SUƐI LEBOLII 59
A Nɔla Ma Lo o Laalaŋndo Choo o Nyɛpalaa Bɛŋgu
Mi waŋnda kindiŋ le naa kuunaa Chɛhowa piɛiyo. Nduyɛ te ŋ kɛɛ pɛ, ma tusi naa pɛŋ nyɛpalaa choo. Naapum o bendu lɛ niŋ te mi hei komal naa. Kɛ baa o bɛnda pa miŋ yɔŋ siooŋnde le hei?
1. Le yɛɛ naŋ nɔ yɛ miŋ wa nyɛpalaa kɔl?
Baabuiyo dimi kpendekele aa: “Wanaa yeema yɔŋgɔŋndo o Mɛlɛka lo, nduyɛ ma wa buɛiya le Chiisu Kiliti wa kpou, waŋnda cho nda nyɛpalaa tusi choo.” (2 Timoti 3:12) Ma tusi Chiisu nyɛpalaa choo le mɛɛ o ve le chieeŋ Setanaa hoo le yɛ. Naa bɛɛ ŋ cho le chieeŋndo hoo le. Lelaŋ, te masɛi chieeŋnde a kɔɔnala lepiɛilaŋ la tusi naa pɛ nyɛpalaa choo, kɔndɔfili nɔ mbo bii naa le.—Chɔŋ 15:18, 19.
2. Vɛɛ naŋ bɛɛndiaŋ yɛ le nyɛpalaa?
Suŋ suŋ naŋ nɔ ni miŋ kindi tiindaŋ naa o Chɛhowa niŋ. Lelaŋ, nuuviaa teleŋndo le ma wa piɛileŋ o ndu lo lepaa o lepaa nduyɛ ma wa diomndaŋ veeloo o Baabuiyo niŋ. Wa kɔlaŋ o bɔŋaŋndaŋ lɔɔ o lɔɔ. Sɔɔŋ muŋ tosaa nɔla miŋ luei num yoomuaŋ le simndaŋ yi o nyɛpalaa bɛŋgu, o yɔŋ bɛɛ aa yuŋgu numndo tusi num ndu choo ni. Mi ndaa tusi kiilanɔɔ Pɔɔl nyɛpalaa choo teleŋnda bɔɔbɔɔ. Le hei mbo poonyiaa aa: “Chɛhowa mala ya ni. Lelaŋ siooŋii bii ya le.”—Hibuluiya 13:6.
Ŋ nɔla vɛlɛ miŋ nɔ kɔl simulaa te ŋ wa pɛ yooŋgu kɛndɔɔ dimioo teleŋ o teleŋ. Yooŋgu kɛndɔɔ dimioo mala naa miŋ dɔu tiindaŋndo o Chɛhowa niŋ, nduyɛ miŋ soliŋ siooŋii waŋnda chieeya o kɔl. (Pulɔwaa 29:25) Te a kindiŋ pɛ ma nɔ kɔl simulaa le yooŋgu kɛndɔɔ dimioo suŋ suŋ, keŋ cho num mala ma hiou lachi a ndu dimioo o yɔŋ bɛɛ mi masaa waa kuuna wali naa.—1 Tɛsaloniaŋ 2:2.
