MWAHA 59
Muhoolele Wiikariwa Moolipa Murima
Moohipwacha hiihaano naari omwaahiyu, Akristu oothene ananwerya ohoolela wiiciwa, ophiyerya tho wiikariwa. Apwanne eyo enaphwanela oneeriha okhala awoova?
1. Ntakhara heeni nnaphwanelaahu owehererya wiikariwa?
Piipiliya oni: “Oothene yaawo anakhwela omuchara Kristu Yeesu moororomeleya, ekaamwaavyaavyiwa.” (2 Timóteo 3:12) Yesu aniikariwa nthowa nawi haapaka makupa a elapo ya Satana. Hiyaano tho hannapaka makupa a elapo. Wa nthowa na yeeyo, hannatikhiniheya vaavaa alamuleli ni ahooleli a ikerexa ananiikaraaya.—Yohani 15:18, 19.
2. Nni niirehererye hai ntakhara wiikariwa?
Nnaphwanela olipiha nroromelo nahu mwa Yehova hiihaano. Mwaavyeke elukuluku mahiku oothene wi mvekele ni omwaalakhanya Piipiliya. Muthukumaneke moohihiyererya. Soothene seiya inamoovahaani ikuru wi muhoolele moolipa murima wiikariwa vyakala, naamwi ekhanle achu a veemusini. Murummwa Paulo aahoolela makacamiho mancipale ni wiikariwa nave aaloca: “Apwiya [Yehova] tanakikhaviherya, nkoovaru echu!”—Ahebri 13:6.
Mukhalelo mukina wa olipiha nroromelo nahu ori moorweela wa olaleerya michaka moohihiyererya. Olaleerya onnaaceererya omuroromela wahu Yehova nave onnanikhaviherya ohiwoova achu. (Masiposipo 29:25) Nakhalano olipa murima hiihaano wi nlaleerye, nnahaala okhala oorehereya otitelela olaleerya naamwi alamuleli yeereryaka onihiiha weerano yeeyo.—1 Tesalónika 2:2.
3. Ntakhara heeni ovilela variyari va wiikariwa onnanikhaviherya?
Haavo onasiveliwano wiikariwa. Nyenya vaavaa nnavilelaahu ni wiikariwa, nroromelo nahu ninnakhala noolipa. Ninnamwaacamela Yehova nthowa nawi ninnawerya woona mukhatiihu ikuru seiho owo onanivaheiye xaxaxa vaavaa nnoonaahu wi hinni niwerye ovilela. (Mwaalakhanye Tiyako 1:2-4.) Yehova onnasooseya murima vaavaa onanooneiye nihooseyaka. Nyenya owo onnahakalala vancipale aanoonaka nivilelaka. Piipiliya oni: “Mwavilela moonihiwa ekoyi mweeraka saphaama, eyo tenamuhakalaliha Muluku.” (1 Pedro 2:20) Yehova oolaiherya ekumi yoohimala mu elapo yeeyo oni ohikhalemo wiikariwa wa oothene yaale eni evilele ophiyerya omakuchuwelo.—Mateu 24:13.
OHUSERYA MWAWIISEELA
Moone ntakhara heeni oryaaya wooweryeya okhala oororomeleya wa Yehova moohipwacha wiikariwa nave tho moone mareeliho a opaka yeeyo.
4. Nyuwaano munanwerya ovootha wiica wa veemusini
Yesu aahisuwela wi achu akina a veemusini vahu hiyaahaala osiveliwa onoona nimurumeelaka Yehova. Mwaalakhanye Mateu 10:34-36, nave voocharela muthokororye nikoho nla:
-
Tiheeni enahaala weereya wakhala wi muchu a veemusini oolakelela omurumeela Yehova?
Wi moone yootakiherya ya yeeyo, moone EXILEMA, nave voocharela muthokororye nikoho nla:
-
Tiheeni mwaahaalaanyu weera wakhala wi mmusi naari nthamwene anyu hanachuna wi nyuwaano mmurumeeleke Yehova?
