ITHOMO RĨA 59
No Ũhote Gũkirĩrĩria Mĩnyamaro
Akristiano othe nĩ marĩcemania na ũkararia o na kana mĩnyamaro. Hihi ũndũ ũcio nĩ wagĩrĩire gũtũmakia?
1. Twĩrĩgagĩrĩra gũcemania na mĩnyamaro nĩkĩ?
Bibilia yugaga ũũ: “Arĩa othe meriragĩria gũtũũra na wĩrutĩri Ngai marĩ na ngwatanĩro hamwe na Kristo Jesu o nao nĩ marĩnyariragwo.” (2 Timotheo 3:12) Jesu nĩ aanyaririrũo tondũ ndaarĩ wa thĩ ĩno ya Shaitani. O na ithuĩ tũtirĩ a thĩ ĩno, kwoguo ti ũndũ wa kũgegania kuona tũkĩnyarirũo nĩ thirikari cia thĩ ĩno kana mathondeka ma kĩĩndini.—Johana 15:18, 19.
2. Tũngĩĩhaarĩria atĩa nĩ ũndũ wa mĩnyamaro?
Tũrabatara gwĩkĩra hinya mwĩhoko witũ harĩ Jehova ihinda-inĩ rĩrĩ. Ethaga mahinda o mũthenya ma kũhoya na gũthoma gĩcunjĩ kĩa Bibilia. Thiaga mĩcemanio ya kĩũngano ũtegũtĩrĩria. Maũndũ macio nĩ marĩkũheaga hinya ũrĩa ũrabatara wa kũhiũrania na mĩnyamaro ũrĩ na ũmĩrĩru, o na angĩkorũo mĩnyamaro ĩyo ĩroimana na andũ a famĩlĩ. Mũtũmwo Paulo, ũrĩa wacemanirie na mĩnyamaro maita maingĩ, aandĩkire ũũ: “Jehova nĩwe mũndeithia; ndigwĩtigĩra.”—Ahibirania 13:6.
Ningĩ kũhunjagia maita maingĩ no gũtũteithie kũgĩa na ũmĩrĩru. Kũhunjia nĩ gũtũrutaga kwĩhoka Jehova na gũgatũteithia kwaga gwĩtigĩra andũ. (Thimo 29:25) Ũngĩgĩa na ũmĩrĩru wa kũhunjia ihinda-inĩ rĩrĩ, nĩ ũgũkorũo wĩhaarĩirie wega gũthiĩ na mbere kũhunjia o na wĩra witũ ũngĩkĩrĩrũo mĩkaana nĩ thirikari.—1 Athesalonike 2:2.
3. Tũgunĩkaga atĩa rĩrĩa twakirĩrĩria mĩnyamaro?
Hatarĩ nganja tũtikenaga tũkĩnyarirũo, no hĩndĩ ĩrĩa twahota gũkirĩrĩria mĩnyamaro, wĩtĩkio witũ nĩ ũgĩaga na hinya. Nĩ tũkuhagĩrĩria Jehova tondũ nĩ tuonaga agĩtũteithia rĩrĩa twaigua ta tũtarĩ na hinya wa gũthiĩ na mbere. (Thoma Jakubu 1:2-4.) Jehova nĩ aiguaga ũũru rĩrĩa ona tũgĩthĩnĩka, no nĩ akenaga rĩrĩa ona tũgĩkirĩrĩria. Bibilia yugaga ũũ: “Angĩkorũo mũrakirĩrĩria kũnyarirũo nĩ ũndũ wa gwĩka wega, ũndũ ũcio nĩ mwega harĩ Ngai.” (1 Petero 2:20) Arĩa othe megũkirĩrĩria marĩ ehokeku, nĩ makaarathimwo nĩ Jehova maheo muoyo wa tene na tene thĩinĩ wa thĩ njerũ, kũrĩa magaatungatĩra Jehova gũtarĩ mũndũ ũramakararia.—Mathayo 24:13.
THUTHURIA MAKĨRIA
Reke tuone kĩrĩa kĩngĩtũma tuuge atĩ no tũhote gũtũũra tũrĩ ehokeku harĩ Jehova o na tũkĩnyariragwo, na tuone ũrĩa Jehova arĩtũrathimaga.
4. No ũhote gũkirĩrĩria ũkararia kuuma kũrĩ andũ a famĩlĩ
Jesu nĩ aamenyaga wega atĩ andũ amwe thĩinĩ wa famĩlĩ citũ no mage kũnyita mbaru itua ritũ rĩa gũthathaiya Jehova. Thomai Mathayo 10:34-36, mũcoke mwarĩrĩrie kĩũria gĩkĩ:
-
Nĩ ũndũ ũrĩkũ ũngĩhaanĩka rĩrĩa mũndũ thĩinĩ wa famĩlĩ atua itua rĩa gũtungatĩra Jehova?
Nĩguo muone ngerekano ya ũndũ ũcio, mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Ũngĩka atĩa mũndũ wa famĩlĩ kana mũrata angĩgeria gũkũgirĩrĩria gũtungatĩra Jehova?