3. Tɔnɔ yɛɛ naŋ sɔla yɛ te a tusi naa pɛ nyɛpalaa choo miŋ biuŋ?
O kpeekpei niŋ, ŋ yeema ma wa naa nyɛpalaa tusioo choo le. Kɛ te a tusi naa ndu pɛ choo miŋ biuŋ, mi laalaŋ naa chɔɔlu kalu poŋ. Miŋ chɔɔlu Chɛhowa sɔɔŋguu ikɛi kpɛɛluŋ. Kanifuule, te yoomuaŋ ma chuu naa pɛ, mbo chɔɔlu naa maŋ ke le hiouwɔɔ lachi a biuwɔŋndo. (Nuawɔ Chemisi 1:2-4.) Mi Chɛhowa tambu kɔl te o che naa pɛ saŋgaa. Kɛ mbo naŋ kɔl te o che naa pɛ miŋ biunuŋ. Baabuiyo dimi aa: “Te la biunuŋ pɛ nyɛpalaa le mɛɛ nya tosa sɔɔŋ kɛndɔŋ yɛ, keŋ wa suɛi kɛndɛ Mɛlɛka o hɔl.” (1 Pitɛ 2:20) Te ŋ hiou pɛ lachi a Chɛhowa piɛiyo o laalaŋndo choo, o cho naa hunɔɔ yoomu fafɛɛŋndo ke o chieeŋ sɛnɛiyo niŋ. Wanaa cho wa loŋ nda kpou cho ndu wa piɛiyo, nduyɛ wana paaliaŋ lɛ niŋ nda le.—Maatiu 24:13.
CHƆƆLU YAASIAA
Yaasiaa wɔ ma che nyɛ chɔm maa, ŋ nɔla miŋ hiou lachi a Chɛhowa piɛiyo o nyɛpalaa bɛŋgu wo, vɛlɛ a tɔnɔ naŋ sɔla o hei niŋndo.
4. A nɔla ma hiou lachi a Chɛhowa piɛiyo o yɔŋ bɛɛ mi yuŋgu numndo simul num
Chiisu ndoo sina kpendekele maa te ŋ kɛɛsiaa pɛ le Chɛhowa piɛiyo, waŋnda apum o yuŋgu naa niŋ cho naa simul. Nuawɔ Maatiu 10:34-36, okoŋ mi la suukaŋ o nyunaa hoo choo:
-
Yɛɛ yɔŋnuŋ yɛ te waŋndo opilɛ o yuŋgoo niŋ kɛɛsiaa pɛ le Chɛhowa piɛiyo?
Le tamaseliiyo chɔɔ a hei okɔɔ, handu VIDUEIYO, okoŋ mi la suukaŋ o nyunaa hoo choo:
-
Yɛɛ ŋ cho yɛ tosa te wanayɛi numnde ɔɔ chaaŋ num kindiŋ pɛ le num kuunaa Chɛhowa piɛiyo?
Nuawɔ Sam 27:10 a Maki 10:29, 30. Te la chii bolle Baabuile kɛ kɛ nua pɛ, la suukaŋ o nyunaa hoo choo:
-
Vɛɛ nyɛ dimiŋ hoo wo mala yɛ num ma biuŋ, te yuŋgu numndo ɔɔ chaaŋaa numnda simul num pɛ?
5. Hiou lachi a Chɛhowa piɛiyo o yɔŋ bɛɛ ma tusi num nyɛpalaa choo
Kɔl simulaa pila yeemaŋ ni le hiouwɔɔ lachi a Chɛhowa piɛiyo, te waŋnda wa pɛ kindiŋndo le naa kuunaa. Handu VIDUEIYO, okoŋ mi la suukaŋ o nyunaa hoo choo:
-
Vɛɛ tamaseliila cho o vidueiyo hoo niŋndaŋ la mala yɛ num ma nɔ kɔl simulaa?
Nuawɔ Walta Kiilaa 5:27-29 a Hibuluiya 10:24, 25. Te la chii bolle Baabuile kɛ kɛ nua pɛ, la suukaŋ o nyunaa hoo choo:
-
Le yɛɛ naŋ nɔ yɛ miŋ hiou lachi a yooŋgu kɛndɔɔ dimioo vɛlɛ a bɔŋaŋndaŋ biyɔɔ, o yɔŋ bɛɛ mi masaa waa kuuna naa?
