ISIFUNDO 59

Ungakghona Ukukghodlhelelela Ukuhlunguphazwa

IDLALE

Ngokukhamba kwesikhathi woke amaKrestu azokuqalana nokuphikiswa nokuhlunguphazwa. Inga-kghani lokho kufuze kusithuse?

1. Kubayini kufuze silindele ukuhlunguphazwa?

IBhayibheli lithi: “Boke abafisa ukuphila ngokuzinikela kuZimu njengabafundi bakaKrestu Jesu nabo bazokuhlunguphazwa.” (2 Thimothi 3:12) UJesu wahlunguphazwa ngombana bekangasiyingcenye yephasi lakaSathana. Nathi asisiyingcenye yephaseli, yeke asirareki nasihlunguphazwa borhulumende bephaseli neenhlangano zekolo.—Jwanisi 15:18, 19.

2. Singakulungiselela njani ukuhlunguphazwa?

Kufuze sithembele kuJehova nje. Yenza isikhathi sokuthandaza kuye nokufunda iliZwi lakhe qobe lilanga. Ubekhona esifundweni qobe. Zoke izintwezi zizokupha amandla wokuqalana nokuhlunguphazwa ngesibindi ngitjho nanyana uhlunguphazwa malunga womndeni. Umpostoli uPowula owaqalana nokuhlunguphazwa wathi: “UJehova umsizami; angekhe ngisabe.”—Hebheru 13:6.

Ukutjhumayela qobe kuzosisiza sibe nesibindi. Ukutjhumayela kusenza sithembele kuJehova begodu sihlule ukusaba abantu. (IzAga 29:25) Nasakha isibindi sokutjhumayela nje, sizokulungela ukuragela phambili sitjhumayela nalokha urhulumende akhandela umsebenzethu.—1 Thesalonika 2:2.

3. Kusizuzisa ngani ukukghodlhelela nasihlunguphazwako?

Kuliqiniso, asikuthabeli ukuhlunguphazwa kodwana nasikghodlhelela ngokuphumelelako ukukholwa kwethu kuyaqina. Sitjhidela kuJehova ngombana sibona isizo lakhe lokha nasibona ngasuthi asisanawo amandla wokuragela phambili. (Funda uJakopo 1:2-4.) Kumzwisa ubuhlungu uJehova ukusibona sitlhaga, kodwana uyathaba nasikghodlhelelako. IBhayibheli lithi: “Nangabe nikghodlhelela ukutlhaga ngebanga lokwenza okuhle, lokhu kuyinto ethabisako kuZimu.” (1 Pitrosi 2:20) Nasihlala sithembekile, uJehova uzosibusisa ngokuphila okungapheliko ephasini elitjha, lapho boke abantu bazabe balotjha uJehova kunganamuntu obaphikisako.—Matewu 24:13.

FUNDA NGOKUNGENELELEKO

Funda bona kubayini kukghoneka ukuhlala sithembekile kuJehova ngitjho nalokha abantu basihlunguphaza nokuthi uzosibusisa njani.

4. Ungakghodlhelelela ukuphikiswa mndeni

UJesu bekazi kuhle ukuthi amanye amalunga womndenethu angekhe afune bona silotjhe uJehova. Funda uMatewu 10:34-36, bese nicoca ngombuzo lo:

Kungenzekani ilunga lomndeni naliqunta ukulotjha uJehova?

Nawufuna ukubona isibonelo salokho, dlala IVIDIYO, bese nicoca ngombuzo olandelako.

IVIDIYO: UJehova Wasamukela (5:13)

Ungenzani lokha isihlobo sakho namkha umnganako alinga ukukulisisa ukulotjha uJehova?

Funda iRhubo 27:10 noMarkosi 10:29, 30. Ngemva kokufunda umtlolo ngamunye, cocani ngombuzo lo:

Isithembiswesi singakusiza njani bona uqalane nokuphikiswa mndeni namkha abangani?

5. Ragela phambili ulotjha uJehova nanyana uhlunguphazwa

Ukulotjha uJehova kutlhoga sibe nesibindi abanye nabangafuni bona simlotjhe. Dlala IVIDIYO, bese nicoca ngombuzo olandelako.

IVIDIYO: Yiba Nesibindi Nanyana Uhlunguphazwa (6:27)

Iimbonelo ezisevidiyweni le zikupha njani amandla?

Funda izEnzo 5:27-29 namaHebheru 10:24, 25. Ngemva kokufunda umtlolo ngamunye, cocani ngombuzo lo:

Kubayini kuqakatheke kangaka ukuragela phambili silotjha uJehova, ngitjho nalokha umsebenzethu wokutjhumayela nemihlangano kukhandelwe?

6. UJehova uzokusiza bona ukghodlhelele

AboFakazi bakaJehova beminyaka ehlukahlukeneko neenzinda ezingafaniko baragele phambili balotjha uJehova ngitjho nanyana bahlunguphazwa. Bona ufumane bona yini eyabasizako, dlala IVIDIYO. Bese nicoca ngombuzo olandelako.