MPANTTA 59
Nvilele ulupatthiya nlipakoono nrima!
Unaahala uphiya ukati makristau otheene anhalaaya uthanyiya ni hataa ulupatthiya. Masi niireke iyo itthwiiyo ihaana inoopopihaka?
1. Kontha isiyani ninlamuliyeehu uweherera ulupatthiya?
Ibiiblya ineera: “Otheene ale ampheela ukhala yanswalelaka Nluku, wamoca ni Yesu Kristu, ciicammo anaahala ulupatthiya.” (2 Timotiyu 3:12) Yesu anlupatthiya kontha khaapanka mphantte wo ila ituninya inhooleliya ni Sotwaniila. Ni hiiva ciicammo khanimpanka mphantte wo ila ituninyeela. Phimaana, khaninkhala ootikhinihiya noonaka nalupatthiyaka niikuvernu ni niittiini cirivo va watuninyani va.—Joau 15:18, 19.
2. Manannani cinlamuliyeehu wiitthenkaca wiira navilele nalupatthiyaka?
Nihaana nilipihacaka unkhuluvela wihu Yehova nenna co. Khula nihuku, nkumihe ukati wiira nlompe ni nsome Ibiiblya. Ciicammo nhihiyerere urwaa umikutthaanoni. Nnya citthunnya cinaahala wuuvahani ikuru wiira nvilele ulupatthiya nlipaka nrima, hataa ukhalaka wiira atthu anhala wuulupatthani akhanle amuciinyu. Apostolu Paulu aalupatthiye cinene aheera: “Yehova phi nikavihero naka; akinhala woova.”—Maberewu 13:6.
Itthu ikhwaawe inhala unikavihera wuncerera ulipa wihu nrima ukhanle uhihiyerera urwaa wuulalyeerani. Ulalyeera unaanikavihera utepa unkhuluvela Yehova ni unaanikavihera uhiya uwoova apinaatamu. (Miruku 29:25) Wiikurumica uhoova ulalyeera nna co, unaahala unitthenkaca wiira nihihiyerere ulalyeera, hataa ukhalaka wiira ikuvernu inaahala unihiiha uvara uyo ntekooyo.—1 Atesalonika 2:2.
3. Kontha isiyani uvilela ukati unlupatthiyeehu unaahala unikavihera ukhalana waamini woolipa?
Khaavo unoncivela ulupatthiya. Masi navilelaka ukati unlupatthiyeehu, waamini wihu unaahala ulipa cinene. Ni ninaatepa umwaattamela Yehova, kontha ninawooneeha imwaneeneehu wiira Yehova naanivaha ikuru noonaka wiira khaninhala ukhitiri-tho uvilela. (Nsome Tiyaku 1:2-4.) Yehova unanwerya nrima anoonaka nihuvahuvaka. Masi uyo nokhala ootteeliya anoonaka navilelaka. Ibiiblya ineera: “Mwavilelaka uhuva nlattu woopanka citthu comaana, iyo itthu inoncivela Nluku.” (1 Peturu 2:20) Yehova nawaakhuluveliha ukumi woohimala upeephoni otheene ale anhala uvilela mpaka wiimaleloni.—Matewus 24:13.
MUNCERERE WIITTHUCA WINYU
Moone kontha isiyani wanaakhitirya umwiiwelela Yehova hataa nalupatthiyaka ni ciicammo moone iparakha cinaakheleehu napankaka iyo.
4. Nnaahala ukhitiri uvilela mwaalupatthiyaka naamuciinyu
Yesu ancuwela wiira ahaavo amuciihu yahaahala upheela unoona ninswalelaka Yehova. Nsome Matewus 10:34-36, ni mwamalihaka usoma, moopele mwaha nna nikohonna:
-
Isiyani Yesu yuulumilyaawe wiira pooti yanhala umwiirannyeela ntthu nolakela unswalela Yehova?
Wiira moone ntakihero, moone IVIDIYU, ni mwamalihaka woona, moopele mwaha nna nikohonna:
-
Isiyani nyuuva yaahaleenyu upanka wakhalaka wiira mmuciinyu awula mpatthaniinyu naawaateelihani unswalela Yehova?
