LISHOMO 59
Wako unkuulula kupililila kupapatigwa
Ata pakatima, Vaklistu uti vankuulula kupingigwa, na mpaka kupapatigwa. Shinu ashi shinkuulula kututadya kujopa?
1. Mwaa shani tunkulindila kupapatigwa?
Ibibiliya inkushidoni: “Kwakutangola mwiu kula álota kunama shinamilo shakunjopa Nnungu nkati mumwe Klistu Yesu, andapapatigwa.” (2 Timoti 3:12) Yesu Klistu andípapatigwa kwamwaa nae hashitenda imbande ya shilambo shimwe Shatwani. Na wetu momo hatunatenda shinu imbande ya shilambo ashi, ndyomana hatunashanga tukapapatigwa kwa vamadalaka na didini dya nshilambo.—Nshuwau 15:18, 19.
2. Tulota kulipanganianga dashi ukanava kuwika wakati wakupapatigwa?
Ituvaikidile tunanowange likulupililo lyetu kumwe Yeova. Umya wakati kula liduva pakulota ushwali na ushomye Ibibiliya. Pagwa ngwengwe ku mikutano vya pashipinga. Vinu avi uti vindakupa dimongo pakulota upililile kupapatigwa na ntima shii, ata ikava kenga unkupapatigwa na valikola vako. Myombe Paulu, andipitila kupapatigwa namene, ndyomana andyaandíka aashidoni: ‘Yeova ni lipwashalelo lyangu, Hangujopa.’—Vabalaniya 13:6.
Inamuna inji yakwanjedya kuvanavo ntima shii, ni kupagwa ngwengwe ku kwandadya ntenga. Kwandadya kunanjedya likulupililo lyetu kumwe Yeova na kunatupwashela mene kujopa. (Mikong’o 29:25) Tukavanavo ntima shii pakulota kwandadya ntenga ambi apa, tunalipanganianga pakulota kuka mushu twandadya ntenga ata vamadalaka vakatuleya.—1 Vateshalonika 2:2.
3. Mwaa shani tukapililila kupapatigwa kunatupwashela?
Hapali munu kunannagwela kupapatigwa, kanji wetu tukapililila kupapatigwa, likulupililo lyetu lindava lyakunanopa. Tunammandika namene Yeova kwamwaa wa vyakupitila vitukodya, vinatupa dimongo muwakati watwona kenga hatulula kavili. (Shomya Tiyagu 1:2-4.) Yeova andava na shipalodi muwakati watuvauvanga, kanji nae andapuwanga namene patwona tuka mushu tupililila. Ibibiliya inkushidoni: “Kanji ikava kenga mwenu munkulipililila muvauvanga, mukutandedya wambone, shitendo ashi ni shakutumbyangilika pamevo pake Nnungu.” (1 Patulu 2:20) Yeova andilivikila kuvapa shingumi shíkamalilika uti avalá valota kupililila kupapatigwa mpaka kumwisho.—Mateu 24:13.
LAMBELA KUMANYA VYOE
Manya mwaa shani tunkuulula kukulupilika kumwe Yeova ata tukapapatigwa, lola momo dinudyo dyatulota kupata kwamwaa wakutenda davo.
4. Wako unkuulula kutema kupapatigwa kwa palikola
Yesu andímanya kenga valikola havauka shinu ngwengwe ndalota wetu tuntumikile Yeova. Shomya Mateu 10:34-36, na badae mwambangile mwaa shakudya sha mwina:
-
Shilota kutandeka nyamani mulikola jumo akamuwa kuntumikila Yeova?
Pakulota wone mpano awo, lola VIDEO, na badae mwambangile mwaa shakudya sha mwina.
-
Ulota kutenda nyamani ikava kenga mulikola au mbodi wako hanalota shinu wako untumikile Yeova?
Shomya Dimu 27:10 na Malukushi 10:29, 30. Baada yakushomya kula lyaandiko, ambangila mwaa shakudya sha mwina:
-
Shakulivikila ashi shilota kukupwashela dashi kupililila kupapatigwa kwaloka kwa valikola au kwa vambodi?
5. Wena mushu untumikila Yeova ata ukapapatigwa
Inkulateka tuvenavo ntima shii pakulota tuntumikile Yeova kupunda namene vanu vanji ikanavanagwela wetu tutende davo. Lola VIDEO, na badae mwambangile mwaa shakudya sha mwina.
-
Mpano au wamu video, unanowenge dashi likulupililo lyako?
Shomya Vitendo 5:27-29 na Vabalaniya 10:24, 25. Baada yakushomya kula lyaandiko, ambangila mwaa shakudya sha mwina:
-
Mwaa shani ni shinu shikumene kuka mushu tuntumikila Yeova, ata ikava kenga shimadengo shakwandadya ntenga na kuka ku mikutano vandileya?
6. Yeova anakupwashela kulipililila
Mashaidi va Yeova vashilinga na dikabila dyakuvilingananga vankuka mushu vantumikila Yeova mukukulupilika ata vakapapatigwa. Pakulota umanye nyamani shivapwashadile vanung’unumunu ava, lola VIDEO. Badae mwambangile mwaa shakudya sha mwina.
-
Kulingana na video, nyamani shivapwashadile vanung’unumunu kulipililila?
Shomya Valoma 8:35, 37-39 na Vapilipo 4:13. Baada yakushomya kula lyaandiko, ambangila mwaa shakudya sha mwina:
-
Maandiko ala, lananowenge dashi likulupililo lyako kenga unkuulula kupililila malingo loeloe?
Shomya Mateu 5:10-12, na badae mwambangile mwaa shakudya sha mwina:
-
Mwaa shani inkuululika wako kuvanavo lipuwilo ata ukapapatigwa?
Dimilioni dyoe dya vatumika vake Yeova vandyuka mushu vantumikila nae kwa kukulupilika ata vakapapatigwa. Na wako momo undaulula!
VANU VANJI VANKUSHIDONI: “Nangu hanguulula shinu kupililila kupapatigwa.”
-
Maandiko shani laulota kutumila pakulota kumpwashele munu ajo kuvanavo ntima shii?
KWAUNGWIPI
Yeova ankupa ipaida kulikanya- lidya kwatutenda pakulota kuntumikila nae ata tukapapatigwa. Na lipwashalelo lyake, wetu tunkuulula kulipililila!
Tukumbukilange
-
Mwaa shani Vaklistu ivavaikidile valindile kupapatigwa?
-
Nyamani shikuvaikidile utende pakulota kulipanganianga kukanava kuwika kupapatigwa?
-
Mwaa shani ivaikidile uvenavo wakika kenga unkuulula kuntumikila Yeova ata ukapapatigwa?
IPUNDISHE
Manya mwashi Yeova mwampwashaladile nung’unumunu kulipililila muwakati waungwidye, kwamwaa wa mene kulyunganianga upande woewoe.
Manya nyamani shivapwashadile vakulambana vantumikidile Yeova mu myaka vyoe ata vakapapatigwa.
Manya mwashi mwaulota kupilililila kupapatigwa na ntima shii.
“Jitayarishe Sasa kwa Ajili ya Mateso” (Mnara wa Mlinzi, Julai 2019)
Ituvaikidile twanele mwashi kupinga kwaloka kwa valikola, na tulota kuulula dashi kupililila na lipuwilo?
“Kweli Huleta, ‘Si Amani, Bali Upanga’” (Mnara wa Mlinzi, Oktoba 2017)
