LÉZIʼI 59
Ngouo o chʉôg méngégé mié mé naa wou nti zuiŋé ntʉm jou
Mékréeté ntsém gé laʼ ziaʼ méngégé, pʉa ping ntôʼô wôb lé gouʼté Jéova. Ta ngouo yaa ma gʉo po pôg?
1. Pégé néŋé nzuiʼté ngié mé naa wégé ngôʼ nti zuiŋé ntʉm yégé nti kô?
Biible chʉéchʉé ngôôn ngié: «Ngouo gning zôôn lé la nnè na Yéeso Kristo ta nné nkouŋo lé gʉo mmo yié Ssé né nkouŋo, mé gnié té kʉé yé kʉée wô» (2 Timoté 3:12). Mé la na ngôʼ mbwo Yéeso nti noué a lôôn téen mbii pag na yôôn njʉo wô. Kouaʼ pég yégé, pég té gwiée pag na yôôn njʉo wô, aa mmo yié a gʉo fʉʼ yié méngoumnôôn paa métchʉoosé na wégé méngégé, a té kʉʼʉ wégé wô (Jang 15:18, 19).
2. Ngouo pégé tchoungté mboum yégé na méngégé lékô?
A zaté ngié pégé kuiʼi nkouè nnè na Jéova fʉʼôôn. Pii tam lièʼ ntsém lé lôg ngʉo suingté mbing ntoŋo Chouŋo yé. Kou métchouʼté fʉʼ ntsém. Sôôn choum gé naa wou métʉ laa chʉôg lé zièʼ yèe yèe nti nkouaʼtè wôô, mboo paʼ é lôôn foo po tsèe tsiŋé nda yi. Apootre Pôl wuié mé lôôn nnaa ngôʼ mbwo yé fʉʼ ntsém la gôôn ngié: «Jéova né ntoo nkuiété wôôn, n té née ngé mbôgô tso mmo wô» (Héber 13:6).
Ngouo pégé ying ngwiée saʼa métʉ paʼ pégé lôôn chouŋoo no Ssé fʉʼ ntsém. Léchouŋo no Ssé kuiété wégé lé saŋa na Jéova mbing mbôôn lé pôgô gning mésong (Provèebe 29:25). Pégé lôôn njʉʼʉ saʼa métʉ lé lôg chouŋo no Ssé fʉʼôôn, mba a gé kuiété wégé lé kuiʼi chouŋo no Ssé mboo paʼ méngoumnôôn lôôn né ndʉʼʉ faʼ yégé (1 Tésalonika 2:2).
3. Pégé lôôn chʉôg ngôʼ, mba pégé gé jʉo yaa pi?
Mé té naa wégé ngôʼ a poŋo wégé wô, taʼ pégé vôg ta chʉôg méngégé péʼé, a gʉo zuiŋé ntʉm yégé kuiʼi ntʉté. Léjououʼ paʼ Jéova Ssé kuiété wégé fʉʼ yié pégé ntchʉʼʉ ngwiée métʉ wô gʉo pégé kuiʼi ntoo né léjʉng yé (toŋo Jag 1:2-4). Jéova jououʼ kékang fʉʼ yié pégé né ngia ngôʼ, taʼ a gwiée lékag fʉʼ yié a gia ngié pégé né ntʉté. Biible gôôn ngié: «Mé lôôn ntchʉʼʉ lé naa wui ngôʼ, pi chʉôg, mbaa wèe léchʉôg aa mbwo Ssé ngouo no mboŋo» (1 Piè 2:20). Jéova gé laʼ tsôʼô faʼ pʉa pié po chʉéchʉé chʉôg méngégé. A gé laʼ naa wôb léwô témi tsèe njʉo yié choum tépong té ying ngouô wo wô (Matio 24:13).
YING NKUIʼI NZIʼI
Gia mmo yié ngouo a kuiété wou lé ké nkouè nnè po na Jéova, mboo paʼ ngégé lôôn ntoo na wou. Ying ngia nti yié ngouo Jéova tsôʼô faʼ jou pouʼou.
4. Ngouo o chʉôg mboo fʉʼé pʉa tsèe tsiŋé nda yi né ntôʼô wou lé gouʼté Jéova
Yèeso la gôôn mbwo pégé ngié ngouo a wo tso fʉʼ pʉa tsiŋé nda yégé lé zuing paʼ pégé chana lé gouʼté Jéova wô. Toŋo Matio 10:34-36, mbing chouŋé na yôôn nzaté:
-
Afʉʼ yié gning chaan lé gouʼté Jéova, ngouo pʉa tsiŋé nda yé gʉo lékô?
