ບົດທີ 59

ເຈົ້າຈະອົດທົນການຂົ່ມເຫງໄດ້ແນວໃດ?

ເປີດ

ໃນອະນາຄົດ ຄລິດສະຕຽນທຸກຄົນຈະຖືກຂົ່ມເຫງ. ແຕ່ເຮົາຕ້ອງຢ້ານບໍ?

1. ເປັນຫຍັງເຮົາຈຶ່ງຮູ້ວ່າເຮົາຈະຖືກຂົ່ມເຫງ?

ຄຳພີໄບເບິນບອກຈະແຈ້ງວ່າ: “ທຸກຄົນທີ່ຕັ້ງໃຈໃຊ້ຊີວິດດ້ວຍຄວາມເຫຼື້ອມໃສພະເຈົ້າແລະເປັນລູກສິດຂອງພະຄລິດເຢຊູກໍຈະຖືກຂົ່ມເຫງຄືກັນ.” (2 ຕີໂມທຽວ 3:12) ພະເຢຊູຖືກຂົ່ມເຫງຍ້ອນເພິ່ນບໍ່ໄດ້ເປັນຄົນຂອງໂລກທີ່ຊາຕານປົກຄອງ. ເຮົາກໍບໍ່ໄດ້ເປັນຄົນຂອງໂລກນີ້ຄືກັນ ດັ່ງນັ້ນ ເຮົາເລີຍບໍ່ແປກໃຈເມື່ອເຮົາຖືກຂົ່ມເຫງໂດຍອົງກອນທາງສາສະໜາແລະລັດຖະບານຕ່າງໆຂອງໂລກນີ້.—ໂຢຮັນ 15:18, 19

2. ເຮົາຈະກຽມໂຕໃຫ້ພ້ອມທີ່ຈະຮັບມືກັບການຂົ່ມເຫງໄດ້ແນວໃດ?

ເພື່ອຈະກຽມໂຕໃຫ້ພ້ອມ ເຮົາຕ້ອງໄວ້ໃຈພະເຢໂຫວາໃຫ້ຫຼາຍຂຶ້ນຕັ້ງແຕ່ຕອນນີ້. ເຮົາຈະເຮັດແບບນັ້ນໄດ້ໂດຍຈັດເວລາໄວ້ທຸກມື້ເພື່ອອະທິດຖານ ອ່ານຄຳພີໄບເບິນ ແລະເຂົ້າຮ່ວມປະຊຸມກັບປະຊາຄົມເປັນປະຈຳ. ການເຮັດແບບນີ້ຈະເຮັດໃຫ້ເຮົາມີກຳລັງທີ່ຈະຮັບມືກັບການຂົ່ມເຫງທຸກຮູບແບບຢ່າງກ້າຫານ ແມ່ນແຕ່ການຕໍ່ຕ້ານທີ່ມາຈາກຄົນໃນຄອບຄົວ. ອັກຄະສາວົກໂປໂລທີ່ເຄີຍຖືກຂົ່ມເຫງຫຼາຍເທື່ອຂຽນວ່າ: “ພະເຢໂຫວາເປັນຜູ້ຊ່ວຍເຫຼືອຂ້ອຍ ຂ້ອຍຈະບໍ່ຢ້ານຫຍັງ.”—ເຮັບເຣີ 13:6

ນອກຈາກນັ້ນ ເຮົາຍັງຕ້ອງເພີ່ມຄວາມກ້າຫານໃຫ້ຫຼາຍຂຶ້ນໂດຍປະກາດເປັນປະຈຳ. ການເຮັດແບບນີ້ຈະເຮັດໃຫ້ເຮົາໄດ້ຮຽນຮູ້ທີ່ຈະໄວ້ໃຈພະເຢໂຫວາແລະເອົາຊະນະການຢ້ານຄົນ. (ສຸພາສິດ 29:25) ຖ້າເຮົາກ້າປະກາດຕັ້ງແຕ່ຕອນນີ້ ເຮົາກໍຈະບໍ່ເຊົາປະກາດເຖິງວ່າລັດຖະບານຈະສັ່ງຫ້າມວຽກຂອງເຮົາ.—1 ເທຊະໂລນິກ 2:2

3. ຖ້າເຮົາອົດທົນກັບການຖືກຂົ່ມເຫງ ເຮົາຈະໄດ້ປະໂຫຍດຫຍັງ?

