ILINNIAGASSAQ 59
Malersorneqarnermi pinertusaarsinnaavutit
Kristumiut tamarmik akerlilersorneqarlutillu malersorneqarumaarput. Tamanna annilaangassutigissavarput?
1. Sooq malersorneqarnissarput ilimagaarput?
Biibilimi ima allassimavoq: “Guutimut tunniusimallutik Kristusimillu Jiisusimik ataasioqateqarlutik inuujumasut tamarmik aamma malersorneqassapput.” (Timuutiusimut 2. 3:12) Jiisusi inunnit allanit allaanerugami malersorneqartarpoq. Jiisusi ilaaratsigu uaguttaaq inunnit allanit allaaneruvugut, taamaattumillu ilaatigut naalakkersuisunit upperisarsioqatigiinnillu malersorneqartarnerput tupaallaatiginngilarput. – Johannesi 15:18, 19.
2. Malersorneqarnissamut qanoq piareersarsinnaavugut?
Jehova maanna tatiginerulertariaqarparput. Qanoq taamaaliorsinnaavugut? Ullut tamaasa qinusarnikkut Biibilimillu atuartarnikkut aamma ataatsimiigiartarnikkut. Malersorneqarnermi sapiitsuunissatsinnut, allaat ilaquttatsinnit malersorneqassagaluarutta, anersaakkut sammisartakkagut taakku nakussatsissutigissavagut. Apustili Paulusi malersorneqartarsimasoq ima allappoq: “Jehova ikiortigigakku annilaangassanngilanga.” – Hebræerit 13:6.
Aamma oqaluussisarnikkut sapiinnerulersinnaavugut. Oqaluussigaangattami Jehova tatiginerulertarlugulu inunnik qunugisaqarunnaartarpugut. (Ussatit 29:25) Maanna oqaluussinermi sapiitsuuguit suliarput naalakkersuisunit inerteqqutigineqalissagaluarpat oqaluussiuarnissamut sapiissuseqassaatit. – Tessaluunikamiunut 1. 2:2.
3. Malersorneqarnermi pinertusaarnerput qanoq iluaqutigisarparput?
Soorunami malersorneqarneq nuanniippoq. Malersorneqarnermili pinertusaarnerput uppernerulissutigisarparput. Sapileraangattami Jehovamit ikiorneqarnerput misigisaratsigu taassumunnga qaninnerulertarpugut. (Jaaku 1:2-4 atuarsigit). Biibilimi ima allassimavoq: “[Ajunngitsuliornersi] pissutigalugu naalliunnissinni pinertusaarnersi Guutip iluarissavaa.” (Petrusimit 1. 2:20) Tassa naalliunnerput takullugu Jehova aliasuttarpoq, pinertusaarnerpulli nuannaarutigisarpaa. Aalajaatsut pinertusaarnertik pissutigalugu Jehovamit pilluaqquneqarumaarput inuunermik naassaanngitsumik tunineqarlutik. Taamanikkussamut inuit tamarmik akerlilersorneqarnatik Jehovamut kiffartussapput. – Matiusi 24:13.
ITISILIINEQ
Malersorneqaraluarluta Jehovamut qanoq aalajaattuarsinnaasugut qanorlu pilluaqquneqarumaartugut paasiniakkit.
4. Ilaquttannit akerlilersorneqaruit pinertusaarsinnaavutit
Jiisusip nalunngilaa ilaquttatta ilaasa Jehovamut kiffartulernerput nuannarissanngikkaat. Matiusi 10:34-36 atuarsigit apeqqullu una eqqartorlugu:
-
Jehovamut kiffartorniarluni aalajangersimasup ilaqutai qanoq qisuariarsinnaappat?
VIDEO takusiuk apeqqullu tulliuttoq eqqartorlugu.
-
Ilaquttavit ikinngutivilluunniit Jehovamut kiffartorunnaarsinniarpatit sussavit?
