SMALKANKA 59
Nina bliki rau sauhkan lâka ba man sip sma bapi buaia
Ai rayaka ra piua kum ra, kristian nani sut ra, ai nina bliki rau sauhkbia, bara ai mapara bubia. ¿Baha ra sibrin bri kaia sa ki?
1. ¿Dîa muni diara raya apia sa, wan nina bliki rau sauhki ba?
Baibil ba klir wan wisa, “ani uplika nani Kraist Jisas wal asla holikira iwaia want lukisa kaka, witin nani ba nina bliki rausauhkan kabia” (2 Timoti 3:12). Jisas ba Sitan tasbaya wina uplika baku apia kan, baha mita upla nani ba witin ra nina bliki rau sauhkan. Bara yawan sin naha tasba wina uplika apia ba mita, wan mapara diara raya apia sa, gabamint nani bara naha tasba rilidianka nani wan nina bliki rau sauhki ba (Jan 15:18, 19).
2. ¿Nina bliki rau sauhkan lâka mapara nahki ridi kaia sip sa?
Jehova ra wan kasakka lukan lâka bri ba, nawas karna daukaia sa. ¿Nahki daukisa? Wan pura sunaia, bara Baibil aisi kaikaia dukiara yu bani taim plikaia sa. Baku sin kangrigisan aidrubanka nani ra ban wi kaia sa. Naha sut daukma kaka, karnika brima ninam bliki rau sauhkaia lâka sâtka nani sut mapara bapi buaia. Pamalikam uplika nani mampara bubia sin bapi buaia sip sma. Apastil Pal ra aima bani nina bliki rau sauhkan, bara witin naku ulban: “Dawan [Jehova] sika yang ra hilp ai muni ba; yang sibrin lukamna apia” (Hibru Nani 13:6).
Piua bani smalki taukaia sin kupia karna lâka briaia hilp wan munisa. Smalki taki waia ba Jehova ra kasak lukaia lan wan munisa, bara upla ra sibrin bri kaia ba pura luaia (Sins Lâka 29:25). Man nawas kupiam karna brisma kaka, gabamint mita wan warkka alki takaskbia kra sin, ban smalki kaia ridi kama (1 Tesalonaika 2:2).
3. ¿Nina bliki rau sauhkan lâka ra bapi buisa kaka, dîa sât yamnika nani bâra sa?
Âu, wan nina bliki rau sauhki ba yawan laik apia sa, kuna bapi buisa kaka wan kasakka lukan lâka ba kau karna takbia. Baku sin, danh sip apia sa wan dara walisa taim, Jehova hilpka kaikaia sip kabia, baha mita Jehova wal kau lamara wan dara walbia (Jems 1:2-4 aisi kaikma). Yawan pât wahwisa taim Jehova sari ai dara walisa, kuna bapi bûi ba kaiki lilia takisa. Baibil ba wisa: “diara kum yamni daukram tâwan ban bapi mita pât wahwisma kaka, baha ba pain sa Gâd mawanra” (1 Pita 2:20). Yawan nani sut bapi bubia, bara kasak kabia kaka, Jehova raya ban kaia lâka wankbia, bara bahara mayunra rait aihwa mapara bubia nani kumi sin âpu kabia (Matiu 24:13).
KAU LAN TAKS
Tânka kum kum laki kaikbia, wan nina bliki rau sauhkanka tilara dîa muni Jehova ra kasak kaia sip sa. Baku sin laki kaikbia, bapi bubia kaka Jehova nahki blisin wan munbia.
4. Pamali nani mapara buanka ba bapi buaia sip sma
Jisas ba pain nu kan bara win, Jehova ra mayunisa taim wan pamalika nani ba wan mapara buaia sip sa. Matiu 10:34-36 aisi kaikma, bara naha dukiara aisi banhma:
-
Upla kum Jehova ra mayunaia wahbi sakisa taim, ¿ai pamalika wal dîa takaia sip sa?
Upla kum kum ra sim baku takan ba nu takaia dukiara LILKA ba kaikma, ningkara naha dukiara aisi banhma:
-
Jehova ra danh mayunma apia dukiara, pamalikam apia kaka pâmnika kum diara mai wibia kaka, ¿dîa daukma?
Lawana Nani 27:10 bara Mark 10:29, 30 aisi kaikma. Aisi kaikma ningkara, tikska bani naha tânka dukiara aisi banhma:
-
¿Naha pramiska ba nahki hilp mai munbia, pamalikam apia kaka pâmnika nani mampara bubia taim?