ເຮົາບໍ່ໄດ້ມັກທີ່ຖືກຂົ່ມເຫງ ແຕ່ຖ້າເຮົາອົດທົນກັບການຂົ່ມເຫງໄດ້ ຄວາມເຊື່ອຂອງເຮົາກໍຈະເຂັ້ມແຂງຂຶ້ນ. ແລະເຮົາຈະສະໜິດກັບພະເຢໂຫວາຫຼາຍຂຶ້ນ ເພາະເຮົາເຫັນວ່າເພິ່ນຊ່ວຍເຮົາຕອນທີ່ເຮົາຮູ້ສຶກວ່າທົນບໍ່ໄຫວແລ້ວ. (ອ່ານຢາໂກໂບ 1:2-4) ພະເຢໂຫວາຮູ້ສຶກເຈັບປວດທີ່ເຫັນເຮົາຖືກຂົ່ມເຫງ ແຕ່ເພິ່ນກໍດີໃຈທີ່ເຫັນວ່າເຮົາບໍ່ຍອມແພ້ແລະອົດທົນຕໍ່ໄປ. ຄຳພີໄບເບິນບອກວ່າ: “ຖ້າທົນທຸກຍ້ອນເຮັດດີ ພວກເຈົ້າກໍເຮັດໃຫ້ພະເຈົ້າພໍໃຈ.” (1 ເປໂຕ 2:20) ຖ້າເຮົາສັດຊື່ຕໍ່ພະເຢໂຫວາ ເພິ່ນຈະໃຫ້ເຮົາມີຊີວິດທີ່ມີຄວາມສຸກຕະຫຼອດໄປໃນໂລກທີ່ມີແຕ່ຄົນທີ່ຮັບໃຊ້ເພິ່ນ ແລະໃນຕອນນັ້ນກໍຈະບໍ່ມີໃຜຂົ່ມເຫງເຮົາອີກເລີຍ.—ມັດທາຍ 24:13

ຮຽນຮູ້ຫຼາຍຂຶ້ນ

ໃຫ້ເຮົາມາເບິ່ງວ່າ ອັນໃດເຮັດໃຫ້ເຮົາໝັ້ນໃຈວ່າເຮົາຈະສັດຊື່ຕໍ່ພະເຢໂຫວາໄດ້ເຖິງວ່າຈະຖືກຂົ່ມເຫງແລະໝັ້ນໃຈວ່າເພິ່ນຈະໃຫ້ລາງວັນເຮົາ.

4. ເຈົ້າອົດທົນການຕໍ່ຕ້ານຈາກຄົນໃນຄອບຄົວໄດ້

ພະເຢຊູຮູ້ວ່າອາດມີບາງຄົນໃນຄອບຄົວຂອງເຮົາທີ່ບໍ່ຢາກໃຫ້ເຮົາຮັບໃຊ້ພະເຢໂຫວາ. ອ່ານມັດທາຍ 10:34-36 ແລ້ວລົມກັນກ່ຽວກັບຄຳຖາມຕໍ່ໄປນີ້:

ອາດເກີດຫຍັງຂຶ້ນໄດ້ຖ້າຄົນໜຶ່ງໃນຄອບຄົວຕັດສິນໃຈຮັບໃຊ້ພະເຢໂຫວາ?

ໃຫ້ເຮົາມາເບິ່ງຕົວຢ່າງໜຶ່ງນຳກັນ ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ພະເຢໂຫວາພາເຮົາເຂົ້າມາ (5:13)

ເຈົ້າຈະເຮັດແນວໃດຖ້າຄົນໃນຄອບຄົວຫຼືໝູ່ຄູ່ພະຍາຍາມເຮັດໃຫ້ເຈົ້າເຊົາຮັບໃຊ້ພະເຢໂຫວາ?

ອ່ານຄຳເພງ 27:10 ແລະມາຣະໂກ 10:29, 30. ຫຼັງຈາກອ່ານຂໍ້ຄຳພີຂໍ້ໜຶ່ງຈົບແລ້ວ ໃຫ້ຖາມຄຳຖາມທີ່ຢູ່ທາງລຸ່ມແລະໃຫ້ເຮັດແບບນີ້ຈົນຄົບທຸກຂໍ້.

ຄຳສັນຍານີ້ຊ່ວຍເຈົ້າແນວໃດເມື່ອຄົນໃນຄອບຄົວຫຼືໝູ່ຄູ່ພະຍາຍາມເຮັດໃຫ້ເຈົ້າເຊົາຮັບໃຊ້ພະເຢໂຫວາ?

5. ນະມັດສະການພະເຢໂຫວາຕໍ່ໄປເຖິງວ່າຈະຖືກຂົ່ມເຫງ

ຕອນທີ່ຄົນອື່ນພະຍາຍາມເຮັດໃຫ້ເຮົາເຊົາຮັບໃຊ້ພະເຢໂຫວາ ເຮົາຕ້ອງມີຄວາມກ້າເພື່ອຈະຮັບໃຊ້ເພິ່ນຕໍ່ໄປ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ສະແດງຄວາມກ້າຫານເຖິງວ່າຖືກຂົ່ມເຫງ (6:27)

ຕົວຢ່າງຂອງພີ່ນ້ອງໃນວິດີໂອເຮັດໃຫ້ເຈົ້າມີຄວາມກ້າຫຼາຍຂຶ້ນບໍ? ຍ້ອນຫຍັງ?

ອ່ານກິດຈະການ 5:27-29 ແລະເຮັບເຣີ 10:24, 25. ຫຼັງຈາກອ່ານຂໍ້ຄຳພີຂໍ້ໜຶ່ງຈົບແລ້ວ ໃຫ້ຖາມຄຳຖາມທີ່ຢູ່ທາງລຸ່ມແລະໃຫ້ເຮັດແບບນີ້ຈົນຄົບທຸກຂໍ້.

