ILUẸMHIN 59
Uwẹ Dẹ Sabọ Ziẹngbe Ekpokpo
Lẹn sẹbhọ ghe, mhan ha zẹ nin mhan rẹ ga iJehova, ẹbho dẹ de imhan idobolo. Ele bhọ sabọ ha kpokpo mhan. Ọ be khẹke nin ọnan re ofẹn ha mun mhan?
1. Be imhan rẹ lẹn yẹ ghe mhan dẹ miẹn ekpokpo?
Baibo ji mhan lẹn ghe, “ọrebhe ne guanọ nin ele re iẹnlẹn nọnsele rẹ ha ga Osẹnobulua beji Jesu Kristi lu, dẹ yẹ miẹn ekpokpo.” (2 Timothy 3:12) Ranmhude Jesu bha deba ibo ọsi ọne agbọn nan, ẹbho da wo ha kpokpo ọle. Bọsi Jesu, mhan bha deba ibo ọsi ọne agbọn nan. Ọnan zẹle nọn bha da han mhan ilo ghe, ene gbẹloghe bi otu oga ohoghe kpokpo mhan.—John 15:18, 19.
2. Be imhan ha rẹ muegbe ọbhi otọ khẹ ekpokpo yẹ?
Ọkhẹke nin mhan ziẹn urẹọbhọ nin mhan mhọn da iJehova bhi ejayenan nian. Ukpẹdẹ-ukpẹdẹ, ha re ẹghe ọbhi otọ rẹ nan erọnmhọn ji ọle, yẹ ha tie iBaibo. Sẹyẹ, ha yo ikolo oga ẹghe rebhe. Ene emhin nan dẹ re ahu bi izebhudu nin uwẹ rẹ ziẹngbe ekpokpo nọn hi ki rẹ khin, aharẹmiẹn ghe, obọ ene ribhi azagba-uwa nọnsẹ ọne ekpokpo na vae. Paul nin odibo, nọn wo manman miẹn ekpokpo bhi egbe da yọle: “Jehova hi urẹkpa nọnsẹmhẹn, mẹn ida ha mun ofẹn.”—Hebrews 13:6.
Iwẹnna itẹmhọn Osẹnobulua dẹ yẹ sabọ rẹkpa mhan rẹ ha mhọn izebhudu. Beji mhan rẹ lu ọne iwẹnna nan ẹghe rebhe, mhan ki ha luẹ ebi a rẹ mun udu nyan iJehova yẹ. Bhiriọ, ofẹn eria ida yẹ ha mun mhan. (Proverbs 29:25) Ahamiẹn mhan sabọ guẹ ebi a rẹ re izebhudu tẹmhọn Osẹnobulua yẹ bhi ejayenan nian, mhan dẹ yẹ ha mhọn izebhudu rẹ sẹyẹ ha tale, aharẹmiẹn ene gbẹloghe yọle nin mhan hẹi yẹ tale.—1 Thessalonians 2:2.
3. Elele nela mhan ha miẹn bhọ sade mhan sabọ ziẹngbe ekpokpo?
Bhi ọsi ẹmhọanta, ekpokpo iti mhan bhọ. Ọkpakinọn, mhan ha sabọ ziẹngbe ekpokpo, urẹọbhọ nọnsẹmhan ki manman deziẹn. Mhan ki yẹ manman dọ sikẹ iJehova, ranmhude, mhan daghe uwedẹ nin ọle rẹ rẹkpa mhan rẹ ziẹngbe ọne ekpokpo. (Tie James 1:2-4.) Ọ manman ba iJehova bhi egbe sade ọle daghe ẹbho kpokpo mhan. Ọkpakinọn, ọ manman re ọle ghọnghọn sade mhan sabọ ziẹngbe ọne ekpokpo. Baibo yọle: “Ahamiẹn uwẹ ziẹngbe oya ranmhude emhin esili nin uwẹ lu, ọ manman ti Osẹnobulua bhọ.” (1 Peter 2:20) Mhan ha ziẹngbe sotọ, Jehova dẹ re iẹnlẹn ọsi ighegheghe bhi agbọn ọsọgbọn rẹ re ihaosa nin mhan. Bhi ọne agbọn ọsọgbọn nin, ọria soso iyẹ da ha de mhan idobolo bhi oga nin mhan ga iJehova.—Matthew 24:13.
MANMAN LẸN OTỌLE NỌNSẸN
Luẹ ebezẹle nin uwẹ ha da sabọ rẹọbhọ ghe, uwẹ dẹ sabọ sun rẹkhan iJehova aharẹmiẹn a kpokpo ẹ. Yẹ luẹ elele nin uwẹ ha miẹn bhọ sade uwẹ ziẹngbe ekpokpo.
4. Uwẹ dẹ sabọ ziẹngbe ekpokpo bhi ẹkẹ azagba-uwa
Jesu ji mhan lẹn ghe, ahamiẹn mhan zẹ nin mhan rẹ ga iJehova, asabọmiẹn ene ribhi azagba-uwa nọnsẹmhan ida re obọ bhọ. Tie Matthew 10:34-36, bha ha zilo nyan ọne inọnta nan:
-
Be ha sabọ sunu sade ọria zẹ nin ọle rẹ ga iJehova?
Nin uwẹ rẹ daghe ijiẹmhin ọkpa nọn re ọnan man, ghe ọne IVIDIO, bha ha zilo nyan inọnta nọn rẹkhan ọlẹn.