5. Nina bliki rau sauhkanka lâka tilara sin, ban Jehova ra mayuni kap
Upla nani wan mapara bubia sin Jehova ra ban mayuni kaia dukiara, kupia karna lâka nit sa. LILKA ba kaikma, bara naha dukiara aisi banhma:
-
¿Lilkika wina ani pîska nani ba karnika maikisa, bapi buma dukiara?
Apastil Nani Sturka 5:27-29 bara Hibru Nani 10:24, 25 aisi kaikma. Aisi kaikma ningkara, tikska bani naha tânka dukiara aisi banhma:
-
¿Smalki taukaia, apia kaka aidrubaia adarka âpu kabia sin, dîa muni tânka tara pali brisa ban Jehova ra mayuni kaia?
6. Bapi buma dukiara Jehova hilp mai munbia
Tasba aiska ra Jehova witniska nani ba, almuk kabia, apia kaka wahma tiara kabia kra sin, nina bliki rau sauhkanka lâka tilara Jehova ra ban kasak banhwi kan. Nahki daukan ba nu takaia dukiara, LILKA ba kaikma. Ningkara, naha dukiara aisi banhma:
-
¿Naha Jehova witniska nani ra dîa hilp munan, nina bliki rau sauhkan lâka tilara bapi buaia dukiara?
Roman 8:35, 37-39, bara Pilipai 4:13 aisi kaikma. Tikska bani aisi kaikma ningkara, naha dukiara aisi banhma:
-
¿Tikska nani ba nahki marikisa, dîa sât traika kaikanka kabia sin, bapi buaia sip sma ba?
Matiu 5:10-12 aisi kaikma bara naha dukiara aisi banhma:
-
¿Nina bliki rau sauhkan lâka tilara sin, dîa muni sip sa lilia kaia?
Jehova witniska nani milian milian ba nina bliki rau sauhkan lâka tilara bapi buaia sip kan. ¡Man sin bapi buaia sip sma!
UPLA KUM KUM NAKU LUKISA: “Nina bliki rau sauhkan lâka mapara yang sip bapi buamna apia”.
-
¿Upla kum baku lukisa kaka, ani Baibil tikska nani ba karnika yabaia sip sa?
DÎA LAN TAKRAM
Wan nina bliki rau sauhkisa taim, ban Jehova ra mayuni kaia yawan trai muni ba witin tara kulkisa. ¡Jehova hilpka ba wal yawan sip sa bapi buaia!
Wan kupia krawaia
-
¿Dîa muni kristian nani ra nina bliki rau sauhki ba diara raya apia sa?
-
¿Nina bliki rau sauhkan lâka kau balras kainara, nawas nahki ridi kaia sip sma?
-
¿Dîa muni kasak lukaia sip sma, dîa takbia kra sin Jehova ra mayuni kaia sip sma ba?
KAU PLIKI KAIKS
Kristian wahma kum, Jehova ra kasak kan ba tâwan silak watla ra dingkan taim, Jehova witin ra nahki hilp munan ba kaiks.
Nina bliki rau sauhkan lâka tilara sin, man ban bapi bûi bas (2:34)
Marit kum ai mapara buanka tilara mani ailal ban Jehova ra kasak kan. Witin nani ra dîa hilp munan ba kaiks.
Nina bliki rau sauhkan lâka mapara bapi buaia lan taks.
“Nina bliki rau sauhkanka mapara nawas wina ridi taks” (La Atalaya julio, 2019)
¿Pamali wan mapara bûi ba dukiara dîa nu kaia nit sma? ¿Bara nahki sip sma kupia kumi lâka plikaia, bara sim piua ra Jehova ra kasak kaia?
“Tânka kasak ba ‘aiklabanka bri [balisa], kupia kumi lâka lika apia’” (La Atalaya octubre, 2017)
Baha sin laik kaikma
JEHOVA WITNISKA NANI DUKIARA UPLA NANI DÎA MAKABI WALI BA
¿Jehova witniska nani Baibil klaska yabi ba nahki sa ki?
Jehova witniska nani Baibil klaska yabi ba ra, man ani Baibil bîla lakanka want sma ba yus munaia sip sma. Baku sin, pamalikam apia kaka pâmnika nani paiwaia sip sma.
