XNAQʼTZBʼIL 59
Jaku tzikʼx ikʼbʼil tuʼna
Kʼokel tilil kyuʼn xjal tuʼn tkyaj qtzaqpiʼn tuʼn qajbʼen te Jehová, axpe ikx kʼokel kybʼinchaʼn nya bʼaʼn qiʼj. ¿Okpe qo tzajel xobʼ tuʼn jlu?
1. ¿Tiquʼn mintiʼ tuʼn qjaw sekʼpaj aj qel ikʼun kyuʼn xjal?
In tzaj tqʼamaʼn Biblia qa «kykyaqil qeju kyajbʼil kukx tuʼn kynimante Jesucrist, ok che yajlanjtzel» (2 Timoteo 3:12). El ikʼun Jesús tuʼnju mintiʼ okx tqʼon tibʼ kyxol xjal ateʼ tjaqʼ tkawbʼil Satanás. Ax ikx qe, mintiʼ in nokx qqʼon qibʼ kyxol. Tuʼntzunju, mintiʼ tuʼn qjaw sekʼpaj aj qel ikʼun kyuʼn aj kawil ex kyuʼn okslabʼil nya ax tok (Juan 15:18, 19).
2. ¿Tzeʼn jaku bʼaj qbʼinchaʼn qten naʼmxtoq qel ikʼun?
Nim toklen tuʼn tbʼaj qchʼiysaʼn qʼuqbʼil qkʼuʼj tiʼj Jehová toj ambʼil jaʼlo. ¿Tzeʼn jaku bʼant jlu quʼn? Aj tel qpaʼn ambʼil tuʼn qnaʼn Dios, aj quʼjin tiʼj Biblia tkyaqil qʼij ex aj qnaqʼet tuʼn qten kyoj chmabʼil. Qa ma bʼant jlu tuʼna, kʼonil tiʼja tuʼn miʼn ttzaj xobʼa aj tpon ambʼil aj tel ikʼuna, axpe ikx qa ma tzaj kyqʼoj toj tjaya tiʼja. Kukx el ikʼun apóstol Pablo, pero kubʼ ttzʼibʼin jlu: «Ate Qman onil weye; mlay chin xobʼe» (Hebreos 13:6).
Ax ikx, qa kukx ma qo pakbʼan, jaku tzʼonin qiʼj tuʼn tten qipumal. ¿Tiquʼn? Tuʼnju aj qpakbʼan, mas in nok qeʼ qkʼuʼj tiʼj Jehová ex mintiʼ in qo tzaj xobʼ kywitz xjal (Proverbios 29:25). Qa mintiʼ ma tzaj xobʼa toj ambʼil jaʼlo, kʼonil tiʼja tuʼn kukx tpakbʼana, axpe ikx qa ma tzʼel tiʼn gobierno ambʼil qe tuʼn qpakbʼan (1 Tesalonicenses 2:2).
3. ¿In tzajpe tbʼanel qe qa ma tzikʼx ikʼbʼil quʼn?
Nya qaj tuʼn qel ikʼun kyuʼn xjal. Pero qa ma tzikʼx ikʼbʼil quʼn, mas kchʼiyel qʼuqbʼil qkʼuʼj. Ax ikx, aj tel qnikʼ tiʼj qa in tzaj tqʼoʼn Jehová qipumal tuʼn kukx tikʼx quʼn, mas in qo ok laqʼeʼ ttxlaj (uʼjinktza Santiago 1:2-4). In tzaj tbʼis Jehová aj tok tkeʼyin qa in qo el ikʼun, pero in jaw tzalaj tuʼnju kukx in nok tilil quʼn. In tzaj tqʼamaʼn Biblia jlu: «Qa ma che yajlanjtze tuʼn tlaj ju bʼaʼn in kybʼinchaʼne, ex qa ma tzʼikx kyuʼne, atzun jlu bʼaʼn nneʼla tuj twitz Dios» (1 Pedro 2:20). Kykyaqilx qeju in nikʼx kyuʼn ex kukx in che ten tzʼaqli twitz Jehová, tzul qʼoʼn kychwinqlal te jumajx toj Tbʼanel Najbʼil jatumel mlay ten jun aj qʼoj tiʼj kʼulbʼil axix tok (Mateo 24:13).
QO JYON MAS TQANIL
Qo xnaqʼtzan tiʼj tzeʼn jaku qo ten tzʼaqli twitz Jehová maske in qo el ikʼun kyuʼn xjal. Ex tiʼ oyaj tzul tqʼoʼn qe qa kukx ma tzikʼx quʼn.
4. Jaku tzikʼx tuʼna qa ma tzʼel ikʼuna kyuʼn toj tjaya
Tqʼama Jesús qa qo elel ikʼun kyuʼn junjun qfamilia tuʼnju in qo ajbʼen te Jehová. Kyuʼjinktze Mateo 10:34 a 36 ex che yoline tiʼj xjel lu:
-
Aj tkubʼ t-ximen jun xjal tuʼn tajbʼen te Jehová, ¿tiʼ kymod toj tja kbʼel kyyekʼin tukʼil?
