CIIYO 59
Inga Mwacikonsha Kuliyumya Ndyemutoopenshekwa
Paciindi cili coonse, Beneklistu boonse inga bapikishikwa nabi kupenshekwa. Ano sa ici cilyeelete kutuloondesha?
1. Ino nceebonshi tulyeelete kulangila kupenshekwa?
Baibo ilaamba ayi: “Uyo woonse usuni kwikala buumi bwabu Lesa muli Klistu Yesu ulaakupenshekwa.” (2 Timoti 3:12) Yesu wakapenshekwa ceebo cakwaamba ayi taakalinga kulubasu lwacishi cakwe Satana. Aswebo tatubete kulubasu lwacishi, aboobo tatukankamani ndyetutoopenshekwa ku mfulumeende shapacishi alimwi amabunga abeshibupailishi.—Joni 15:18, 19.
2. Ino inga twalibambila buyani kupenshekwa?
Tulyeelete kuyumya kucinka manungo kwesu muli Yehova pacecino ciindi. Amucane ciindi cakupaila bushiku abushiku akubelenga Maswi akwe Lesa. Amucanike kumabungano lyoonse. Kucita boobo kulaakumucafwa kutaloonda paciindi ndyeshi mukanoopenshekwa, nabi kupenshekwa uko kuswa kubeshikamukowa. Mutumwi Paulo uyo wakalinga kupenshekwa lyoonse, wakalemba ayi: “Yehova ngomucafwi wangu; teshi nkaloondeewo.”—Bene Ebulu 13:6.
Cimwi ceenga catucafwa kuyumya kutaloonda kwesu nkushimikila lyoonse. Kushimikila kulatwiisha kucinka manungo muli Yehova akukoma boowa bwakuloonda muntu. (Tushimpi 29:25) Na pacecino ciindi kamutaloondi kushimikila, cilaakumucafwa kutolelela kushimikila nabi incito yesu ikakashikwe ku mfulumeende.—1 Bene Tesalonika 2:2.
3. Ino kuliyumya ndyetutoopenshekwa kulatucafwa buyani?
Nabi kwaamba ayi ncakwiila tatusangalali kupenshekwa, kuliyumya ndyetutoopenshekwa kulayumya lushomo lwesu. Tulayumya bushicibusa bwesu a Yehova na twabona mbwaatucafwa paciindi ndyetwalinyumfwa anga tatucitewo nkusu shakuliyumya. (Amubelenge Jemusi 1:2-4.) Cilamucisa abuumbi Yehova na wabona mbotutoopenga, nacibi boobo, alasangalala na wabona mbotutooliyumya. Baibo ilaamba ayi: “Na mwapenshekwa nakubi kwaamba ayi mwacita kabotu, Lesa ulaakumupa coolwe.” (1 Pita 2:20) Na twatolelela kuliyumya cakushomeka, Yehova alaakutupa cilambu ca buumi butamaani mucishi cipya. Bantu boonse beshi bakekale mucishi cipya balaakunoopailabo Yehova eenka alimwi teshi kukabeewo wakubapikisha.—Mateyo 24:13.
AMWIIYILEWO ASHIMWI
Amwiiye ceenga camucafwa kutolelela kushomeka kuli Yehova nabi ndyemutoopenshekwa alimwi akubona shoolwe nsheshi mukacane.
4. Inga mwacikonsha kuliyumya beshikamukowa ndyebatoomupikisha
Yesu wakalinga kucishi kwaamba ayi bamwi mumukwashi wesu teshi bakasune ayi tunoosebensela Yehova. Amubelenge Mateyo 10:34-36, akubandika mwiipusho uyu:
-
Ino nciinshi ceenga cacitika na umwi mumukwashi wasalawo kusebensela Yehova?
Kwaamba ayi mubone cakubonenaako, amweebele VIDYO, lyalo akubandika mwiipusho utokonkelaawo.
-
Ino inga mwacita buyani na shikamukowa nabi shicibusa atoomuyuminisha kucileka kusebensela Yehova?