O lôôn né nkouŋo lé giè taʼ fʉʼ, o tsôʼô VIDÉO, mbing ngôôn no na nzaté yié ée mvfo.
-
Gning tsiŋé nda jou ka chou wou wôô lôôn faʼa lé taté wou lé gouʼté Jéova, mba o gé gʉo lékô?
Toŋo Zôbô ntsé 27:10 po Malékousé 10:29, 30. O lôôn mmaga lé tong, o léen nké chouŋo na yôôn nzaté:
-
Ngouo môôn ménkang ŋwaʼné kuiété wou fʉʼ yié gning tsiŋé nda jou ka méchou pou wôô né faʼa lé taté wou lé gouʼté Jéova lékô?
5. Gʉa lé mvfo lé gouʼté Jéova mboo fʉʼ yié mé né nnaa wou ngôʼ
A zaté saʼa métʉ lé lôg ngouʼté Jéova fʉʼ yié mé né nnaa wou ngôʼ. Tsôʼô VIDÉO, mbing ngôôn no na yôôn nzaté.
-
Akô kouaʼ nkuingté wou na méfʉʼ mié ée tsèe yôôn vidéo?
Toŋo Mégang ntoum 5:27-29 po Héber 10:24, 25. O lôôn ntong wôôn nkang ŋwaʼné, o léen nké chouŋo na yôôn nzaté:
-
Nti kô aa tʉnzuing lé gʉa lé mvfo lé gouʼté Jéova mboo paʼ mé lôôn ntôʼô wégé lé chouŋo no Ssé, mboo lé kou métchouʼté?
6. Jéova gé kuiété wou lé chʉôg
Pakuié Ntang Jéova pié po gwiée mbaa wèe nzuing ngouʼ wôô ka foo mbaa yèe jʉʼ wôô né ngouʼté Jéova gouʼté, mboo fʉʼ yié mé né nnaa wôb ngôʼ. O lôôn né nkouŋo lé gia mmo yié a la kuiété wôb, o tsôʼô VIDÉO mbing ngôôn no na nzaté yié ée mvfo.
-
Aa tsèe yôôn vidéo akô kuiété pôôn Pakuié Ntang lé chʉôg méngégé?
Toŋo Roma 8:35, 37-39 po Filipo 4:13. O lôôn ntong o léen nké chouŋé na yôôn nzaté:
-
Môôn ménkang ŋwaʼné kuiété wou lé zsé ngié ngouo o chʉôg mbaa yèe ngôʼ wôô lékô?
Toŋo Matio 5:10-12, ndé nké chouʼŋé na yôôn nzaté:
-
Ngouo pégé ké ngwiée po lékag mboo fʉʼ yié mé né nnaa wégé ngôʼ nti kô?
Mémiléyông mégaŋa faʼ Jéova la chʉôg méngôʼ. Ngouo pégé ying chʉôg yégé.
TSO PɄA GÔÔN NGIÉ: «Ngouo méng lé kouʼou lé chʉôg fʉʼ yié mé né nnaa wôôn ngôʼ wô.»
-
Ngouo mèe ménkang ŋwaʼné kuingté gning wuié a gôôn pouʼou?
TA O ZIʼII KÔ?
A kouaʼ mboŋo Jéova lé gia ngié pégé né ngouʼté yé mboo paʼ mé né nnaa wégé ngôʼ. Ngouo a kuiété wégé lé chʉôg méngôʼ!
Ta o né nkimté?
-
Ngouo Mékréeté zuiʼté ngié mé naa wôb ngôʼ nti kô?
-
Ngouo o gʉo kô fʉʼôôn lé lôg ntchoungté mboum jou lé chʉôg méngôʼ?
-
Ngouo kô kuiété wou lé zsé ngié ngouo o kouʼou lé gouʼté Jéova mboo paʼ mé né nnaa wou ngôʼ?
KUIʼI FAʼ
Taʼ ngouachoum laʼté paʼ Jéova la kuiété yé fʉʼ yié mé la néŋé yé nda ntsaang nti noué a la té gwiée pag na yôôn njʉo wô.
Akô la kuiété taʼ fè po nzuié wé lé gouʼté Jéova mboo paʼ mé la naa wôb méngôʼ na méngouʼ ta ngiôôn?
Gia mmo yié ngouo a kuiété wou lé gwiée chʉôg fʉʼ yié mé né nnaa wou ngôʼ.
« Prépare-toi dès maintenant à la persécution » (La Tour de Garde, juillet 2019)
Ngouo o gia méngégé mié tsiŋé nda jou né nnaa né wou lékô? Ngouo o ping ngʉo lékô ta chʉôg mèe méngégé?
« La vérité apporte, “non pas la paix, mais lʼépée » (La Tour de Garde, octobre 2017)