Nsome Isaalimu 27:10 ni Markus 10:29, 30. Mwamalihaka usoma iveerusu cotheene nnya, moopele mwa nna nikohonna:
-
Manannani ila itthu ikhuluvelihiyeela cinhalaaya wuukaviherani uvilela, wakhalaka wiira amuciinyu awula asipatthaniinyu anaamananiha uwaateelihani unswalela Yehova?
5. Nhihiyerere unswalela Yehova hataa nlupatthiyaka
Nihaana nilipaka nrima wiira nihihiyerere unswalela Yehova hataa ukhalaka wiira ahaavo ammananiha unihiihaa. Moone IVIDIYU, ni mwamalihaka woona, moopele mwaha nna nikohonna:
-
Matakihero yonneehu nvidiyuni anlipihaca cani waamini winyu?
Nsome Miteko 5:27-29 ni Maberewu 10:24, 25. Mwamalihaka usoma iveerusu cotheene nnya, moopele mwaha nna nikohonna:
-
Kontha isiyani ikhanlyaaya itthu yofayita uhihiyerera unswalela Yehova hataa ukhalaka wiira nteko woolalyeera ni mikutthaano cihu cinaakhottihiya?
6. Yehova naahala wuukaviherani mwalupatthiyaka
Masaahiti a Yehova o myaakha ni ikhapila coovirikana khanhiyerera umwiiwelela Yehova hataa yalupatthiyaka. Wiira ncuwele itthu yaakavihere ayo mayamunnaayo ni mayanuunwaayo, moone IVIDIYU, ni mwamalihaka woona, moopele mwaha nna nikohonna:
-
Nhina ividiyu yonneehu, isiyani yaakavihere mayamunna ni asirokorihu uvilela?
Nsome Arooma 8:35, 37-39 ni Afilipo 4:13. Mwamalihaka usoma iveerusu cotheene nnya, moopele mwaha nna nikohonna:
-
Nnya iveerusunnya cinlipihaca cani ukhuluvela winyu wiira nnaahala ukhitiri uvilela mwattehiyaka?
Nsome Matewus 5:10-12, ni mwamalihaka usoma, moopele mwaha nna nikohonna:
-
Kontha isiyani nyuuva pooti nnokhaleenyu ootteeliya hataa nlupatthiyaka?
Masaahiti a Yehova imiliyau cene anaakhitiri uvilela uthanyiya. Nyuuva ciicammo pooti wankhitiriinyu!
ATTHU AKIINA ANEERA: “Mi akinhala ukhitiri uvilela kalupatthiyaka vale.”
-
Iveerusuni co mbiiblyani caahala unkavihera uyo ntthuuyo ukhala oolipa nrima?
UTHIKILELA
Yehova naavaha ifayita wiikurumica wihu unswalela hataa nalupatthiyaka. Nakaviheriyaka ni uyoova, ninaahala ukhitiri uvilela!
Wuupuwela
-
Kontha isiyani makristau ahaana yawehereraka ulupatthiya?
-
Isiyani nyuuva inlamuliyeenyu upanka nna co wiira nhale ukhitiri uvilela mwalupatthiyaka?
-
Kontha isiyani nyuuva nnolamuliyeenyu ukupali wiira nnaahala ukhitiri unswalela Yehova hataa nlupatthiyaka?
MWAPHEELAKA UCUWELA CITTHU CIKIINA
Moone manannani Yehova cankavihenryaawe uvilela munneehu aatthukiye nlattu woohitthuna ukelakela isiyaasa.
Moone isiyani yaakavihenre anamathelana uviriha myaakha cinci yanswalelaka Yehova hataa yalupatthiyaka.
Moone mananna nyuuva oovilela ulupatthiya nlipaka nrima.
“Wiitthenkace nenna va wiira walipe ukati woolupatthiya” (Ukhalenla, yo Julho yo 2019)
Moone kontha isiyani khaninlamuliya utikhinaca nalupatthiyaka naamuciinyu. Ciicammo, moone mananna oohihiyerera ukhala ninnema ni umwiiwelela Yehova yawiirannyeelakani iyo itthwiiyo.
Ikhweeli ‘khinwaana nnema, masi inwaana inttewo’ (Ukhalenla, yo Outubro yo 2017)