Amubelenge Kulumbaisha 27:10 a Maako 10:29, 30. Pesule lyakubelenga lilembo lyomwi alyomwi, amubandike mwiipusho uyu:
-
Ino cishomesho ici inga camucafwa buyani bamumukwashi na beshicibusa ndyebatoomupikisha?
5. Amutolelele kusebensela Yehova nabi ndyemutoopenshekwa
Kutolelela kusebensela Yehova bamwi ndyebatootupikisha kulayandika kutaloonda. Amweebele VIDYO, akubandika mwiipusho utokonkelaawo.
-
Ino shakubonenaako nshomweebela muvidyo shamuyuminisha buyani?
Amubelenge Milimo 5:27-29 a Bene Ebulu 10:24, 25. Pesule lyakubelenga lilembo lyomwi alyomwi, amubandike mwiipusho uyu:
-
Ino nceebonshi ncociyandikila kutolelela kusebensela Yehova nabi kwaamba ayi incito yesu yakushimikila na kubungana shakashikwa?
6. Yehova alaakumucafwa kuliyumya
Bakamboni Bakwe Yehova bashiimo shipusenepusene alimwi baswa mubukaalo bupusenepusene batolelela kusebensela Yehova cakushomeka nabi ndyebatoopenshekwa. Kwaamba ayi mubone cakabacafwa, amweebele VIDYO. Lyalo amubandike mwiipusho utokonkelaawo.
-
Kweelana anshomweebela muvidyo, ino nciinshi cakacafwa Bakamboni aba kuliyumya?
Amubelenge Bene Loma 8:35, 37-39 a Bene Filipi 4:13. Pesule lyakubelenga lilembo lyomwi alyomwi, amubandike mwiipusho uyu:
-
Ino lilembo ili lilamucafwa buyani kushoma ayi inga mwacikonsha kuliyumya mumapensho ali woonse?
Amubelenge Mateyo 5:10-12, akubandika mwiipusho uyu:
-
Ino nciinshi ceenga camulengesha kuba basangalete nabi ndyemutoopenshekwa?
Bakamboni Bakwe Yehova baanji batolelela kusebensela Yehova cakushomeka nabi ndyebatoopikishikwa. Amwebo inga mwacikonsha!
BANTU BAMWI BALAAMBA AYI: “Inga nshicikoonshiiwo kuliyumya ndyentoopenshekwa.”
-
Ino ngamalembo ali eenga abacafwa kushoma cakutatoonsha?
CITEENTE CINENE
Yehova alalumba abuumbi na twatolelela kumusebensela nabi ndyetutoopenshekwa. Kwiinda mulucafwo lwakwe, inga twacikonsha kuliyumya!
Kwiindulukaamo
-
Ino nceebonshi Beneklistu balyeelete kulangila kupenshekwa?
-
Ino nshiinshi nsheenga mwaciita pacecino ciindi kwaamba ayi mulibambile kupenshekwa kunembo?
-
Ino nciinshi ceenga camucafwa kushoma cakutatoonsha kwaamba ayi inga mwacikonsha kusebensela Yehova nabi ndyemutokwiinda mumapensho ali oonse?
AMULANGWETEEWO ASHIMWI
Amubone mukwesu wacanike mbwatosansulula Yehova mbwakamucafwa kuliyumya paciindi ndyaakalinga mujeele ceebo cakukaka kwaabanamo lubasu mushacishi.
Amubone cakacafwa beebene bamwi kutolelela kusebensela Yehova cakushomeka kwamyaaka iinji nabi ndyebakalinga kupikishikwa.
Amwiiye mbweenga mwatondesha kutaloonda nabi ndyemutoopenshekwa.
“Mbweenga Mwalibambila Limwi Kupenshekwa” (Njashi Yamulindilishi, July 2019)
Ino kupikishikwa ku bamumukwashi tulyeelete kukubona buyani, alimwi ino inga twacita buyani kwaamba ayi tutolelele kuba muluumuno akushomeka kuli Yehova?
“Cancine Cilaleta ‘Mupeeni Kuteshi Luumuno’” (Njashi Yamulindilishi, October 2017)
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
