OSHILESHWA 59
Oto dulu okukala omudiinini, nonande oto hepekwa
Ovakriste aveshe ova teelela okuhepekwa, kutya nee opaife, ile omonakwiiwa. Ndele mbela otu na okukala twa tila omahepeko a tya ngaho?
1. Omolwashike twa teelela okuhepekwa?
Ombiibeli oya popya sha yukilila kutya: “Aveshe ovo va hala okulongela Kalunga ve li ovahongwa vaKristus Jesus navo otava ka hepekwa.” (2 Timoteus 3:12) Jesus okwa li a hepekwa, molwaashi ka li oshitukulwa shounyuni ou tau pangelwa kuSatana. Molwaashi nafye katu li oshitukulwa shounyuni ou, ihatu kala twa kumwa eshi hatu hepekwa komapangelo omounyuni ou nosho yo komalongelokalunga.— Johannes 15:18, 19.
2. Ongahelipi hatu dulu okulilongekidila omahepeko?
Otwa pumbwa okupameka elineekelo letu muJehova paife. Kala ho kongo efimbo efiku keshe u ilikane kuye nokulesha Eendjovo daye. Kala ho ongala pandjikilile. Ngeenge owa kala ho ningi oinima aishe oyo, otashi ke ku pameka u lididimikile omahepeko nomupondo, nonande otashi dulika taa dilile kovapambele voye. Omuyapostoli Paulus, oo a li a hepekwa lwoikando, okwa shanga a ti: “Jehova oye omukwafi wange; itandi tila sha.”— Ovaheberi 13:6.
Okuudifa pandjikilile ohaku tu kwafele tu kale tu na ouladi. Ohaku tu kwafele yo tu kale twe lineekela muJehova notu finde oumbada wokutila ovanhu. (Omayeletumbulo 29:25) Ngeenge owa kala u na ouladi wokuudifa paife, otashi ke ku kwafela u kale we lilongekida okuudifa, nonande epangelo oli shilike oilonga yetu.— 1 Ovatessaloniki 2:2.
3. Okulididimikila omahepeko ohaku tu etele ouwa ulipi?
Oshoshili kutya ihatu kala twa hafa, ngeenge hatu hepekwa. Ashike ngeenge otwe lididimike, otashi ka pameka eitavelo letu. Ohatu ehene popepi naJehova, molwaashi ohatu mono nghee he tu kwafele, ngeenge tu udite tuhe na eenghono dokupula komesho. (Lesha Jakob 1:2-4.) Ohashi yahameke Jehova, ngeenge hatu mono oixuna. Ashike ngeenge ohatu lididimike, ohashi mu hafifa. Ombiibeli oya ti: “Ohashi hafifa Kalunga ngeenge to lididimikile okumona oixuna molwaashi to longo ouwa.” (1 Petrus 2:20) Ngeenge otwa kala ovadiinini kuJehova, ote ke tu pa ondjabi yomwenyo waalushe mounyuni mupe, naavo tava ka kala mounyuni wa tya ngaho otava ka longela Kalunga va manguluka nopehe na oo te va pataneke.— Mateus 24:13.
KONAKONA MOULE
Lihonga kutya omolwashike hatu dulu okukala ovadiinini kuJehova, nonande ohatu patanekwa nosho yo kutya ondjabi ilipi te ke tu pa, ngeenge otwa ningi ngaho.
4. Oto dulu okulididimika, ngeenge to patanekwa kovapambele
Jesus okwa popya sha yela, eshi a ti kutya vamwe vomovapambele vetu otashi dulika vaha ka yambidide etokolo letu lokulongela Jehova. Lesha Mateus 10:34-36, ndele tamu kundafana epulo tali shikula:
-
Vamwe vomovapambele vetu otashi dulika va popye, ile va ninge shike, ngeenge otwa hoolola okulongela Jehova?