-
Be uwẹ ha lu yẹ sade ọmọẹ ẹ, la ọria bhi azagba-uwa nọnsẹ yọle nin uwẹ hẹi yẹ ga iJehova?
Tie Psalm 27:10 bi Mark 10:29, 30. Bha ha tie ene Baibo fo, re ọne inọnta nan rẹ zilo nyan ene iBaibo kẹkẹ:
-
Be ọne ive nan ha rẹ rẹkpa uwẹ yẹ sade ọmọẹ ẹ, la ọria bhi azagba-uwa nọnsẹ de idobolo ọbhi oga nin uwẹ ga iJehova?
5. Sẹyẹ situa ha ga iJehova aharẹmiẹn ghe ẹbho kpokpo ẹ
Izebhudu dẹ rẹkpa mhan rẹ ha ga iJehova aharẹmiẹn ghe, ẹbho de idobolo ọbhi oga nọnsẹmhan. Ghe ọne IVIDIO, bha ha zilo nyan inọnta nọn rẹkhan ọlẹn.
-
Be ijiẹmhin nan rẹman bhi ọne ividio nan rẹ re izebhudu nin uwẹ yẹ?
Tie Acts 5:27-29 bi Hebrews 10:24, 25. Bha ha tie ene Baibo fo, re ọne inọnta nan rẹ zilo nyan ene iBaibo kẹkẹ:
-
Bezẹle nin mhan ha da sẹyẹ ha ga iJehova, aharẹmiẹn ene gbẹloghe yọle nin mhan hẹi yẹ lu iwenna itẹmhọn Osẹnobulua la do ikolo oga?
6. Jehova dẹ rẹkpa uwẹ rẹ ziẹngbe ekpokpo
Esali Jehova bhi ije kẹkẹ bhi otọ agbọn nan rebhe sẹ wo miẹn ekpokpo bhi egbe. Ọrẹyiriọ, ele sẹyẹ wo ha ga iJehova nọnsẹn. Nin uwẹ rẹ daghe ebe rẹkpa ele, ghe ọne IVIDIO. Bha ha ghe ọle fo, bha ha zilo nyan ọne inọnta nan:
-
Be rẹkpa ibhio mhan nan rẹman bhi ọne ividio rẹ ziẹngbe ekpokpo nin ele miẹn bhi egbe?
Tie Romans 8:35, 37-39 bi Philippians 4:13. Bha ha tie ene Baibo fo, re ọne inọnta nan rẹ zilo nyan ene iBaibo kẹkẹ:
-
Be ọne iBaibo nan rẹ rẹkpa uwẹ lẹn yẹ ghe, uwẹ dẹ sabọ ziẹngbe ekpokpo nọn hi ki rẹ khin?
Tie Matthew 5:10-12, bha ha zilo nyan ọne inọnta nan:
-
Be ha sabọ rẹ mhan ha ghọnghọn, aharẹmiẹn a kpokpo mhan?
Esali Jehova ne bunbun sẹ wo ziẹngbe ekpokpo. Uwẹ dẹ yẹ sabọ ziẹngbe ekpokpo!
ẸBHO ESO SABỌ YỌLE: “Mẹn ida sabọ ziẹngbe ekpokpo.”
-
Ejela bhi Baibo uwẹ ha tie man ele nin uwẹ rẹ re izebhudu nin ele?
EBI MHAN LUẸLE
Ọ manman ti Jehova bhọ sade mhan dọnmhegbe sẹyẹ ha ga ọle aharẹmiẹn a kpokpo mhan. Ọle dẹ rẹkpa mhan rẹ ziẹngbe ekpokpo.
Uwẹ Be Yẹ Yere?
-
Be re iKristiẹn lẹn ghe, ele dẹ miẹn ekpokpo?
-
Be uwẹ ha lu bhi ejayenan nian, nin uwẹ rẹ muegbe khẹ ekpokpo?
-
Be re uwẹ rẹọbhọ ghe, uwẹ dẹ sabọ ga iJehova nọnsẹn aharẹmiẹn uwẹ miẹn ekpokpo bhi egbe?
FẸ ENE EMHIN NAN GHE
Bhi ọne ividio nan, uwẹ dẹ daghe obhio mhan ọkpa nọn tẹmhọn ebi Jehova rẹ rẹkpa ọle ziẹngbe yẹ, ẹghe nan rẹ mun ọlẹn khue ranmhude ọle bha ka deba ibo.
Luẹ ebe rẹkpa okhuo bi ọdọ ọkpa rẹ ga iJehova nọnsẹn bhi ikpe ne bunbun arẹmiẹn ghe ele miẹn ekpokpo bhi egbe.
Luẹ ebe ha rẹkpa uwẹ rẹ ha mhọn izebhudu ahamiẹn uwẹ miẹn ekpokpo bhi egbe.
Ẹlo nela ọkhẹke nin mhan rẹ ha ghe ene ribhi azagba-uwa nọnsẹmhan sade ele kpokpo mhan? Sẹyẹ, be imhan ha lu nin mhan rẹ khu ọbhi ọfure, yẹ ha ga iJehova nọnsẹn?
“Ẹmhọanta Dẹ Sabọ Re Uwẹ Miẹn Ekpokpo” (The Watchtower, October 2017)
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
