TLAMACHTILI 59
¡Amo xijtlauelkaua Jehová maske mitstlatsakuiltisej!
Sekij maseualmej uelis ayokmo kinekisej ma tijtekipanokaj Jehová uan uelis techtlaijiyouiltisej pampa amo tijnekij tijchiuasej tlen inijuantij kiijtouaj. ¿Moneki timajmauisej pampa tijmatij kiampa techpanos?
1. ¿Kenke tijmatij techtlatsakuiltisej?
Biblia kiijtoua: “Nochi tlaneltokanij tlen kinekij monejnemiltisej keja Cristo Jesús kineki, kinpantisej tlakamej tlen kintlaijiyouiltisej” (2 Timoteo 3:12). Jesús kitlaijiyouiltijkej pampa ya amo kichiuayaya kej maseualmej. Tojuantij nojkia amo timokalakiaj ipan tlen mochiua ipan Tlaltipaktli, yeka tlanauatianij uan katli itstokej ipan religión tlen amo melauak techtlatsakuiltiaj (Juan 15:18, 19).
2. ¿Tlake uelis tijchiuasej uan kiampa tikijiyouisej kema techtlatsakuiltisej?
Moneki timotemachisej ipan Jehová. ¿Tlake techpaleuis kiampa ma tijchiuakaj? Timomaijtosej mojmostla uan tijpouasej Biblia. Nojkia moneki nochipa tiasej tlanechikoli. Tlaj kiampa tijchiuasej, techpaleuis amo ma timajmauikaj uan ma tikijiyouikaj kema sekinok maseualmej o tochampoyouaj techtlatsakuiltisej. Apóstol Pablo, katli nojkia kitlatsakuiltijkej, kiijtok: “ToTeko nechpaleuia. Axnikimakasis tlen tlakamej uelisej nechchiuilisej” (Hebreos 13:6).
Tlaj nochipa titlajtolmoyauaj techpaleuis amo ma timajmauikaj. Kema titlajtolmoyauaj, techpaleuia ma timotemachikaj ipan Jehová uan amo ma tikinmakasikaj maseualmej (Proverbios 29:25). Tlaj nama amo timajmauij, techpaleuis nojua ma titlajtolmoyauakaj maske tlanauatianij ayokmo techkauasej kiampa ma tijchiuakaj (1 Tesalonicenses 2:2).
3. ¿Kenijkatsa techpaleuia tlaj amo tijtlauelkauaj Jehová kema techtlatsakuiltiaj?
Maske amo techpaktia ma techtlatsakuiltikaj, kema tikijiyouiaj tlen techpano, techpaleuia nojua kuali ma titlaneltokakaj. Uan nojua tlauel timotemachiaj ipan Jehová kema tikitaj kenijkatsa techpaleuia kema tijmatij ayokmo ueli tikijiyouiaj se tlaouijkayotl (xijpoua Santiago 1:2-4). Jehová tlauel moyolkokoua kema kiita techtlaijiyouiltiaj, maske kiampa kiyolmati, ya tlauel yolpaki kema kiita amo tijtlauelkauaj. Biblia kiijtoua: “Intla inkichiuaj tlen kuali uan inkiijiyouiaj tlaijiyouilistli tlen axkinamiki [...], uajka kena, toTeko kikualitas” (1 Pedro 2:20). Jehová kinkauas ma itstokaj ipan se xochimili nochi katli amo kitlauelkauasej uan kiijiyouisej kema kintlatsakuiltisej. Katli nopaya itstosej, nochipa kiueyichiuasej Jehová pampa ayokmo aka kintlatsakuiltis (Mateo 24:13).
KUALI XIMOMACHTI
Ma tikitakaj se keski tlamantli tlen techpaleuis amo ma tijtlauelkauaj Jehová maske techtlatsakuiltisej. Nojkia tikitasej tlake tijselisej tlaj amo tijtlauelkauasej.
4. Uelis tikijiyouis kema mochampoyouaj ayokmo kinekisej xijtekipano Jehová
Jesús kiijtok se keskij tlen tochampoyouaj amo kinekiskiaj ma tijtekipanokaj Jehová. Xijpouakaj Mateo 10:34-36 uan xijnankilikaj ni tlajtlanili:
-
Kema se akajya kineki kitekipanos Jehová, ¿tlake ueliskia kiiljuisej ichampoyouaj?
