ANG ỌJẸ́JẸ 59

À ka Jẹ́-ẹ Godayị Giri-giri ẹ-Ẹpwụ nya Ọtụpyịpyị

Ọtụpyịpyị ja chị Angịnyị nya ịKịrayịsị wuu ọgụ ụka ọhẹ wẹẹ. Ọọwa ka chị uhi juhi?

1. Ịyẹ tị́ du kahị ka yahị guru gbe ọtụpyịpyị?

ỊBayịbụụ ya jehi kpụrụrụ yẹkẹẹ: “Angịlẹ wuu kị juwa tịtọ kị ka la ọhịhị nya ọngịnyị nya Ohe Oluhye oriri ọlẹ ẹ-ẹpwụ nya ịKịrayịsị iJisọsị lẹ aalẹ, ị ka la ọ-tụ pyịpyị pyii lẹ.” (2 iTimoti 3:12) Ị tụ́ iJisọsị pyịpyị chajị ó ri ụpa nya odehe nya Olegu Onyobyi ka. Áhị ri ụpa nya odehe ka ịnyịnyị, lẹ ọ́ kaa lahị ẹbyẹbyị ụka ká eji ọkpakpa bala ogu nya ịgba ọgbagba nya odehe á tụ́ụhị pyịpyị ka.—ỊJọn 15:18, 19.

2. Ányị ahị tị́ ka bwu nwụlanọ gbe ọtụpyịpyị?

Ahị baba nyọka ju ahị ọ-dahile nyahị ẹ-ẹga nya iJihova ọngịrị lẹẹlẹẹ. Hu ụka nọ ẹnụ myị́ ẹnụ nyọka raabwọ họọ bala ọ-ka wa Omyi Ẹla nyamwụ. Ka ọjịra-jịra ọnyị myị́ ọnyị. Ang ịwẹ wuu ka ya ọngịrị ọlẹ ká baba hang nyọka godayị giri-giri la ugbodu ojuju ụka nya ọtụpyịpyị, kori kọ dọmwụ bwu ẹga nya ugbiyegu nyang wẹwẹ. Ọlẹrụ ịPọlụ, kị tụ́ pyịpyị ụka lụmẹ-lụmẹ, yẹkẹẹ: “Ọngọlahị Ohe Oluhye a ri Ọngọ da ụbwọ nyam lẹ. Chajị nya ọọwa lẹ, ḿ ka juwa juhi kpong-kpong kaka.”—Ala iHiburu 13:6.

Ahị ka jẹ́-ẹ ju ugbodu ojuju nyahị ọngịrị bwula ọ-kpa ẹrụ ọnyịịla pyẹ hyaahyaa. Ẹrụ ọnyịịla ọ-kpa pyẹ kaa mẹjẹ́ẹhị nyọka dahịhile iJihova bala ọ-ka kụrụ uhi nya ọngịnyị ehe ojuju. (Etu 29:25) Kori ká la ugbodu ojuju nyọka ya ẹrụ ọnyịịla lẹẹlẹẹ, ọọwa ka nwụlang nọ nyọka ya ẹrụ ọnyịịla kori ká eji ọkpakpa á dọmwụ maga nyọka huhi abwọ la ụkụrwọ ọwẹ ọhọhọ.—1 Ala ịTẹsalonika 2:2.

3. Apyobwuna oyina ahị tị́ ka yé kori kahị godayị giri-giri ẹ-ẹpwụ nya ọtụpyịpyị?

Ịlẹhị lẹ, ọtụpyịpyị á kaa kpụhị ịpyọ ka, ma ụka kahị bọhụ ẹ-ẹpwụ nyamwụ, ọmyịmyị nyahị kaa la ọngịrị gụ olene. Ahị kaa ju iJihova chwẹẹ gụ ọwọwa ịnyịnyị chajị ọ dahị ụbwọ ụka kahị me nyori áhị la ọngịrị nwà ka. (Wa iJemsi 1:2-4.) Ọ kaa jụ iJihova ụka kahị juwa yẹ akama, ma ọ tị kaa kpọọ ịpyọ ụka kahị jẹ́ bọhụ pwụ́ ọbaba. ỊBayịbụụ yẹkẹẹ: “Ọ́ tị ri kọ ri ang ọnyịịla kanụ juwa họ kem, kị tị juwa yẹnụ akama ododu, kanụ wẹẹ la ugbodu ojuju ẹ-ẹpwụ nyamwụ aalẹ, Ohe Oluhye ayịdang tịtị ka wahị ọnyịịla hanụ o-oluhye nya ọọwa.” (1 iPita 2:20) Kori kahị godayị giri-giri ha iJihova pwụ́ ọbaba, ọ ka nwụhị uri la ọhịhị ọmyịmyị-ka odehe onyeewe. Angịlẹ kị ka juwa wuu ka ri angị gbịgba ha iJihova lẹ, ọngọngọhẹ-ẹ́ ka tụ́ụhị pyịpyị kaka.—ỊMatiyu 24:13.

JẸ́ GỤ ỌỌWA

Jẹ́ ang odudu kọ chịkpẹẹ nyọka godayị giri-giri ha iJihova ụka kị tụ́ụhị pyịpyị bala abwọlẹ ká iJihova ka nwụhị uri chajị nya ọọwa.

4. À ka jẹ́-ẹ kụrụ ọtụpyịpyị o-bwu ugbiyegu

IJisọsị jẹ́ ene nyori angịhyẹ ugbiyegu nyahị-ị́ ka tịtọ kahị ka gbịgba ha iJihova ka. Wa ịMatiyu 10:34-36, kanụ ya ẹla u-uhye nya ịtọ ẹla ọlẹ:

Ịyẹ à tị́ ka họ myị́ ụka ká ọngọhẹ ẹ-ẹpwụ nya ugbiyegu-ú cheje nyọka gbịgba ha iJihova?