Tuʼn tok kyojtzqiʼne junjun xjal o bʼaj jlu kyiʼj, kyqʼonke kywitze tiʼj VIDEO ex che yoline tiʼj xjel lu:
-
¿Tiʼ kbʼantel tuʼna aj ttzaj tqʼamaʼn jun toj tjaya moqa jun tamiwa tuʼn ya miʼn tajbʼena te Jehová?
Kyuʼjinktze Salmo 27:10 ex Marcos 10:29 ex 30. Otoqxi jaw kyuʼjine teyele junjun texto, che yoline tiʼj xjel lu:
-
¿Tzeʼn jaku tzʼonin tziybʼil lu tiʼja aj tel ikʼuna kyuʼn toj tjaya ex qe tamiwa?
5. Kukx tzʼajbʼena te Jehová maske in nel ikʼuna
Nim toklen tuʼn tten qipumal aj ttzaj kyqʼamaʼn txqantl qe tuʼn ya miʼn qajbʼen te Jehová. Kyqʼonke kywitze tiʼj VIDEO ex che yoline tiʼj xjel lu:
-
¿Alkye junjun tiʼ ma tzʼetz yekʼin toj video jaku tzʼonin tiʼja tuʼn tten tipumala?
Kyuʼjinktze Hechos 5:27 a 29 ex Hebreos 10:24 ex 25. Aj tjaw kyuʼjine teyele junjun texto, che yoline tiʼj xjel lu:
-
¿Tiquʼn nim toklen tuʼn kukx qajbʼen te Jehová maske jaku tzʼel kyiʼn aj kawil ambʼil qe tuʼn qpakbʼan ex tuʼn tok qchmon qibʼ?
6. Kʼonil Jehová tiʼja tuʼn tikʼx tuʼna
Ateʼ nim testigos de Jehová junxichaq kyabʼqʼi ex kytnam, kukx o che ten tzʼaqli twitz Jehová maske o che el ikʼun. Tuʼn tel kynikʼe tiʼj tiʼ o tzʼonin kyiʼj, kyqʼonke kywitze tiʼj VIDEO. Yajxitl che yoline tiʼj xjel lu:
-
¿Tiʼ onin kyiʼj erman ẍe etz yekʼin toj video tuʼn tikʼx ikʼbʼil kyuʼn?
Kyuʼjinktze Romanos 8:35 ex 37 a 39, ex Filipenses 4:13, TNM. Otoqxi jaw kyuʼjine teyele junjun texto, che yoline tiʼj xjel lu:
-
¿Tzeʼn in tzaj ttziyen texto lu qa jaku tzikʼx alkyexku nya bʼaʼn tuʼna?
Kyuʼjinktze Mateo 5:10 a 12 ex che yoline tiʼj xjel lu:
-
¿Tiquʼn jaku tzalaja maske jaku tzʼok weʼya twitz ikʼbʼil?
Nim tmajen Jehová o tzikʼx ikʼbʼil kyuʼn. ¡Ax ikx teya jaku tzikʼx tuʼna!
AJU IN TZAJ KYQʼAMAʼN JUNJUN XJAL: «Mlayx tzikʼx wuʼne aj wel ikʼune».
-
¿Alkyeqe texto jaku che onin tiʼj jun xjal in kubʼ t-ximen jlu tuʼn miʼn ttzaj xobʼ?
TOJ CHʼIN YOL
Nim toklen toj twitz Jehová tuʼnju kukx in qo ajbʼen te maske in qo el ikʼun. ¡Tuʼn tonbʼil jaku tzikʼx ikʼbʼil quʼn!
Aju ma qo yolin tiʼj
-
¿Tiquʼn mintiʼ tuʼn qjaw sekʼpaj aj qel ikʼun kyuʼn xjal?
-
¿Tzeʼn jaku bʼaj tbʼinchaʼn ttena aj tpon ambʼil tuʼn tel ikʼuna kyuʼn xjal?
-
¿Tiquʼn qʼuqli tkʼuʼja tiʼj qa kukx jaku tzʼajbʼena te Jehová maske in nel ikʼuna?
OJTZQINKA CHʼINTL
Qʼonka twitza tiʼj tzeʼn onin Jehová tiʼj jun ermano kuʼxun tej tokx qʼoʼn toj cárcel tuʼnju mintiʼ okx tqʼon tibʼ kyxol xjal.
Ojtzqinka tiʼ onin tiʼj jun mejebʼleʼn tuʼn kukx kyajbʼen te Jehová maske i el ikʼun.
Bʼaʼn tuʼn tbʼaj tbʼinchaʼna ttena naʼmxtoq tok weʼya twitz ikʼbʼil.
«Qbʼinchanku qten naʼmxtoq qok weʼ twitz ikʼbʼil» (Aju Xqʼuqil, julio te 2019)
¿Tiʼ jaku bʼant quʼn aj qel ikʼun kyuʼn toj qja tuʼntzun kukx qtzalaj ex tuʼn kukx qajbʼen te Jehová?
«Nya ‹tzalajbʼil› in tzaj tuʼn axix tok, sino qʼoj» (Aju Xqʼuqil, octubre te 2017)
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
