KATAK 59
Kwõmaroñ Kijenmej Ium̦win Matõrtõr im Eñtaan
Ealikkar bwe ej itok wõt iien eo ñe aolep Kũrjin ro renaaj iioon jum̦ae im menin kaeñtaan ko. Jej aikuj ke mijak im inepata ñe enaaj wal̦o̦k men in?
1. Etke jej kõtmãne bwe jenaaj iioon matõrtõr im eñtaan?
Elukkuun alikkar an Baibõl̦ ba: “Aolep ro rekõn̦aan mour ilo aer tiljek ñan Anij im aer juon wõt ippãn Christ Jesus, naaj bareinwõt kaeñtaan er.” (2 Timote 3:12) Jesus ear iioon matõrtõr im eñtaan kõnke ear jab m̦õttan lal̦ in an Setan. Kõj bareinwõt jejjab m̦õttan lal̦ in, kõn men in jejjab ilbõk ñe jej iioon matõrtõr im eñtaan jãn kien ko an lal̦ in im jãn doulul in kabuñ ko.—Jon 15:18, 19.
2. Ewi wãween ad maroñ kõppojakl̦o̦k im̦aan ñan iien eo jenaaj iioon matõrtõr im eñtaan?
Jej aikuj kõkajoorl̦o̦k ad lõke Jeova kiiõ. Kõm̦m̦an iien aolep raan ñan jar ñane im ñan riiti jet eoon ko jãn Naan eo an. Ekkeini am̦ pãd ilo iien kweilo̦k ko. M̦akũtkũt kein renaaj lewaj kajoor eo kwõj aikuji ñan am̦ maroñ peran im jelm̦ae jabdewõt menin kaeñtaan ko, meñe men kein remaroñ itok jãn ro uwaan baam̦le eo am̦. Rijjilõk Paul, eo me ekkã an iioon menin kaeñtaan ko, ear je im ba: “Jeova ej aõ rijjipañ, ijjãmin mijak.”—Hibru 13:6.
Jemaroñ bareinwõt kõkajoorl̦o̦k ad peran ikijjeen ad ekkeini ad kwal̦o̦k naan. Ad kwal̦o̦k naan ej katakin kõj bwe jen lõke Jeova im bwe jen anjo̦ ioon jabdewõt wãween mijak armej. (Jabõn Kõnnaan 29:25) El̦aññe kwõj kate eok ñan peran kiiõ ilo jerbalin kwal̦o̦k naan, innem kwõnãj lukkuun pojak ñan am̦ nãj wõnm̦aanl̦o̦k wõt im kwal̦o̦k naan meñe kien ko rej kajjioñ in kabõjrak jerbal in.—1 Tessalonika 2:2.
3. Ewi wãween ad bõk tokjãn ñe jej kijenmej ium̦win matõrtõr im eñtaan?
Em̦ool bwe ejjab juon men ekam̦õn̦õn̦õ ñe jej iioon matõrtõr im eñtaan, bõtab ñe jej lo tõprak ilo ad kijenmej ium̦win men kein, tõmak eo ad enaaj kajoorl̦o̦k. Jej ruwaakl̦o̦k ñan Jeova kõnke jej loe an jipañ kõj ilo iien eo jej m̦õjn̦o̦ im jej tõn ebbweer. (Riit Jemes 1:2-4.) Jeova ej lukkuun bũrom̦õj ñe ej loe ad eñtaan, bõtab ej m̦õn̦õn̦õ ñe ej loe ad kijenmej ium̦win eñtaan ko jej iiooni. Baibõl̦ eo ej ba: “El̦aññe kom̦ij kijenmej ium̦win eñtaan kõn ami kõm̦m̦an em̦m̦an, men in ej juon menin kabuñbũruon Anij.” (1 Piter 2:20) Jeraam̦m̦an eo Jeova enaaj lel̦o̦k ñan aolep ro me rej tiljek ilo aer kijenmej, ej mour ñan indeeo ilo juon lal̦ me eban bar wõr menin jum̦ae im matõrtõr ko ñan kabuñ eo em̦ool.—Matu 24:13.
KAM̦WILAL̦L̦O̦K AM̦ MEL̦EL̦E
Katak im lale etke ewõr ad maroñ ñan dãpij wõt ad tiljek ñan Jeova meñe armej rej matõrtõr im kaeñtaan kõj, im lale wãween an Jeova naaj kõjeraam̦m̦an kõj.
4. Kwõmaroñ kijenmej ium̦win ijjiped ko jãn baam̦le
Jesus ear lukkuun jel̦ã bwe jet ro ilo baam̦le eo ad remaroñ jab rejetake pepe eo ad ñan karejar ñan Jeova. Riit Matu 10:34-36, innem bwebwenato kake kajjitõk in:
-
Ta eo emaroñ wal̦o̦k ñe juon iaan ro uwaan baam̦le eo ej pepe ñan karejar ñan Jeova?
Ñan lale juon waanjoñak kõn men in, kõjo̦e PIJAIN ALWÕJ eo, innem bwebwenato kake kajjitõk in:
-
Ta eo kwõnaaj kõm̦m̦ane el̦aññe juon iaan ro nukum̦ ak ro m̦õttam̦ ej kajjioñ in kabõjrak eok jãn am̦ karejar ñan Jeova?