6. Chɛhowa cho num mala ma biunuŋ
Chieeŋndo balɔɔ silɔ, a tusi niŋ Seiyaa Chɛhowaa nyɛpalaa choo, chuaambɔ ni, kaasoŋnɔ ni. Kɛ a koŋ kpou, ma hiau lachi a Chɛhowa piɛiyo. Le chɔɔ nyɛ mala nda wo, handu VIDUEIYO. Okoŋ mi la suukaŋ o nyunaa hoo choo:
-
O vidueiyo hoo niŋ, yɛɛ mala yɛ Seiyaa Chɛhowaa haa le biuwɔŋndo?
Nuawɔ Luomaŋnda 8:35, 37-39 a Filipiaŋnda 4:13. Te la chii pɛ bolle Baabuile kɛ kɛ nua, la suukaŋ o nyunaa hoo choo:
-
Vɛɛ bolle Baabuileŋ ndeŋ le ke yɛ num tiindaŋndo maa a nɔla ma biuŋ tɔɔndaŋndo?
Nuawɔ Maatiu 5:10-12, okoŋ mi la suukaŋ o nyunaa hoo choo:
-
Le yɛɛ ŋ nɔla yɛ ma wa a kɔl kɛndɛ o yɔŋ bɛɛ ma wa num nyɛpalaa tusioo choo?
Seiyaa Chɛhowaa o miiliɔŋndaŋ niŋ biunuŋ niŋ nyɛpalaa nda tusi nda choo wo. Num bɛɛ nɔla ma biunuŋ!
TE WAŊNDO DIMI PƐ AA: “I nɔla mi biuŋ nyɛpalaa le.”
-
Bolii Baabui kuɛɛ nɔla yɛ mii luei ndu yoomuaŋ mbo biuŋ?
SƆƆŊ KULLOŊ
Mi Chɛhowa naŋ kɔl tau te ŋ wa ndu pɛ piɛiyo o nyɛpalaa bɛŋgu. A mala ndɔɔ, ŋ nɔla miŋ biunuŋ!
Nyunala miiŋgaa choo laŋ
-
Le yɛɛ Kilisiɔŋnda nɔ yɛ ma wa nyɛpalaa kɔl?
-
Yɛɛ ŋ nɔ yɛ ma tosa suŋ suŋ le ma bɛɛndiaŋ le nyɛpalaa?
-
Yɛɛ mala yɛ num ma nɔ tiindaŋndo maa, a nɔla ma hiou lachi a Chɛhowa piɛiyo o tɔɔndaŋ kɛ kɛ bɛŋgu?
CHƆƆLU SƆƆŊ PUM TOFA
Mi puaapilɛnɔɔ tɛɛsiaa mɛɛ Chɛhowa mala ndu mbo biuŋ yɛ, teleŋ nda dɔu ndu o chiɛi manyumndo niŋ le waa yuŋyeŋ ndo. Tofawɔ ma che nyɛ o dimi wo.
Tofawɔ ma che nyɛ mala pɔnɔɔ a lanɔ pilɛ, le hiouwɔɔ lachi a Chɛhowa piɛiyo o laalaŋndo choo le wɔsiŋ bɔɔbɔɔ wo, mi che bɛɛ tɔɔndaŋndaŋ la wa nda komallo.
Pɛɛku ma sina nyɛ mala num ma nɔ kɔl simulaa wo te a wa num pɛ nyɛpalaa tusioo choo.
Vɛɛ Naŋ Bɛɛndiaŋ yɛ le Nyɛpalaa Nda Tusi Niŋ Naa Choo Wo? (Bandu Mɛŋgɛlaa, Suɛɛsɔɔ 2019)
Vɛɛ naŋ nɔ yɛ miŋ che tɔɔndaŋ yuŋgu naa tusi naa choo wo? Yɛɛ naŋ nɔ yɛ miŋ tosa le miŋ lo o kɔl nyulu niŋ a nda, nduyɛ miŋ hiou lachi a Chɛhowa piɛiyo?
“Tonyaa Hiŋ a Kɔl Nyulu le, Kɛ a Piɔuviaŋndo” (Bandu Mɛŋgɛlaa, Saa 2017)
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