ເປັນຫຍັງເຮົາຕ້ອງນະມັດສະການພະເຢໂຫວາຕໍ່ໄປເຖິງວ່າລັດຖະບານຈະຫ້າມບໍ່ໃຫ້ເຮົາປະກາດຫຼືປະຊຸມນຳກັນ?

6. ພະເຢໂຫວາຈະຊ່ວຍເຈົ້າໃຫ້ອົດທົນໄດ້

ບໍ່ວ່າພະຍານພະເຢໂຫວາຈະອາຍຸເທົ່າໃດຫຼືມາຈາກໃສ ເຂົາເຈົ້າກໍຮັບໃຊ້ພະເຢໂຫວາຢ່າງພັກດີຕໍ່ໄປເຖິງວ່າຖືກຂົ່ມເຫງ. ໃຫ້ເຮົາມາເບິ່ງວ່າອັນໃດຊ່ວຍເຂົາເຈົ້າໄດ້ ເປີດວິດີໂອ. ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ພະເຢໂຫວາພະເຈົ້າຈະເຮັດໃຫ້ຂ້ອຍເຂັ້ມແຂງ (3:40)

ໃນວິດີໂອ ອັນໃດຊ່ວຍພີ່ນ້ອງໃຫ້ອົດທົນໄດ້?

ອ່ານໂຣມ 8:35, 37-39 ແລະຟີລິບປອຍ 4:13. ຫຼັງຈາກອ່ານຂໍ້ຄຳພີຂໍ້ໜຶ່ງຈົບແລ້ວ ໃຫ້ຖາມຄຳຖາມທີ່ຢູ່ທາງລຸ່ມແລະໃຫ້ເຮັດແບບນີ້ຈົນຄົບທຸກຂໍ້.

ເປັນຫຍັງຂໍ້ຄຳພີນີ້ຈຶ່ງຊ່ວຍເຈົ້າໃຫ້ໝັ້ນໃຈວ່າເຈົ້າຈະອົດທົນໄດ້ ບໍ່ວ່າຈະຕ້ອງເຈິກັບການຂົ່ມເຫງແບບໃດກໍຕາມ?

ອ່ານມັດທາຍ 5:10-12 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຖິງວ່າເຈົ້າຈະຖືກຂົ່ມເຫງ ແຕ່ຍ້ອນຫຍັງເຈົ້າຈຶ່ງມີຄວາມສຸກໄດ້?

ພະຍານພະເຢໂຫວາຫຼາຍລ້ານຄົນສາມາດອົດທົນກັບການຕໍ່ຕ້ານໄດ້ສຳເລັດ. ເຈົ້າກໍເຮັດໄດ້ຄືກັນ!

ບາງຄົນເວົ້າວ່າ: “ຖ້າຖືກຂົ່ມເຫງ ຂ້ອຍຄືຊິທົນບໍ່ໄຫວດອກ.”

ຖ້າມີຄົນເວົ້າແບບນີ້ ເຈົ້າຄິດວ່າຂໍ້ຄຳພີໃດຈະຊ່ວຍໃຫ້ລາວໝັ້ນໃຈວ່າຈະອົດທົນໄດ້?

ສະຫຼຸບ

ພະເຢໂຫວາເຫັນຄ່າຄວາມພະຍາຍາມຂອງເຮົາທີ່ຈະຮັບໃຊ້ເພິ່ນຕໍ່ໄປເຖິງວ່າຈະຖືກຂົ່ມເຫງ. ແລະເພິ່ນຈະຊ່ວຍເຮົາໃຫ້ອົດທົນໄດ້.

ຄຳຖາມທົບທວນ

ເປັນຫຍັງເຮົາຈຶ່ງຮູ້ວ່າເຮົາຈະຖືກຂົ່ມເຫງ?
ເຈົ້າຈະເຮັດຫຍັງໄດ້ຕັ້ງແຕ່ຕອນນີ້ເພື່ອຈະພ້ອມຮັບມືກັບການຖືກຂົ່ມເຫງ?
ເປັນຫຍັງເຈົ້າຈຶ່ງໝັ້ນໃຈວ່າເຈົ້າຈະຮັບໃຊ້ພະເຢໂຫວາຕໍ່ໄປໄດ້ເຖິງວ່າຈະຕ້ອງເຈິກັບການຂົ່ມເຫງແບບໃດກໍຕາມ?

ມື້ທີ່ຮຽນຈົບບົດນີ້:

ສິ່ງທີ່ເຈົ້າເຮັດໄດ້

ຖາມພີ່ນ້ອງຄລິດສະຕຽນວ່າ: “ເຄີຍມີໃຜພະຍາຍາມເຮັດໃຫ້ເຈົ້າເຊົາຮັບໃຊ້ພະເຢໂຫວາບໍ? ແລ້ວເຈົ້າເຮັດແນວໃດເພື່ອຈະຮັບໃຊ້ພະເຢໂຫວາຕໍ່ໄປໄດ້?”

ອື່ນໆ:

ສິ່ງທີ່ເຈົ້າເຮັດໄດ້