KUKWE JA TÖTIKARA 59
Ja mikai mä rüere akwa mä raba kä ngwen nüke jai
Ni kristiano jökrä tä ja tuin ja mikata rüere yebe, ¿ye rabadre ni ngwen nikenkä?
1. ¿Ja mikata ni rüere ye ñobätä ñan ni töi mike niä?
Bibliata niere metre: “Nire nire tö nünai kuin deme Kristo Jesukrä abko käkwe ja tare nikadi” (2 Timoteo 3:12). Jesús ñaka kä Satanakwe ne ngätäite ye medenbätä rüe nakaninkä. Nita ja ngwen niara erere, aisete gobrantre aune iglesia ngwarbe tä ja mike ni rüere, ye ñan ni töi mike niä (Juan 15:18, 19).
2. ¿Ja mikai ni rüere ye kräke ni raba ja mike ño juto?
Nengwane ni rabadre tö ngwan Jehovai ye mike bäri dite. ¿Ye nuain raba ño? Köbö kwatire kwatire kä diandrekä jai orakäre, ñäkäkäre Bibliabätä aune nändre käre gätäbätä. Kukwe ne käkwe ja di biain mäi ja tuakäre ja mikadi mä rüere yebe o mä mräkätre mäkwe käkwe ja mikadi mä rüere yebe. Bä kabre ja mikani apóstol Pablo rüere, niarakwe tikani: Jehová “abko ti die mikaka” aisete tikwe ñan kä jürä ngwain jabätä (Hebreos 13:6).
Arato, kukwe driedre käre ye käkwe ni dimikai ñan kä jürä ngwen jabätä. Kukwe drie ye tä ni dimike tö ngwen bäri Jehovai aune ñaka nitre jürä ngwen jabätä (Proverbios 29:25). Nengwane mä ñan kä jürä ngwain jabätä ngwane, gobrantre käkwe kukwe drie ñäkädi ngwane, mä täi juto biare kukwe driekäre jankunu (1 Tesalonicenses 2:2).
3. ¿Ja mikata ni rüere yebe kä ngwanta nüke jai ye tä kukwe kwin mike bare?
Nitre ja mikadre ni rüere yei ni ñan tö. Akwa, ja mikata ni rüere ye nita ganainne ngwane, tödeka nikwe tä nemen bäri dite. Aune, ni di ñan tärä nemen nänkäre ja käne ngwane Jehovata ni dimike tä tuin nie ye köböire jata nemen ruin bäri ken nie (mäkwe ñäkä Santiago 1:2-4 yebätä). Nita ja tare nike ye nemen tare Jehovai, akwa nita kä ngwen nüke jai ye tä kä mike jutobätä. Bibliata niere: “Kukwe kwin nuainbätä ni ngwanta ja tare nike akwa kä ngwanta nüke jai ye tä mate kwin Ngöböbätä” (1 Pedro 2:20, TNM). Ni kä ngwanka nüke jai aune ja ngwanka metre yei Jehovakwe ja nire käre biain, yete ni ja mikaka kukwe metre rüere ñan täi (Mateo 24:13).
JA TÖTIKE BÄRI NGUSETA
Ja mikata ni rüere yebiti ta ja ngwan raba metre Jehovai ye kukwe ruäre tä mike gare yebätä ani ja tötike. Aune nita ja ngwen metre ie ye köböire dre kwin nuaindi kwe ni kräke ye ani mike gare jai arato.
4. Mä rüeta nakainkä gwi akwa mä raba ja ngwen metre
Ni mräkä ruäre ñan tö rabai ni tuai Jehová mike täte ye nämäne gare kwin Jesús ie. Ñäkädre Mateo 10:34-36 yebätä aune kukwe ne kädriedre jabe:
-
Ni iti tä ja töi mike Jehová mike täte ngwane, ¿ye raba mate ño mräkätrebätä?