Nyọka yẹ ọ-chụ pwokwita ọhẹ, yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.

IFIM: IJihova Kpẹhị Rịrịịhị (5:13)

Ịyẹ a tị́ ka họ kori ká alugbiyegu nyang lee oligu nyang ọhẹ á maga nyọka hung abwọ hi ịgba ọgbagba nya iJihova?

Wa Eje Ọnyịịla 27:10 bala ịMakị 10:29, 30. Ụka kanụ wa ụpwụ ịgọgọ ọnyọnyọọnyị kpá, anụ ya ẹla u-uhye nya ịtọ ẹla ọlẹ:

Ányị ehe ọchịchị ọwẹ à tị́ ka dang ụbwọ kori ká alugbiyegu lee oligu nyang á ja maga nyọka hung abwọ hi ịgba ọgbagba nya iJihova?

5. Ọtụpyịpyị a hung abwọ la ọ-gbịgba ha iJihova ka

Ahị baba nya ugbodu ojuju nyọka kịnyaa la ọ-ka gbịgba ha iJihova kori ká angịkịla-á tịtọ nyọka huhi abwọ. Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.

IFIM: Ugbodu Ojuju ẹ-Ẹpwụ nya Ọtụpyịpyị (6:27)

Ụgbẹyị oyina oja nya angị ịlẹpwụ nya ifim ịwẹ à tị́ jung ọngịrị?

Wa Ụkụrwọ nya Alẹrụ 5:27-29 bala Ala iHiburu 10:24, 25. Ụka kanụ wa ụpwụ ịgọgọ ọnyọnyọọnyị kpá, anụ ya ẹla u-uhye nya ịtọ ẹla ọlẹ:

Ịyẹ tị́ du kahị baba nyọka kịnyaa la ọ-ka gbịgba ha iJihova kori kị dọmwụ hile ẹrụ ọnyịịla ọ-kpa pyẹ bala ọjịra-jịra nyahị?

6. IJihova ka dang ụbwọ nyọka godayị giri-giri

Ụpa nya odehe ịdatị-datị, anjwo tụ́ angịgbahị nya Alibeenu nya iJihova kaa kịnyaa ẹ-ẹpwụ nya ịgba ọgbagba nya iJihova, tụ́ ụka kị taa pyịpyị. Nyọka yẹ ang ọlẹ kọ daa ụbwọ, yẹ IFIM ọwẹ, kanụ ya ẹla u-uhye nya ịtọ ẹla ọlẹ:

IFIM: IJihova ka Ya Ọngịrị Ham (3:40)

Ẹ-ẹpwụ nya ifim ọwẹ, ịyẹ à tị́ da Alibeenu nya iJihova ịwẹ ụbwọ?

Wa Ala iRom 8:35, 37-39 bala Ala iFilipayị 4:13. Ụka kanụ wa ụpwụ ịgọgọ ọnyọnyọọnyị kpá, anụ ya ẹla u-uhye nya ịtọ ẹla ọlẹ:

Ányị ụpwụ ịgọgọ ọwẹ à tị́ mẹjẹ́ng nyori à ka jẹ́-ẹ godayị giri-giri ẹ-ẹpwụ nya ọmayẹ ọnyị myị́ ọnyị?

Wa ịMatiyu 5:10-12, kanụ ya ẹla u-uhye nya ịtọ ẹla ọlẹ:

Ịyẹ tị́ du ká ka jẹ́-ẹ chị ọkẹkẹnị kori kị dọmwụ juwa tụ́ng pyịpyị?

Uku ịmanyị tị́ nya anchẹ nya iJihova jẹ́ godayị giri-giri ẹ-ẹpwụ nya ọtụpyịpyị. Ahụ ka jwọọ họ ịnyịnyị!

ANGỊHYẸ KAA YẸKẸẸ: “Ḿ ka jẹ́-ẹ godayị giri-giri ẹ-ẹpwụ nya ọtụpyịpyị ka.”

Ụpwụ ịgọgọ oyina à tị́ ka jẹ́-ẹ ya ahị ọdahile haa?

ẸLỊYẸ A TỊ́ JẸ́?

Ọ kaa myị̀ iJihova lẹhị kori kahị kịnyaa la ọ-ka gbịgba họọ ẹ-ẹpwụ nya ọtụpyịpyị. Ahị ka jẹ́-ẹ godayị giri-giri bwula ụbwọ ọdada nyamwụ!

Ẹlịyẹ A Tị́ Yụbwọ Chị?

Ịyẹ tị́ du ká Angịnyị nya ịKịrayịsị ka yahị guru gbe ọtụpyịpyị?
Ịyẹ a tị́ ka jẹ́-ẹ họ lẹẹlẹẹ nyọka nwụla ịlọng nọ gbe ọtụpyịpyị?
Ịyẹ à tị́ ka jẹ́-ẹ dang ụbwọ nyọka dahịhile nyori à ka jẹ́-ẹ gbịgba ha iJihova ẹ-ẹpwụ nya ọtụpyịpyị?

Ahyẹẹnụ ọlẹ ká ang ọjẹ́jẹ ọlẹ cheju:

Ụkụrwọ ọlẹ á ka họ

Tọ ọọnahị ọhẹ wo: “Ọngọhẹ maga nyọka hung abwọ hi ịgba ọgbagba nya iJihova ẹnẹnẹhẹ lẹ? Ịyẹ a tị́ họ nyọka jẹ́-ẹ kịnyaa la ọ-ka gbịgba ha iJihova?”

Ọkịla:

Ụkụrwọ ọkịla ọlẹ á ka họ