ISAMBILILO 59
Ungatwalilila ni Cisinka kwe Yehova na Pano Wakukucuzya
Ko-o kuno tukuya awantu wandi watalike ukutulesya ukuwombela Yehova. Swinya waliwatucuzya nga twakana ukuleka ukumuwombela. Lelo citazipizile ukutuzakazya. Amulandu ci?
1. Amulandu ci wuno tuzipizile ukwenecela ukutucuzya?
E Baibolo yalanda ukwasowa nu kupita mu mbali ukuti: “Wonsinye wano wakalonda ukukonka Leza nu kupita nu Klistu Yesu wandi wayimvwa.” (2 Timoti 3:12) E Yesu wamucuzyanga pamulandu wakuti atalinji awa mwe yo-o insi ya kwe Satana. Nasweswenye tusi swe wamwe yo-o insi. Awuli mulandu wuno tusizungucila nga cakuti awa mu tuwungwe twa mipepele na wa muwuteko wakutucuzya.—Yohani 15:18, 19.
2. Tungayipekanizizya wuli pano watani watalike ukutucuzya?
Tuzipizile ukusuwila sana mwe Yehova pe yonye impindi. Uwasyako impindi ya kuwazya Baibolo ni yakupepa kwe Yehova. Uwazanwako mu kulongana lyonsinye. Ukucita wo-o kulikwavwa ukusipicizya na pano walupwa wakukucuzya. Umutumwa Paulo wino impindi mvule wamucuzyanga walemvile ukuti e Yehova: “we kavwa wane ntandi natina.”—Waheberi 13:6.
Cinji cino cingatwavwa ukusipa, akuwizya ilyasi lizima lyonsinye. Ukuwizya kukatusambilizya ukusuwila nkaninye mwe Yehova nu kukanatina umuntu. (Imilumbe 29:25) Nga watwalilila ukuwizya mukusipa pe yonye impindi, lyo napano uwuteko wawinda umulimo witu utalileka ukuwizya.—1 Watesalonika 2:2.
3. Awuzima ci wuno wawa mukutwalilila uwa cisinka kwe Yehova pano wakutucuzya?
Pasi wino akatemwa nga wakumucuzya. Lelo isuwilo litu likawomelako nkaninye nga twasipicizya. Tukapalamila nkaninye kwe Yehova amuno akatwavwa palyanye pano twati twalola ngati tutandi tukwanisye ukusipicizya. (Wazya Jemusi 1:2-4.) Yehova cikamuluma nkaninye nga walola vyo tukuyimba. Lelo akasecelela nga twakana ukunenuka. E Baibolo ikati: “ndi mwazizimichizya mumilwa kwakwe vino mukachita ichete, peni e Leza awino aliwapepa.” (1 Peter 2:20) Nga twatwalilila awa cisinka, e Yehova alitupa icilamba ca wumi wa muyayaya mu nsi mpya. Wonsinye wano waliwa munsi waliwamuwombela swinya kutaliwa nanti wenga wino aliwawalesya ukumuwombela.—Mateyu 24:13.
SAMBILILA IVICILE PA-A
Twandi tusambilile umulandu wuno ungasuwilila ukuti ungatwalilila uwa cisinka kwe Yehova na pano wakukucuzya nu kusuwila ukuti alikulambula.
4. Ungasipicizya na pano wa lupwa wakukucuzya
E Yesu wamanyile icete sana ukuti walupwa lwitu wamwi watanga wakunde ukulola twasolapo ukuwombela Yehova. Wazyani Mateyu 10:34-36, nu kulanzyanya lyo-o iwuzyo:
-
Avyani vino awa mulupwa wamwi wangalanda nanti ukucita nga cakuti wumwi wasolapo ukuwombela Yehova?
Pakulola icakulolelako cimwi, tambani e VIDYO, nu kulanzyanya lyo-o iwuzyo.
-
Avyani vino ungacita nga cakuti e lupwa lwako nanti e ciwuza wako akukulesya ukuwombela Yehova?
