LEKSION 59
Maattammammu i Pameppersigi
Meparubang i ngamin nga Cristiano ta pangokkontra, anna pameppersigi. Maganassing ittam kari megafu tatun?
1. Ngatta mapersigi ittam?
Kagian na Biblia: “Madara-darum ngamin i maya ta attolay nga mekunnay ta Dios ta ketadday da kani Cristo Jesus.” (2 Timoteo 3:12) Napersigi si Jesus megafu ta ari yayya nga parte na mundo ni Satanas. Ari ittam gapa nga parte na mundo, yari tu persigian ittam na gobiernu ira anna relihioso ira nga organisasion.—Juan 15:18, 19.
2. Anni i kuattam tapenu marubattam i pameppersigi?
Pasikannattam ngana sangawe i pattalo tam kani Jehova. Egga nakuan i tiempo tam kada aggaw nga makimallo anna mabbibbig tu Uvovugna. Regular ittam nga magatende ta study. Yaw ira i mangiyawa nittam tu sikan tapenu magutu nga arubangan i kapeppersigi, maski paga nu kafamilia tam mismu i mameppersigi nittam. Neparubang gapa ta aru nga pameppersigi si apostol Pablo, ngem kinagina: “I Yafu i manguffun niakan, awan tu ek-ku nga paganassingan.”—Hebreo 13:6.
Mas maggutu ittam nu regular ittam nga mallayyagayya. Uffunan ittam na pallayyagayya nga mattalo kani Jehova anna malabanan i paganassing ta tolay. (Proverbio 29:25) Nu magutu ka nga mallayyagayya sangawe, magutu ka lagapa nga makapallayyagayya maski nu igamma na gobiernu i trabahu tam.—1 Tesalonica 2:2.
3. Anni i benefisiona nu attammattam i pameppersigi?
Ariattam kayà i mapeppersigi, ngem nu maattammattam yatun, massikan i pangurug tam. Egga gapa ira i tiempo nga matageno tam nga ariattam ngana makaya. Ngem mas maddukko ittam kani Jehova megafu ta uffunanna ittam. (Bibbigan i Santiago 1:2-4.) Matakitan si Jehova nu mazziga-riga ittam, ngem magayayya yayya nu magattam ittam. Kagian na Biblia: “Nu attamman nu i kaziga-riga megafu ta mapia nga kingngua nu, bendisionan nakamu na Dios.” (1 Pedro 2:20) Nu mattalupaddiattam nga matalo, iyawa nittam ni Jehova i mannanayun nga inango ta napabagu nga mundo anna awan ngana tu mamersigi nittam.—Mateo 24:13.
GIGIAMMUAN I ARU PAGA
Ammuan nu kunnasi ittam nga mattalupaddian nga matalo kani Jehova maski nu mapeppersigi ittam, anna nu kunnasina ittam bendisionan.
4. Mawayyam attamman i pangokkontra na kafamiliam
Ammu ni Jesus nga manaki na karuan nga kafamilia tam nga masserbi ittam kani Jehova. Bibbigan i Mateo 10:34-36, anna paguvovugan yaw nga pakkiavu:
-
Anni i awayya nga kagian onu kuan na kafamilia tam nu masserbi ittam kani Jehova?
Girawan i VIDEO tapenu masingan i tadday nga angngarigan, anna paguvovugan i tumunug nga pakkiavu.
-
Anni i kuammu nu kokkontran naka na tadday nga kaparientes onu kofummu megafu ta passerbim kani Jehova?
Bibbigan i Salmo 27:10 anna Marcos 10:29, 30. Kabalin nga mabibbig i kada teksto, paguvovugan yaw nga pakkiavu:
-
Kunnasi nga makoffun nikaw yaw nga promesa nu kokkontran naka na kafamiliam onu kokkofummu megafu ta passerbim kani Jehova?
5. Ari ka magimmang ta paddayaw kani Jehova maski nu mapeppersigi ka
Kawagan i gutu ta passerbi kani Jehova mas ngana nu purueban na tanakuan nga pagimmangan ittam. Girawan i VIDEO, anna paguvovugan i tumunug nga pakkiavu.
-
Kunnasi ka nga napagaram ta ekspiriensa ira?
Bibbigan i Kingngua 5:27-29 anna Hebreo 10:24, 25. Kabalin nga mabibbig i kada teksto, paguvovugan yaw nga pakkiavu:
-
Ngatta importante nga ariattam magimmang ta paddayaw kani Jehova maski nu igamma na gobiernu i pallayyagayya onu pagistudy tam?
6. Uffunan naka ni Jehova nga magattam
Ta interu mundo, matalo nga massesserbi kani Jehova i Saksi ira maski nu mapeppersigi ira. Girawan i VIDEO tapenu masingan nu anni i nakoffun nira. Kabalinna, paguvovugan yaw nga pakkiavu:
-
Ta video, anni i nakoffun ta Saksi ira tapenu makapagattam?
Bibbigan i Roma 8:35, 37-39 anna 2 Corinto 4:7. Kabalin nga mabibbig i kada teksto, paguvovugan yaw nga pakkiavu:
-
Segun ta teksto, kunnasim maattamman i kapurueba ira?
Bibbigan i Mateo 5:10-12, anna paguvovugan yaw nga pakkiavu:
-
Ngatta magayayya ka maski nu mapeppersigi ka?
Nakapagattam i minillion nga maddayarayaw kani Jehova. Makapagattam ka gapa!
I KAGIAN NA KARUAN: “Ariakku maattamman i kapeppersigi.”
-
Anni ira nga teksto i usammu tapenu mapasikan ira?
ANNI I NAGIGIAMMUM?
Tagibaloran ni Jehova i pappursigi tam nga passerbian yayya maski nu mapeppersigi ittam. Uffunanna ittam nga makapagattam!
Review
-
Ngatta mapeppersigi i Cristiano ira?
-
Anni i makuam sangawe tapenu makapagattam ka nu meparubang ka ta kapeppersigi?
-
Anni i makoffun tapenu ari ka magimmang ta passerbi kani Jehova maski nu egga ira i kapurueba?
I AWAYYAM PAGA KUAN
Girawan i pangistoria na tadday nga kabataan nu kunnasi yayya nga inuffunan ni Jehova tapenu makapagattam turi ta nefuku yayya megafu ta pattalupaddianna nga neutral.
Girawan nu kunnasi nga matalo nga nakapasserbi kani Jehova i tadday nga magatawa ta piga nga ragun maski nu egga pameppersigi.
Ammuan nu kunnasi ka nga mabbalin tu magutu nu mapeppersigi ka.
“Mapprepara Ka Ngana ta Panara-darum” (Passifusifutan, Hulio 2019)
Anni i kuattam nu kokkontran ittam na kafamilia tam, anna kunnasi tam nga mapattalupaddian i memammo nga relasiottam nira anna i kinamatalo tam kani Jehova?
“‘Ari tu Imammo’ i Irattal na Kinakurug, ‘Nu Ari Espada’” (Passifusifutan, Oktubre 2017)
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