Mwaalakhanye Salumu 27:10 ni Marko 10:29, 30. Nave mmanle waalakhanya yoorepa ti yoorepa, muthokororye nikoho nla:
-
Ti mwawihai yoororomeliha yeela eneeraaya yookhaviheryeeni ohoolela wiica wa amusi naari asinthamwene anyu?
5. Mutitelele omurumeela Yehova moohipwacha wiikariwa
Ti woochuneya olipa murima wi nimurumeele Yehova xaxaxa vaavaa akina aneereryaaya onihiiha weerano yeeyo. Moone EXILEMA, nave voocharela muthokororye nikoho nla:
-
Ti mwawihai sootakiherya sa mu exilema yeela ilipinhaaya nroromelo nanyu?
Mwaalakhanye Saweriwa T’arummwa 5:27-29 ni Ahebri 10:24, 25. Mmanle waalakhanya yoorepa ti yoorepa muthokororye nikoho nla:
-
Ntakhara heeni eryaaya yoochuneya otitelela omurumeela Yehova naamwi muteko woolaleerya ni mithukumano sikhwatiihiwe?
6. Yehova onamookhaviheryani okhala oovilela
Anamoona a Yehova a iyaakha ni sookhovelela soohiyanahiyana annamurumeela Yehova moororomeleya naamwi yiikariwaka. Wi moone yeeyo yaakhavihenrye anna yaala, moone EXILEMA. Nave voocharela muthokororye nikoho nla:
-
Mu exilema, tiheeni yaakhavihenrye anna yaale ovilela?
Mwaalakhanye Aroma 8:35, 37-39 ni Filipi 4:13. Mmanle waalakhanya yoorepa ti yoorepa, muthokororye nikoho nla:
-
Yoorepa ela enalipiha hai nroromelo nanyu nawi ti wooweryeya ovootha yaweeha vyakala?
Mwaalakhanye Mateu 5:10-12, nave voocharela muthokororye nikoho nla:
-
Ntakhara heeni munanwerya okhala oohakalala naamwi mwiikariwaka?
Anamoona a Yehova ancipale annakhumelela phaama vaavaa anavilelaaya ni wiiciwa. Nyuwaano tho munanwerya!
ACHU AKINA ANI: “Miyaano nkini kiwerye ovilela ni wiikariwa.”
-
Soorepa taani saahaala omukhaviherya muchu yoowo okhalano olipa murima yoowo onachuneiye?
MUKWASU
Yehova onnatepa ovaha esisapo wiilipixerya wahu wa omurumeela yoowo, naamwi niikariwaka. Nnikhaviheryo nawe, hiyaano nnanwerya ovilela!
Makoho awuuluulela
-
Ntakhara heeni Akristu annaphwanela oweherya wiikariwa?
-
Tiheeni munaphwanelaanyu weera hiihaano wi nwerye wiirehererya ntakhara wiikariwa?
-
Ntakhara heeni munaphwanelaanyu olekecheya wi ti wooweryeya omurumeela Yehova, naamwi mwiikariwaka?
OTHOLATHOLA
Moone mukhalelo Yehova aamukhavihenreiye munna otitelela okhala oovilela vaavaa aawaleliweiye nthowa na ohipaka makupa mu ipoliitika.
Moone yeeyo yaamukhavihenrye mutheli mmoha omurumeela Yehova moororomeleya mu iyaakha sincipale naamwi iiciwaka.
Moone mukhalelo muneeraanyu mvoothe wiikariwa moolipa murima.
“Mwiirehererye Hiihaano Ntakhara Wiikariwa” (Mulipeleli a Yulyu a 2019)
Moone ntakhara heeni hannaphwanela okhala ootikhiniheya vaavaa nnahoolelaahu wiica wa amusi. Moone mukhalelo munahaalaanyu okhapelela murecele ni otitelela okhala oororomeleya wa Yehova wakhala wi eyo yoheereya ni nyuwaano.
“Eparipari Henaruuha ‘Muretxele, Nto . . . Nsipatxa’” (Mulipeleli a Otupuru a 2017)