Tussiaat 27:10 aamma Makkorsi 10:29, 30 atuarsigit. Allassimaffiit ataasiakkaarlugit atuariarlugit apeqqut una eqqartorsiuk:
-
Ilaquttannit ikinngutinnilluunniit akerlilersorneqaruit neriorsuut qanoq iluaqutigisinnaaviuk?
5. Malersorneqaraluarlutit Jehova kiffartorfigiuaruk
Akerlilersorneqarnermi Jehova kiffartorfigiumallugu sapiitsuusariaqarpugut. VIDEO takusiuk apeqqullu tulliuttoq eqqartorlugu.
-
Videumi oqaluttuarineqartut qanoq nakussatsissutigaagit?
Apustilit Suliaat 5:27-29 aamma Hebræerit 10:24, 25 atuarsigit. Allassimaffiit ataasiakkaarlugit atuariarlugit apeqqut una eqqartorsiuk:
-
Oqaluussinerput ataatsimiinnigulluunniit naalakkersuisunit inerteqqutigineqalerpata sooq Jehova guutisiorfigiuassavarput?
6. Pinertusaarsinnaaqqullutit Jehovap ikiussavaatit
Jehovap Nalunaajaasui ukiumikkut tunuliaquttamikkullu assigiinngitsuusut malersorneqaraluarlutik Jehovamut aalajaallutik kiffartortuarsimapput. Qanoq taamaaliorsinnaasimasut paasiumallugu VIDEO takusiuk apeqqullu tulliuttoq eqqartorlugu.
-
Nalunaajaasut videumi takusagut qanoq pinertusaarsinnaasimappat?
Romamiut 8:35, 37-39 aamma Filippimiut 4:13 atuarsigit. Allassimaffiit ataasiakkaarlugit atuariarlugit apeqqut una eqqartorsiuk:
-
Allassimaffik eqqarsaatigalugu sooq qularinngiliuk misilinneqarnermi qanorluunniit ittumi pinertusaarsinnaallutit?
Matiusi 5:10-12 atuarsigit apeqqullu una eqqartorlugu:
-
Sooq malersorneqarnermi nuannaarsinnaavit?
Jehovamut kiffartortut millionillit akerlilersorneqarnerminni pinertusaarsimapput. Aamma illit pinertusaarsinnaavutit!
OQARTOQARTARPOQ: “Malersorneqarnermi pinertusaarsinnaanavianngilanga.”
-
Nakussatsikkumallugu allassimaffik sorleq takutissinnaaviuk?
EQIKKAANEQ
Malersorneqaraluarluta aalajaattuarnerput Jehovap pingaartingaarpaa. Taassumannga ikiorneqaratta pinertusaarsinnaavugut.
Uteqqiineq
-
Sooq kristumiut malersorneqarnissartik ilimagissavaat?
-
Malersorneqarnissamut piareersimajumallutit maanna susinnaavit?
-
Qanorluunniit misilinneqaraluarlutit Jehovamut aalajaattuarsinnaasutit sooq qularinngiliuk?
NAMMINEQ MISISSUGASSATIT
Qatanngut angut inuusuttoq sorsukkumannginnini pissutigalugu parnaarussaaqqasoq pinertusaarsinnaaqqullugu Jehovap qanoq ikioraa takuuk.
Aappariit ukiorpassuarni akerlilersorneqaraluarlutik Jehovamut qanoq aalajaattuarsinnaasimasut paasiniaruk.
Pissutsit allanngortaraluartut Jehovamut kiffartortuartut (7:14)
Malersorneqarnermi qanoq sapiitsuusinnaasutit atuaruk.
“Malersugaanissamut maanna piareersarit” (Napasuliaq Alapernaarsuiffik, juuli 2019)
Ilaquttatsinnit akerlilersorneqarnerput qanoq isigissavarput, qanorlu qamuuna eqqissisimajuarsinnaallutalu Jehova ilumoorfigiuarsinnaavarput?