Nitre ruäre käkwe ja tuani kukwe ne erere ben ye mikakäre gare jai. VIDEO mikadre ñärärä, biti kukwe ne kädriedre jabe:
-
Mä mräkä o ja ketamuko mäkwe käkwe mä töi mikadre ñan Jehová mike täte jankunu ngwane, ¿mäkwe dre nuaindre?
Ñäkädre Salmo 27:10; Marcos 10:29, 30 yebätä aune kukwe ne kädriedre jabe:
-
Mä mräkä o ja ketamuko mäkwe ja mikadre mä rüere ngwane, ¿kukwe käbämikata nete ne raba mä dimike ño?
5. Ja mika mä rüere akwa mä Jehová mika täte jankunu
Jehová mikabätä täte ja mikata ni rüere ngwane, tä nemen ja ngwandre dite nie. VIDEO mikadre ñärärä, biti kukwe ne kädriedre jabe:
-
¿Kukwe meden video nete tä mä dimike?
Ñäkädre Hechos 5:27-29; Hebreos 10:24, 25 yebätä aune kukwe ne kädriedre jabe:
-
Gobran käkwe kukwe drie aune gätä ye ñäkäidre nie ngwane, ¿ñobätä ütiäte krubäte nikwe Jehová mikadre täte jankunu?
6. Jehovakwe mä dimikai kä ngwen nüke jai
Ni testiko Jehovakwe umbre, bati, monsore, nünanka juta jene jene te rüere ja mikata, akwa tätre ja ngwen metre Jehovai. Ño tätre nuainne mikakäre gare jai. VIDEO mikadre ñärärä, biti kukwe ne kädriedre jabe:
-
¿Dre käkwe nitre testiko ne dimikani kä ngwen nüke jai?
Ñäkädre Romanos 8:35 aune 37-39; Filipenses 4:13 yebätä aune kukwe ne kädriedre jabe:
-
¿Kukwe ben mä ja tuai akwa kä rükai mäi ye texto ne tä mike gare ño mäi?
Ñäkädre Mateo 5:10-12 yebätä aune kukwe ne kädriedre jabe:
-
Ja mikai mä rüere, ¿akwa ñobätä mä raba nüne jankunu kä jutobiti?
Ni Jehová mikaka täte kwati krubäte rüere ja mikata, akwa tätre kä ngwen nüke jai. ¡Ye erere mä raba kä ngwen nüke jai!!
NITRE RUÄRE TÄ KUKWE NE NIERE: “Ja mikadre ti rüere ngwane, kä ñan rüka tie tä nemen ruin tie”.
-
¿Texto Bibliabätä meden raba tö ngwan ribeta jai ye mike bäri dite?
¿DRE NIBI GARE MÄI?
Ja mikata ni rüere yebiti ta nita ja di ngwen Jehová mikakäre täte ye ütiäte krubäte Jehová kräke. Niara diebiti ni raba ja tuin ja mikata ni rüere yebe.
Ngwankäreta törö
-
¿Ni kristiano rüere ja mikata ye ñobätä ñaka rabadre töi mike niä?
-
¿Mä raba ja mike ño juto nengwane ja mikadi mä rüere ye kräke?
-
Kukwe ño ben mä ja tuai akwa yebiti ta mä ja ngwain metre Jehovai, ¿ye dre tä mike gare metre mäi?
KUKWE MIKE GARE BÄRI JAI
Monso bati kitani ngite ja ngwanbätä neutral ye Jehovakwe dimikani ño ye mike gare jai.
Ni ja mäkäninte rüere ja mikani kä kwati te, akwa dre käkwe dimikani ja ngwen metre Jehovai ye mike gare jai.
Ja mikai mä rüere yebe mä raba ja tuin ño ye mike gare jai.
“Ni rüe rakadrekä ye känenkri ni tädre juto biare” (Ni Mikaka Mokre, julio 2019)
¿Ni mräkä tä ja mike ni rüere yebätä dre tädre gare nie? ¿Aune ño ni raba kä jäme känene aune ja ngwen metre jankunu Jehovai?
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