Wazyani Amalumbo 27:10 ne Marko 10:29, 30. Nga mwawazya cila liwaliko amuwuzya na lyo-o iwuzyo:
-
Uzye wo-o uwulayo wungakwavwa wuli ukusipicizya nga cakuti walupwa lwako nanti iviwuza wakukulesya ukuwombela Yehova?
5. Uwatwalilila ukupepa Yehova na pano wakukucuzya
Cikapinda ukusipa pakuwombela Yehova nga cakuti kuli wamwi wano wakutulesya. Tambani e VIDYO, nu kulanzyanya lyo-o iwuzyo.
-
Uzye vino watamba mwe vidyo vyakuwomya wuli?
Wazyani Imilimo 5:27-29 ne Waheberi 10:24, 25. Muwalanzyanya lyo-o iwuzyo pansizi ya kuwazya cila liwaliko:
-
Amulandu ci wuno cacindamila ukutwalilila ukupepa Yehova na pano uwuteko watunena ukuleka ukuwizya nanti ukulongana ponga?
6. E Yehova alikupa amaka yakusipicizya
Inte zya kwe Yehova ukuzinguluka insi yonsinye asa mulandu awatici nanti awasongo, wakatwalilila vye ukuwombela Yehova na pano wakuwacuzya. Pa kulola cino cawavwizye, tambani e VIDYO. Nu kulanzyanya lyo-o iwuzyo.
-
Ukulingana ne vidyo, avyani vino vyavwizye wa-a wa Nte ukusipicizya?
Wazyani Waroma 8:35, 37-39 na 2 Wakorinte 4:7. Muwalanzyanya lyo-o iwuzyo pansizi ya kuwazya cila liwaliko:
-
Uzye lyo-o iwaliko lyakwavwa ukumanya wuli ukuti ungasipicizya intazi iyili yonsinye?
Wazyani Mateyu 5:10-12, nu kulanzyanya lyo-o iwuzyo:
-
Amulandu ci wuno ungawela ni nsansa na pano wakukucuzya?
Imintapendwa ya Nte zya kwe Yehova watwalilila ukuwombela Yehova ni cisinka asamulandu nukuwacuzya. Na wewenye utanga upotwe!
WAMWI WAKATI: “Ne ntange nkwanisye ukusipicizya nga wakuncuzya.”
-
Amawaliko ci yano yangavwa awantu wamusango wo-o ukumanya ukuti nawonye wangakwanisya ukusipicizya
IVISINKA VIKULU
E Yehova wacindamika sana vino tukamuwombela na pano wakutucuzya. Nga watwavwa, tungasipicizya!
Avyani Vino Wasambilila?
-
Amulandu ci wuno awina Klistu wazipizile ukwenecela ukuwacuzya?
-
Avyani vino ungacita pe yonye impindi pakuyipekanizizya lya nkani nga wiza watalika ukukucuzya?
-
Avyani vino vingakwavwa ukusinincizya ukuti ungatwalilila ukuwombela Yehova asa mulandu nu welezyo wuli wonsinye wuno ungapitamo?
MANYILAPO NA VINJI
Tamba umwanawitu uwacitici pano akulondolola vino Yehova wamwavwizye ukusipicizya pano wamunyefile pamulandu wakukanayisanzya mu vikanza vya nsi.
Lola cino cavwizye awatwalane ukutwalilila ukuwombela Yehova pa myaka imivule asamulandu nu kuwacuzya.
Sambilila vino ungawa wemusipe pano wakukucuzya.
“Ipekanyani Nombanye Vino Muliwacita Pano Waliwamicuzya” (Ulupungu lwa kwa Kalinda, July 2019)
Uzye tuzipizile ukulola wuli ukucuzya ukufuma kwa lupwa, swinya tungacita wuli pa kuti tutwalilile ukuwa nu mutende swinya awacisinka kwe Yehova?
“Ukumanya Icisinka Kusileta Umutende ‘Suka Isumo’” (Ulupungu lwa kwa Kalinda, October 2017)
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
