ZIRLAI 59
Tihduhdahna Chhel Takin I Tuar Thei
Kristian tinte chuan engtik nîah emaw chuan dodâlna emaw tihduhdahna hial emaw kan la tâwk vek ang. Chu chu kan hlauh a ngai em?
1. Engvângin nge tihduhdahna tawrh kan inrin?
Bible-in chiang taka min hrilh vâng a ni: “Tu pawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin. (2 Timothea 3:12) Isua chu Setana khawvêla mi a nih loh avângin tihduhdah a ni a. Keini pawh khawvêla mi kan nih loh avângin he khawvêl sawrkârte leh sakhaw pâwlte’n min tihduhdah hunah mak kan ti lo.—Johana 15:18, 19.
2. Engtin nge tihduhdahna atân kan inbuatsaih theih?
Jehova kan rinna tûna kan tihngheh a ngai a. Nî tin a hnêna ṭawngṭai nân leh a Thu ṭhenkhat chhiar nân hun insiam rawh. Kohhran inkhâwmahte tel ziah rawh. Hêng thiltihte hian tihduhdahna eng pawh, i chhûngte hnên aṭanga lo kal pawh ni se, hmachhawn thei tûra i mamawh chakna a pe ang che. Tihduhdahna tâwk fo ṭhîn tirhkoh Paula chuan heti hian a ziak a ni: “Lalpa chu mi ṭanpuitu a ni, ka hlau lo vang,” tiin.—Hebrai 13:6.
Thu hrilhnaa tel ziahna hmangin huaisenna kan nei chho thei bawk a. Thu hrilhna chuan Jehova rinchhan tûr leh mihring hlauhna eng pawh hneh tûrin min zirtîr a ni. (Thufingte 29:25) Tûna thu hril tûra huaisenna i neih chuan sawrkâr thuneitute’n kan rawngbâwlna an khap beh hunah pawh thu hril zawm zêl tûrin i inpeih ang.—1 Thessalonika 2:2.
3. Engtin nge tihduhdahna chhel taka tawrh chu kan hlâwkpui?
Tihduhdahna tawrh chu nuam kan ti lo ngei mai; mahse, hlawhtling taka kan tawrh chhuah hian kan rinna a nghet lehzual a. Tuar chhuak thei tawh lo tûra kan inngaih huna a ṭanpuina kan dawn hian Jehova kan hnaih lehzual a ni. (Jakoba 1:2-4 chhiar rawh.) Jehova’n kan hrehawm tuar a hmuh hian a rilru a nâ a; mahse, chhel taka kan tuar a hmuh hian a lâwm a ni. Bible chuan heti hian a sawi: “Thil tihṭhat a, in tuarin chhel taka in tuar chuan chu chu Pathian lâwm zâwng a ni,” tiin. (1 Petera 2:20) Rinawm taka tuar chhuaktu zawng zawngte hnêna Jehova pêk tûr lâwmman chu biakna dik dodâlna awm lohna khawvêla chatuan nunna a ni.—Matthaia 24:13.
ZIR BELHIN HMUH BELH RAWH
Tihduhdahna tuar chung pawha Jehova chunga kan rinawm reng theih chhan leh lâwmman min pêk dân tûr hria ang che.
4. Chhûngte dodâlna chhel takin i tuar thei
Isua chuan kan chhûngte’n Jehova be tûra kan thu tlûkna siam an pawm lo thei tih a hre chiang a. Matthaia 10:34-36 chhiarin, he zawhna hi sawiho vang che u:
-
Chhûngkaw zînga pakhatin Jehova rawngbâwl a thlan hian eng thil nge thleng thei?
Hemi chungchânga entîrna pakhat hriat nân, VIDEO chu chhuah la, a hnuaia zawhna hi sawiho vang che u.
-
I chhûngte, a nih loh leh i ṭhiante’n Jehova rawng i bâwlna tihtâwp tum ta se, eng nge i tih ang?
Sâm 27:10 leh Marka 10:29, 30 chhiar la. Bible chângte chhiar hnuah he zawhna hi sawiho vang che u:
-
I chhûngte, a nih loh leh i ṭhiante hnên aṭanga dodâlna i tâwk a nih chuan engtin nge he thutiam hian a ṭanpui theih che?