Opo u mone oshihopaenenwa, dana OKAVIDIO, ndele tamu kundafana epulo tali shikula.
-
Oshike to dulu okuninga po, ngeenge umwe womovapambele, ile tashi dulika kaume koye, ota kendabala oku ku imba u longele Jehova?
Lesha Epsalme 27:10 nosho yo Markus 10:29, 30. Konima eshi mwa lesha omushangwa keshe, kundafaneni epulo tali shikula:
-
Ongahelipi eudaneko olo tali dulu oku ku kwafela, ngeenge to patanekwa kovapambele, ile kookaume?
5. Twikila okulongela Jehova, nonande oto hepekwa
Ohashi pula ouladi okulongela Jehova, ngeenge vamwe otava kendabala oku tu imba tu ninge ngaho. Dana OKAVIDIO, ndele tamu kundafana epulo tali shikula.
-
Ongahelipi oihopaenenwa oyo ya ulikwa mokavidio tai dulu oku ku pameka?
Lesha Oilonga 5:27-29 nosho yo Ovaheberi 10:24, 25. Konima eshi mwa lesha omushangwa keshe, kundafaneni epulo tali shikula:
-
Omolwashike sha fimana okutwikila okulongela Jehova, nonande otashi dulika oilonga yetu yokuudifa, ile okwoongala okwa shilikwa?
6. Jehova ote ke ku kwafela u lididimike
Eendombwedi daJehova, da dja momaputuko a yoolokafana, ovanyasha novakulunhu, otadi twikile okulongela Jehova, nonande otadi patanekwa. Opo u mone kutya oshike she di kwafela, dana OKAVIDIO, ndele tamu kundafana epulo tali shikula.
-
Ngaashi sha ulikwa mokavidio, oshike sha kwafela Eendombwedi odo di lididimike?
Lesha Ovaroma 8:35, 37-39 nosho yo Ovafilippi 4:13. Konima eshi mwa lesha omushangwa keshe, kundafaneni epulo tali shikula:
-
Ongahelipi omishangwa odo tadi ku shilipaleke kutya naave oto dulu okulididimikila eshongo keshe?
Lesha Mateus 5:10-12, ndele tamu kundafana epulo tali shikula:
-
Omolwashike to dulu okukala wa hafa, nonande oto hepekwa?
Eendombwedi daJehova omamiliyona otadi twikile okulongela Jehova noudiinini, nonande otadi patanekwa. Naave oto dulu okuninga ngaho!
VAMWE OHAVA TI: “Itandi dulu okulididimikila omahepeko.”
-
Omishangwa dilipi tadi dulu oku va twa omukumo?
ENGONGO
Jehova okwa lenga eenghendabala detu doku mu longela, nonande ohatu hepekwa. Molwaashi ohe tu kwafele, ohatu dulu okulididimika nomupondo.
Eendululo
-
Omolwashike Ovakriste va teelela okuhepekwa?
-
Oshike to dulu okuninga paife, opo u lilongekidile omahepeko?
-
Oshike tashi dulu oku ku kwafela u kale u na elineekelo kutya oto dulu okulongela Jehova, nonande ope na omashongo?
TALA OUYELELE WA WEDWA PO
Tala nghee omumwatate umwe omunyasha ta yelifa nghee Jehova e mu kwafela e lididimike, eshi a li a tulwa modolongo omolwokuhena ombinga kwaye.
Konakona, opo u mone kutya oshike sha li sha kwafela ovalihomboli vamwe va twikile okulongela Jehova noudiinini oule womido, nonande ova li tava patanekwa.
Lihonga nghee to dulu okulididimikila nomupondo omahepeko.
Otu na okutala ko ngahelipi omapataneko okudja kovapambele, nongahelipi hatu dulu okukaleka po ombili nokutwikila okulongela Jehova noudiinini?
“Oshili ihai eta ‘ombili, ndelenee eongamukonda’” (Oshungonangelo, Oktoba 2017)
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