Tlaj tijneki tikinixmatis katli kiampa kinpanok, xikitakaj nopa VIDEO uan xijnankilikaj ni tlajtlanili:
-
¿Tlake tijchiuaskia tlaj mochampoyouaj o mouampoyouaj mitsiljuiskia ayokmo xijtekipano Jehová?
Xijpouakaj Salmo 27:10 uan Marcos 10:29, 30. Kema inkipojtiasej sejse texto, xijnankilikaj ni tlajtlanili:
-
¿Kenijkatsa ni textos mitspaleuis kema mochampoyouaj o mouampoyouaj mitsiljuisej ayokmo xijtekipano Jehová?
5. Nojua xijtekipanojto Jehová maske mitstlatsakuiltisej
Moneki amo timajmauisej uan kiampa uelis tikijiyouisej kema sekinok amo kinekisej ma tijtekipanokaj Jehová. Xikitakaj nopa VIDEO uan xijnankilikaj ni tlajtlanili:
-
¿Tlake tlamantli tlen tikitak ipan video mitspaleuia amo ximajmaui?
Xijpouakaj Hechos 5:27-29 uan Hebreos 10:24, 25. Kema inkipojtiasej sejse texto, xijnankilikaj ni tlajtlanili:
-
¿Kenke moneki nojua tijtekipanojtosej Jehová maske tekichiuanij techiljuisej ayokmo ma titlajtolmoyauakaj yon ma timonechikokaj?
6. Jehová mitspaleuis xikijiyoui
Jehová itlajtoltemakauaj katli amo kipiaj sanse ininxiui uan katli amo euaj ipan sanse altepetl, amo kitlauelkajtokej Jehová maske kintlatsakuiltijtokej. Tlaj tijneki tijmatis tlake kinpaleuik, xikitakaj nopa VIDEO. Teipa xijnankilikaj ni tlajtlanili:
-
¿Tlake kinpaleuik ni toikniuaj ma kiijiyouikaj kema kintlatsakuiltijkej?
Xijpouakaj Romanos 8:35 uan 37-39, uan nojkia 2 Corintios 4:7. Kema inkipojtiasej sejse texto, xijnankilikaj ni tlajtlanili:
-
¿Kenijkatsa mitspaleuia ni texto ximotemachi kena uelis tikijiyouis tlen ueli tlaouijkayotl?
Xijpouakaj Mateo 5:10-12 uan xijnankilikaj ni tlajtlanili:
-
¿Kenke uelis tiyolpakis maske tijpias miak tlaouijkayotl?
Tlauel miakej toikniuaj amo kitlauelkajtokej Jehová maske kintlatsakuiltiaj. ¡Ta nojkia uelis kiampa tijchiuas!
TLEN SEKINOK KIIJTOUAJ: “Na amo ueliskia nikijiyouis tlaj nechtlatsakuiltisej”.
-
¿Tlake textos uelis kinyolchikauas katli kiampa moiljuiaj?
TLEN TIMOMACHTIJKEJ
Jehová tlauel kipatiita pampa tijchiuaj kampeka tijtekipanosej maske techtlatsakuiltiaj. ¡Uelis tikijiyouisej pampa ya techpaleuis!
¿Tlake tijyekok?
-
¿Kenke Cristo itokilijkauaj tijmatij techtlatsakuiltisej?
-
¿Tlake uelis tijchiuas nama uan kiampa tikijiyouis kema mitstlatsakuiltisej?
-
¿Tlake mitspaleuia ximotemachi nojua uelis tijtekipanojtos Jehová maske mitstlatsakuiltisej?
NOJKIA XIKITA NI
Xikita kenijkatsa Jehová kipaleuik se toikni telpokatl kema kitsajkej pampa amo kinejki yas tlateuiti.
Xikita tlake kinpaleuik se toikni uan isiua ma kitekipanojtokaj Jehová miak xiuitl maske kintlatsakuiltiyayaj.
Tijtekipanouaj Jehová maske mopatla se keski tlamantli (7:11)
Xikita tlake mitspaleuis amo timajmauis kema mitstlatsakuiltisej.
“Ximokualchijchiua nama uan tikijiyouis tlatsakuiltili” (Tlen Tematiltia, julio 2019)
¿Kenijkatsa kinamiki tikitasej kema tochampoyouaj kualanij? ¿Tlake uelis tijchiuasej uan kiampa amo timokualanisej ininuaya uan nojua tijtekipanojtosej Jehová?
“Tlen melauak kichiua ma timoxelokaj” (Tlen Tematiltia, octubre 2017)
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