5. Tihduhdahna tâwk chung pawhin Jehova be chhunzawm zêl rawh
Mi dangte’n bânsantîr min tum laia Jehova rawngbâwl tûr chuan huaisen a ngai a ni. VIDEO chu chhuah la, a hnuaia zawhna hi sawiho vang che u.
-
He video-a eng entawn tûrte hian nge chakna pe che?
Tirhkohte 5:27-29 leh Hebrai 10:24, 25 chhiar la. Bible châng târ lan pakhat in chhiar zawh apiangin he zawhna hi sawiho vang che u:
-
Kan thu hrilhna leh kan inkhâwmna khap beh a nih pawhin engvângin nge Jehova biak chhunzawm zêl chu thil pawimawh tak a nih?
6. Jehova’n chhel taka tuar tûrin a ṭanpui ang che
Jehova Thuhretu a pui a pangte leh ṭobul hrang hrang neite chuan tihduhdahna an tâwk chung pawhin rinawm takin Jehova rawng an bâwl zêl a. Anmahni ṭanpuitu hriat nân, VIDEO chu chhuah la. Tichuan, a hnuaia zawhna hi sawiho vang che u.
-
Video-ah khân, Thuhretute chu engin nge chhel taka tuar tûra ṭanpui?
Rom 8:35, 37-39 leh Philippi 4:13 chhiar la. Bible châng târ lan pakhat in chhiar zawh apiangin he zawhna hi sawiho vang che u:
-
Engtin nge he Bible châng hian eng ang fiahna pawh chhel takin i tuar thei tih rintîr che?
Matthaia 5:10-12 chhiarin, he zawhna hi sawiho vang che u:
-
Engvângin nge tihduhdahna tuar chung pawhin i hlim theih?
Jehova betu maktaduai tam takte chuan hlawhtling takin dodâlna an tuar chhuak a. Nang pawhin i tuar chhuak ve thei!
MI ṬHENKHAT SAWI DAN: “Tihduhdahna ka tuar thei lo vang.”
-
Eng Bible chângte’n nge an mamawh inrintâwkna pe thei?
KHAIKHAWMNA
Jehova chuan tihduhdahna tuar chung pawha a rawng bâwl tûra theih tâwp kan chhuahna chu a ngaihlu a. A ṭanpuinain hlawhtling takin kan tuar chhuak thei!
Ennawnna
-
Engvângin nge Kristiante’n tihduhdahna tuar an inbeisei ang?
-
Tihduhdahna a lo thlen hun atâna inpeih tûrin tûnah eng nge i tih theih?
-
Fiahna eng pawh tâwk chung pawhin Jehova rawng i bâwl thei tih rinnghehna nei tûrin engin nge ṭanpui thei che?
HRIAT BELH NAN
Ṭhalai unaupa pakhatin a tualdâwihna avânga lung in a tân laia chhel taka tuar tûra Jehova’n a ṭanpui dân a sawi chu en rawh.
Dodâlna tâwk chung pawha kum tam tak chhûng rinawm taka Jehova rawngbâwl nupa tuak khat ṭanpuitu chu ngaihtuah rawh.
Huaisen taka tihduhdahna hmachhawn dân chhiar rawh.
“Tihduhdahna Atân Tûnah Inbuatsaih Rawh” (Vênnainsâng, July 2019)
Engtin nge chhûngkuate dodâlna chu kan thlîr ang a, engtin nge chûng harsatnate chu hlawhlting takin kan hmachhawn theih?
“Thutak Chuan, ‘Remna Ni Lovin, Khandaih’ A Lêntîr” (Vênnainsâng, October 2017)
You May Also Like
ZAWH FO ṬHIN ZAWHNATE
Jehova Thuhretute Ruahman Bible Zirna Chu Eng Nge Ni?
Jehova Thuhretute ruahman a thlâwna sawihona phûrawm takah Bible lehlin eng pawh i hmang thei a. I chhûngte leh i ṭhian tu pawh i sâwm thei a ni.
