ƝAAKWƐLƐI 59
Ya pɛli tɔɔi kpaan nua da kɛi ɲɛikɔukpɔlu mɛni laa yɛ́
Ɉu ə kwea ɉu ə kpuɔ kpean bələi mɛni a pɛli ə həli kilistaleai lɔpee gəlee ɓa, ɉɛnɛɛ ma gɛ ɲɛikɔukpɔlu mɛni. Maanɛ mɔɔn yili ə gu maaɲɔwu ?
1. Lə mɛni ɓa maanɛɛ gu kɛ a gɔlɔnŋaa guɔ ma nua kaa pai ɲɛikɔupɔlu mɛni laa guɔ ?
Biblə a mo kpɔ a ɉu ponoɔ yɛ ma : “ Nuai da di wɔ yɛnɛɛ [lɛɛ] Yálá yee kɔma Zesu kristə hu, diɛ ɓə da di laanɔnwɔɓo ” (Timote veelɛ 3:12). Zesu ho naa too Sətana ŋɔ yɛnɛɛ ŋɛi hu mɛniɠaa hu yili ɓa di naanɔnwɔɓo. Guɔ kpɛliman gu laa ho Sətana ŋɔ yɛnɛɛ ŋɛi hu mɛniɠaa hu, yili ɓa gbahanama nua da lɛɛkalanŋaa da kɛi ɲɛikɔukpɔlu mɛni laa guɔ yili hwa gu kwəi pili guɔ (Ɉaan 15:18, 19).
2. Gwa pɛli gu kpɔɔ kpɛtɛi ləi ɲɛikɔukpɔlu mɛni tɔwɔ ?
Maanɛɛ gu yələ lɛɛ ŋɛi gu gu wɔ laanalaa huwala-wala yɛ hwilɛn na Zehova ɓa. Maanɛɛ nwɔnɔ guɔ lowai həɠə holo kəlee guɔ Yálá hwɛli, guɔ Biblə ɓo ə lɛɛ guɔ li ŋaakpɔnŋaa diɛ holo kəlee. Mɛniɠaa tii kəlee kaa pai kpɔnmaa tɛɛ ə́ pɔ ə́ hu ə wala-wala, ə́ tɔɔ kpaan ɲɛikɔukpɔlu mɛniɠaa hu a liikpələ ə ma kɛ gaa həɠəi ə́ yee bɛlɛn nua pɔ pələ. Apɔtɛlɛ Polə ŋɛi nua di kɛi ɲɛikɔukpɔlu mɛni laa ma kɛlɛ-kɛlɛ ə bɛɛn yɛ ma : “ Zehova kaa a dɔ́ɔ́ búlú vá ɲɔw hɛn nɔpee ta ɓa ” (Hebreu 13:6).
Gwa pɛli nwɔnɔ gu liikpələ hɔlɔɓo gwa kɛi Yálá Lawoo laahəlii kɛlɛ-kɛlɛ. Yálá Lawoo laahəliɛ a gɛ gu laa Zehova la ə lɛɛ gu nukan ŋɔ ɲɔu kulɔ gu hu (Hanwon 29:25). Yili ɓa gwa kɛi Yálá Lawoo laahəli háákəi a liikpəlaa, gu kaa pai kɛi a gu kɛ pələ pɛliɛ guɔ Yálá Lawoo laahəli ɓɛlowai gbahanama nua da tɔn dɔɔ la gu wɔ Yálá kólói ɓa (Tesalonikə dɔlɔɔ 2:2).
3. Gwa kɛi tɔɔ kpaan ɲɛikɔukpɔlu mɛniɠaa hu mɛinɛɛ ləkɛɛɠaa ɓə gwa ɉɔlɔɓo ?
Pələi ma ɲɛikɔukpɔlu mɛni hwa gu kwəinɛɛ la, kəla gwa kɛi tɔɔ ɉu kpaan a gu wɔ laanalaa huwala-wala. Gwa kɛ ɲɛikɔukpɔlu mɛni hu Zehova a kpɔnmaa tɛɛ gu pɔ ɓɛlowai hwaŋa lɔpee hwa kea kɛ la gu yəi, ə lɛɛ yili a gu maalɛɠɛ Zehova ɓa. (Ɉakə 1:2-4 ɓo). Zehova a kɛi gu kaa guɔ mɔnɔ mii yili a hee ɉu kpɔ kɛnɛ, kəlaa gwa kɛi tɔɔ mɔnɔ hu kpaan yili a gwəinɛɛ. Biblə kaa kɛi ma : “ Nu a mɛni lɛlɛɛ kɛ, diɛ mɔnɔ ɓo yɛ niikpələ yili maa mɛni ɓa, mɛni lɛlɛɛ li Yálá ɲɛi ɓa ” (Piɛrə dɔlɔɔ 2:20). Nua kpɔ da tɔɔ kpaan di wɔ mɔnɔɠaa hu Zehova kaa pai mɛinɛɛ kɛnɛ kɛi diɛ, yii a yiipoo yii kpɛɛ ho ma yɛnɛɛ ta hu ɓɛi nuta ho pai kɛi laa yɛ kpean di wɔ Yálá mɛni tɔwɔ (Matie 24:13).