Thomai Thaburi 27:10 na Mariko 10:29, 30. Arĩrĩriai kĩũria gĩkĩ thutha wa gũthoma o rĩandĩko:
-
Kĩĩranĩro kĩu kĩngĩgũteithia atĩa ũngĩcemania na ũkararia kuuma kũrĩ andũ a famĩlĩ kana arata?
5. Thiĩ na mbere gũtungatĩra Jehova o na ũkĩnyariragwo
Nĩ tũbataraga ũmĩrĩru gũtungatĩra Jehova rĩrĩa andũ angĩ marageria gũtũgirĩrĩria gwĩka ũguo. Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Cionereria iria irĩ video-inĩ ĩyo irakũhe ũmĩrĩru atĩa?
Thomai Atũmwo 5:27-29 na Ahibirania 10:24, 25. Arĩrĩriai kĩũria gĩkĩ thutha wa gũthoma o rĩandĩko:
-
Nĩkĩ nĩ ũndũ wa bata gũthiĩ na mbere gũthathaiya Jehova o na angĩkorũo wĩra witũ wa kũhunjia kana mĩcemanio itũ nĩ ĩkĩrĩirũo mĩkaana?
6. Jehova nĩ arĩgũteithagia gũkirĩrĩria
Aira a Jehova a ũkũrũ ũtiganĩte na a mĩrerere ngũrani nĩ matungatĩire Jehova marĩ ehokeku o na makĩnyariragwo. Nĩguo muone kĩrĩa kĩmateithĩtie, mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Kũringana na video ĩyo-rĩ, nĩ kĩĩ gĩateithirie Aira acio a Jehova gũkirĩrĩria?
Thomai Aroma 8:35, 37-39 na Afilipi 4:13. Arĩrĩriai kĩũria gĩkĩ thutha wa gũthoma o rĩandĩko:
-
Rĩandĩko rĩrĩ rĩragũteithia atĩa gũkorũo na ma atĩ no ũhote gũkirĩrĩria igerio o rĩothe?
Thomai Mathayo 5:10-12, mũcoke mwarĩrĩrie kĩũria gĩkĩ:
-
Nĩ kĩĩ kĩngĩtũma ũkorũo na gĩkeno o na ũkĩnyariragwo?
Athathaiya a Jehova milioni nyingĩ nĩ mahotete gũkirĩrĩria ũkararia. O nawe no ũhote gwĩka ũguo!
ANDŨ AMWE MOIGAGA: “Niĩ ndingĩhota gũkirĩrĩria mĩnyamaro.”
-
Nĩ maandĩko marĩkũ mangĩmateithia kũgĩa na ũmĩrĩru ũrĩa marabatara?
ŨRĨA TWERUTA
Jehova nĩ akenagio nĩ kĩyo gitũ gĩa kũmũtungatĩra o na tũkĩnyariragwo. Tũrĩ na ũteithio wake, no tũhote gũkirĩrĩria!
Ciũria cia gũcokera
-
Akristiano magĩrĩirũo kwĩrĩgĩrĩra kũnyarirũo nĩkĩ?
-
Ũngĩka atĩa ihinda-inĩ rĩrĩ nĩguo ũgaakorũo wĩhaarĩirie wacemania na mĩnyamaro?
-
Nĩ kĩĩ kĩngĩgũteithia gũkorũo na ma atĩ no ũhote gũtungatĩra Jehova o na ũgĩcemanagia na igerio o rĩothe?
RIKĨRA
Wĩrorere mũrũ wa Ithe witũ ũmwe mwĩthĩ agĩtaarĩria ũrĩa Jehova aamũteithirie gũkirĩrĩria rĩrĩa oohetwo njera nĩ ũndũ wa kũrega kũingĩra njeshi-inĩ.
Rora wone kĩrĩa gĩateithirie mũthuri ũmwe na mũtumia wake gũtungatĩra Jehova marĩ ehokeku kwa ihinda rĩa mĩaka mĩingĩ o na magĩcemanagia na ũkararia.
Thoma wone ũrĩa ũngĩhiũrania na mĩnyamaro ũrĩ na ũmĩrĩru.
“Wĩhaarĩrie Rĩu nĩ Ũndũ wa Kũnyarirũo” (Mũrangĩri, Julaĩ 2019)
Twagĩrĩirũo gũkorũo na mawoni marĩkũ kwerekera ũkararia kuuma kũrĩ andũ a famĩlĩ citũ, na nĩ kĩĩ kĩngĩtũteithia gũtooria moritũ marĩa moimanaga na ũkararia ũcio?
“Ũhoro wa ma Ũrehaga ‘Rũhiũ rwa Njora, No Ti Thayũ’” (Mũrangĩri, Oktomba 2017)
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Mũbango wa Aira a Jehova wa Kwĩruta Bibilia na Andũ Ũkoragwo Ũhaana Atĩa?
Rĩrĩa ũreruta Bibilia na Aira a Jehova, no ũhũthĩre Bibilia ĩrĩa ũkwenda. No ũnyite ũgeni andũ anyu othe a famĩlĩ kana arata aku rĩrĩa ũreruta.