Riit Sam 27:10 im Mark 10:29, 30. Ãlikin am̦ riiti eoon kein kajjojo, bwebwenato kake kajjitõk in:
-
Ewi wãween an kallim̦ur in maroñ jipañ eok el̦aññe jet iaan ro ilo baam̦le eo am̦ ak ro m̦õttam̦ rej kajjioñ in kabõjrak eok jãn am̦ karejar ñan Jeova?
5. Wõnm̦aanl̦o̦k wõt im kabuñ ñan Jeova meñe jej iioon matõrtõr im eñtaan
Ej aikuj wõr peran ippãd ñan ad maroñ karejar ñan Jeova ñe ro jet rej kajjioñ bõbraik kõj jãn ad kõm̦m̦ane men in. Kõjo̦e PIJAIN ALWÕJ eo, innem bwebwenato kake kajjitõk in:
-
Ewi wãween an waanjoñak ko ilo pija eo lewaj kajoor im peran ñan kwe?
Riit Jerbal 5:27-29 im Hibru 10:24, 25. Ãlikin am̦ riiti eoon kein kajjojo, bwebwenato kake kajjitõk in:
-
Etke elukkuun aorõk bwe jen wõnm̦aanl̦o̦k wõt im kabuñ ñan Jeova meñe em̦õj kamo jerbalin kwal̦o̦k naan ak kweilo̦k ko ad?
6. Jeova enaaj jipañ eok ñan kijenmej
Ri-Kõnnaan ro an Jeova me eokkõtaktak iiõ ko aer jãn doon im aelõñ ko aer jãn doon, rar wõnm̦aanl̦o̦k wõt im tiljek ilo aer karejar ñan Jeova meñe rar iioon matõrtõr im eñtaan. Ñan lale ta eo ear jipañ er, kõjo̦e PIJAIN ALWÕJ eo. Innem bwebwenato kake kajjitõk in:
-
Ilo pija eo, ta ko ear jipañ rein jeid im jatid ñan kijenmej?
Riit Rom 8:35, 37-39 im Pilippai 4:13. Ãlikin am̦ riiti eoon kein kajjojo, bwebwenato kake kajjitõk in:
-
Ewi wãween an eoon in kõkajoor eok bwe kwõn maroñ in kijenmej ium̦win jabdewõt mãlejjoñ im matõrtõr ko kwõj iiooni?
Riit Matu 5:10-12, innem bwebwenato kake kajjitõk in:
-
Etke kwõmaroñ m̦õn̦õn̦õ wõt meñe kwõj iioon matõrtõr im eñtaan?
Elõñ milien ri-karejar ro an Jeova em̦õj aer lo tõprak ilo aer kar kijenmej ium̦win ijjiped ko. Kwe bareinwõt kwõmaroñ kõm̦m̦ane men in!
JET ARMEJ REJ BA: “Ijjab maroñ kijenmej ium̦win matõrtõr im eñtaan ko.”
-
Eoon ta ko remaroñ lel̦o̦k ñan er peran eo rej aikuji?
TARLEP IN KATAK EO ILO TUKADU
Jeova ej lukkuun kaorõk ad kate kõj ñan karejar ñane meñe jej iioon matõrtõr im eñtaan. Ikijjeen jipañ eo jãn e, jemaroñ lo tõprak ilo ad kijenmej!
Ãlij
-
Etke Kũrjin ro rej aikuj kõtmãne bwe renaaj iioon matõrtõr im eñtaan?
-
Ta eo kwõmaroñ kõm̦m̦ane kiiõ bwe kwõn maroñ pojak ñe kwõnaaj iioon matõrtõr im eñtaan?
-
Ta eo emaroñ jipañ eok bwe kwõn lukkuun tõmak im lõke bwe kwõmaroñ karejar ñan Jeova meñe kwõj iioon jabdewõt kain mãlejjoñ im matõrtõr ko?
KAL̦APL̦O̦K AM̦ MEL̦EL̦E
Lale wãween an juon jeid im jatid likao kõmel̦el̦eik wãween an kar Jeova jipañe ñan kijenmej ke ear kalbuuj kõn an kar jab bõk kun̦aan ilo m̦akũtkũt ko an kien.
Lale ta eo ear jipañ ruo rippãlele ñan karejar ñan Jeova ilo tiljek ium̦win elõñ iiõ ko meñe rar iioon ijjiped ko.
Katak im lale wãween am̦ maroñ jelm̦ae matõrtõr im menin kaeñtaan ko ilo peran.
“Kõpooj Kõj Kiiõ ñan Iien eo Renaaj Matõrtõr im Kaeñtaan Kõj” (Naan in Keeañ, Jul̦ae 2019)
Ewi wãween ad aikuj watõk ijjiped ko jãn baam̦le ko ad, im ta eo jemaroñ kõm̦m̦ane ñan dãpij wõt aenõm̦m̦an eo ikõtaad im baam̦le eo ad im ilo ejja iien eo wõt dãpij wõt ad tiljek ñan Jeova?
“M̦ool eo Ejjab Bõktok ‘Aenõm̦m̦an, ak Jãje’” (Naan in Keeañ, Oktoba 2017)