Ə́ WƆ MƐNIKƆLƆNŊAA TA PƐLƐ MA
Gaa lə mɛni ɓa gwa pɛli gu lɛɛ a gu təlimoɔ Zehova ɓa ə ma kɛ nua da kɛ mɔnɔ laai gu mɛi, ə lɛɛ gaa pələi Zehova a gu hwilakulɔ la.
4. Ə́ yee bɛlɛn nua da kɛi kpean ə tɔwɔ ə́ wɔ Yálá mɛni hu ya pɛli tɔɔi kpaan
Zesu ə kɛ kpɔ a gɔlɔnŋaa yɛ ma gu yəi bɛlɛn nua taɠaa di ho pai hwaa ma ə gɛ gu Zehova ɓatoo. Matie 10:34-36 ɓo, ə lɛɛ ka lono kɛ gɛɛmaalən ŋɛi mɛi :
-
Nuta a ɉəɠə ɉu yɛ ma gaa Zehova ɓatooi lə ɓə ɲəi bɛlɛn nua da pɛli gɛi ?
Ya kɛ bɔ ə gɔɔmaa ta kaa, VIDIO kaa, ə lɛɛ ka lono kɛ gɛɛmaalən ŋɛi mɛi.
-
Ə́ yəi bɛlɛn mun da awala kɛtii ə ɓəlan mu da a kɛ bɔ əi hwiikpɛɛ Zehova ɓatoo mɛn hu lə ɓə ə́ kaa pai gɛi ?
Maatɛnɛ 27:10 da Markə 10:29, 30 ɓo. Ka vɛlisɛɛɠaa tii ɓo tɛi-tɛi ə lɛɛ ka lonon kɛ gɛɛmaalən ŋɛi mɛi :
-
Mɛnii vɛlisɛɛ ŋɛi kaa moi a kpɔnmaa tɛɛ ləi ə́ pɔ ə́ yəi bɛlɛn mu da awala kɛtii ə́ ɓəlan mun da a kɛi kpean ə́ tɔwɔ ə́ wɔ Yálá mɛni hu ?
5. Lɛɛ lɔ ma yɛ́ Zehova ɓatoo ə ma kɛ nua kaa ɲɛikɔukpɔlu mɛni laa yɛ́
Ho kɛ li liikpələ ə kɛ gu yəi nua da kɛi kpean gu tɔwɔ Zehova ɓatoo mɛni hu. VIDIO kaa, ə lɛɛ ka lono kɛ gɛɛmaalən ŋɛi mɛi.
-
Gɔɔmaaɠaa ŋɛi vidio hu da ə́ hwaŋalɔ ləi ?
Gɛlaɠaa 5:27-29 da Hebreu 10:24, 25 ɓo. Ka vɛlisɛɛɠaa tii ɓo tɛi-tɛi ə lɛɛ ka lonon kɛ gɛɛmaalən ŋɛi mɛi :
-
Lə mɛni ɓa maanɛɛ gu lɛɛ lɔ ma guɔ Zehova ɓatoo ə ma kɛ daa tɔn dɔɔ gu wɔ Yálá kólói ɓa, da gu li mɛni gu wɔ ŋaakpɔnŋaa diɛ ?
6. Zehova kaa pai kpɔnmaa tɛɛ ə́ pɔ ə́ tɔɔ kpaan
Nuai di kaa-kwəlan ho tanɔn di ho a huwu tɔnɔ diɛ ɓo a Zehova ŋɔ Kəlaɠaa di kɛ lɔ ma diɛ Zehova ɓatoo pələi ma ɲɛikɔukpɔlu mɛni ə kɛi həli la diɛ. Yii kpɔnmaa tɛɛ di pɔ ə gɛ yɛ́ pɛli gɔlɔn ɉii, VIDIO kaa, ə lɛɛ ka lono kɛ gɛɛmaalən ŋɛi mɛi.
