeka.—1 I-Tetaronike 2:2.
3. Ti kangaa ni kakabwaiaaki ngkana ti nanomwaaka i aan te bwainikirinaki?
Eng, ti bon aki kimwareirei ngkana ti bwainikirinaki, ma ngkana ti nanomwaaka i aani bwainikirinara, e a korakora riki iai ara onimaki. Ti a kaan riki ma Iehova ibukina bwa ti nora ana ibuobuoki ngke ti namakinna bwa e aki tau korakorara. (Wareka Iakobo 1:2-4.) E maraki Iehova ngkana e norira bwa ti rawawata, ma e kukurei ngkana e norira bwa ti nanomwaaka. E kangai te Baibara: “Bon te bwai ae kakukurei iroun te Atua ngkana kam nanomwaaka i aani karawawataami ibukini karaoan ae raoiroi.” (1 Betero 2:20) E na bon anganira kaniwangara Iehova ngkana ti teimatoa ni kakaonimaki nakoina, ae te maiu n aki toki n te aonnaba ae boou ae nang akea iai taani kakaaitara.—Mataio 24:13.
REIAKINA AE BATI RIKI
Noria bwa bukin tera ngkai ti kona n teimatoa ni kakaonimaki nakon Iehova e ngae ngke a bwainikirinira aomata, ao aron Iehova ni kakabwaiaira.
4. Ko kona n nanomwaaka i aani kakaitaraakim irouia am utu
E kakoauaa Iesu ae a kona tabeman kaain ara utu n aki tangirira bwa ti na beku iroun Iehova. Wareka Mataio 10:34-36, ao maroroakina te titiraki aei:
-
Tera ae a kona n taekinna ke ni karaoia kaain te utu ngkana iai temanna i buakoia ae kani beku iroun Iehova?
Ibukin noran te katoto aei, kaota te TAAMNEI, ao maroroakina te titiraki aei.
-
Tera ae ko na karaoia ngkana iai am koraki ke raoraom ae e kataia n tukiko man am beku iroun Iehova?
Wareka Taian Areru 27:10 ao Mareko 10:29, 30. Imwini warekan te kibu teuana ma teuana, maroroakina te titiraki aei:
-
E na kangaa ni buokiko te berita aei ngkana ko kakaitaraaki irouia am utu ke raoraom?
5. Teimatoa n taromauria Iehova n aki ongea te bwainikirinaki
E kainnanoa te ninikoria te beku iroun Iehova ngkana a kataia tabemwaang n tukira mani karaoana. Kaota te TAAMNEI, ao maroroakina te titiraki aei.
-
A kangaa katoto aika n te taamnei aei ni kakorakorako?
Wareka Mwakuri 5:27-29 ao Ebera 10:24, 25. Imwini warekan te kibu teuana ma teuana, maroroakina te titiraki aei:
-
E aera ngkai e rangi ni kakawaki bwa ti na teimatoa n taromauria Iehova e ngae ngkana e katabuakaki ara mwakuri n uarongorongo ke ara bobotaki n taromauri?
6. E na buokiko Iehova n nanomwaaka
A a tia Ana Tia Kakoaua Iehova aika ataei ao aika kara ni kakaonimaki ni koaua ni beku iroun Iehova, e ngae naba ngke a bwainikirinaki. Ibukin noran te bae a buokaki iai, kaota te TAAMNEI. Ao maroroakina te titiraki aei.
-
N aron ae oti n te taamnei, tera ae e buokiia taani Kakoaua aikai n nanomwaaka?
Wareka I-Rom 8:35, 37-39 ao I-Biribi 4:13. Imwini warekan te kibu teuana ma teuana, maroroakina te titiraki aei:
-
Ko kangaa ni kakoauaa raoi n te kibu aei bwa ko kona n nanomwaaka i aani kataaki nako?
Wareka Mataio 5:10-12, ao maroroakina te titiraki aei:
-
E aera ngkai ko kona ni kukurei n aki ongea te bwainikirinaki?
Mirion ma mirion taan taromauria Iehova aika teimatoa ni beku iroun Iehova ma te kakaonimaki n aki ongei kataaki. Ko kona naba ngkoe!
A TAKU TABEMAN: “I aki kona n nanomwaaka i aan te bwainikirinaki.”
-
Baikara kiibu aika a na buokaki iai n aki maaku?
KAKIMOTOTOANA
E kakawaki iroun Iehova, ara kakorakora ni beku irouna n aki ongea te bwainikirinaki. Man ana ibuobuoki, ti a kona iai n nanomwaaka ao n tokanikai!
Kauring
-
E aera ngkai a riai Kristian ni kantaningaa te bwainikirinaki?
-
Tera ae ko kona ni karaoia ngkai, bwa ko aonga n tauraoi imwain te bwainikirinaki?
-
Tera ae kona ni buokiko ni kakoauaa raoi ae ko boni kona ni beku iroun Iehova n aki ongei kataaki?
NORI NABA AIKAI
Mataku iroun te tari te mwaane ae te roro n rikirake ngke e kabwarabwaraa aron Iehova ni buokia n nanomwaaka ngke e kabureaki ibukin teina i nuka.
Noria bwa tera ae e buokiia te taanga teuana bwa a na kakaonimaki ni beku iroun Iehova i nanon ririki aika a bati n aki ongea te kakaaitara.
Noria bwa ko na kangaa n ninikoria ni kaitaraa te bwainikirinaki.
“Katauraoiko Ngkai Nakon te Bwainikirinaki” (Te Taua-n-Tantani, Turai 2019)
Tera arora n iangoa aia kakaaitara ara utu, ao ti na kangaa ni kateimatoa te rau ao n teimatoa ni kakaonimaki nakon Iehova?
“Te Koaua—E Aki ‘Uota te Rau ma [E] Uota te Kabaang’” (Te Taua-n-Tantani, Okitobwa 2017)
Ko Bae Naba n Tangira
TITIRAKI AIKA TATABEKAKI
Tera te Reirei n te Baibara?
Karekei kaekaan titiraki ni kaineti ma kairan te reirei n te Baibara iroura.