-
Vidio hu, lə ɓə kpɔnmaa tɛɛ Zehova ŋɔ Kəlaɠaa ŋɛi pɔ diɛ tɔɔ kpaan ?
Romə 8:35, 37-39 da Korɛntə veelɛ 4:7 ɓo. Ka vɛlisɛɛɠaa tii ɓo tɛi-tɛi ə lɛɛ ka lonon kɛ gɛɛmaalən ŋɛi mɛi :
-
Vɛlisɛɛ ŋɛi a kpɔnmaa tɛɛ ləi ə́ pɔ ə́ laana yɛ́ ma ya pɛli ə́i liikpələ mɔnɔ lɔpee gəlee hu ?
Matie 5:10-12 ɓo, ə lɛɛ ka lono kɛ gɛɛmaalən ŋɛi mɛi :
-
Lə mɛni ɓa ya pɛli kɛi kwəinɛɛ hu ə ma kɛ ɲɛikɔukpɔlu mɛni a həli yɛ́ ?
Nu miliɔn damaa a Zehova ɓatoonua daa tɔɔ kpaan ɲɛikɔukpɔlu mɛniɠaa hu. Yɛ́ kpɛliman ya pɛli ə́ tɔɔ kpaan !
NUTAƓAA DA KƐ KƐI MA : “ Nwɛ́i vá pɛli tɔɔ kpaan ɲɛikɔukpɔlu mɛniɠaa hu. ”
-
Nuta a mo tii yɛ́ vɛlisɛɛ ləkɛɛɠaa ɓə a pɛli maanu hwaŋalɔi ?
YII GU GALAN
Gwa kɛi tɔɔkpaan ɲɛikɔukpɔlu mɛniɠaa hu yili a Zehova kwəinɛɛ kpɔ kɛnɛ. Zehova ŋɔ kpɔnmaa haalai gu yee a pɛli ə tɛɛ ɲɛikɔukpɔlu mɛniɠaa diɛ !
Nɛɛ ə́ kili pɔ
-
Lə mɛni ɓa maanɛɛ kilistalea di kɛ a gɔlɔnŋaa diɛ ma nua kaa pai ɲɛikɔukpɔlu mɛniɠaa laa diɛ ?
-
Ya pɛli ə́ kpɔɔ kpɛtɛi ləi haakəlee ə gɛ ɲɛikɔukpɔlu mɛni a pa ə́ yee ə́ tɛɛ ma ?
-
Lə mɛni ɓa ya pɛli laana yɛ́ ma ya pɛli lɛɛi a ə́ təlimoɔ Zehova ɓa ə ma kɛ mɔnɔɠaa da həli yɛ́ ?
MƐNI TAKPƐLIƓAA
Gaa pələi Zehova ə kpɔnmaa tɛɛ la gu nan non ɉulɔnu ta pɔ yii di doo gahoŋa maahɔlɔɓo ho kɛi naatoo yɛnɛɛ mɛniɠaa hu.
Ka gu tɔɔ kpaan ə ma kɛ di kaa ɲɛikɔukpɔlu mɛni laa guɔ (2:34)
Gaa yii kpɔnmaa tɛɛ hulɔnu ta da nɛa di pɔ diɛ pɛli lɛɛi a di təlimoɔ Zehova ɓa pələi ma kpean bələi mɛniɠaa ə kɛi həli la diɛ.
Pələi ma mɛniɠaa maa ə kɛi hwalən na di kɛ lɔ ma diɛ Zehova ŋɔ kólói kɛ (7:11)
Gu liikpələlaa kɛɛ maakwɛli ɲɛikɔukpɔlu mɛniɠaa tɔwɔ.
“ Gɛɛ ɲɛikɔukpɔlu mɛniɠaa di ho kɛ həlii ə́ kpɔɔ kpɛtɛ yiihu ” (La Tour de Garde, juillet 2019)
Ə́ yee bɛlɛn nua da kɛi kpean ə́ tɔwɔ Yálá batoo mɛni hu maanɛɛ ə́ yili kaa ləi ? Lə ɓə ya pɛli gɛi ə́ gɛ liilaa ə lɛɛ bɛlɛn nua yəi yiiyaan ə́ lɛɛ a ə́ təlimoɔ Zehova ɓa ?
“ Teɲa hwa pa a liilaa kəlaa ɓowakea ɓə a paa la ” (La Tour de Garde, octobre 2017)
