THUTO 59
O ka Kgona go Dula o Kgotlelela le ge Batho ba go Tlaiša
Nengneng mo bophelong, ka moka ga rena batho ba tlo leka go re ganetša go hlankela Jehofa goba go re tlaiša. Na se se swanetše go re tšhoša?
1. Ke ka baka la eng re sa swanela go makala ge batho ba re tlaiša?
Beibele e re: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa [goba go tlaišwa].” (2 Timotheo 3:12) Jesu le yena o ile a tlaišwa ka gobane e be e se karolo ya lefase le la Sathane. Le rena ga re karolo ya lefase le, ka gona ga re makale ge mebušo ya lefase le mekgatlo ya bodumedi e re tlaiša.—Johane 15:18, 19.
2. Re ka dira eng gore re tle re kgone go kgotlelela ge batho ba re tlaiša?
Re swanetše go ithuta go tshepa Jehofa kudu gona bjale. Iphe nako ya go rapela le go bala Beibele letšatši le letšatši, e bile o dule o eya dibokeng. Go dira dilo tše ka moka, go tlo go thuša gore o tle o kgone go kgotlelela ge batho ba go ganetša go hlankela Jehofa, le ge o ka tlaišwa ke batho ba geno. Moapostola Paulo, yoo le yena a bego a dula a tlaišwa o ngwadile gore: “Jehofa ke mothuši wa ka; nka se boife.”—Baheberu 13:6.
Ge re dula re bolela ditaba tše dibotse, seo se tlo re thuša gore re be le sebete. Go bolela ditaba tše dibotse go re thuša gore re tshepe Jehofa le go se tšhabe batho. (Diema 29:25) Ge o ka ithuta go ba le sebete sa go bolela ditaba tše dibotse gona bjale, o tlo kgona go tšwela pele o bolela ditaba tše dibotse le ge mmušo o ka thibela mošomo wo wa rena.—1 Bathesalonika 2:2.
3. Re holega bjang ge re kgotlelela ge batho ba re tlaiša?
Ke nnete gore ga se gore re a thaba ge re tlaišwa. Eupša ge re kgotlelela, tumelo ya rena e tla tia le go feta. Seo se tlo dira gore re be bagwera ba bagolo ba Jehofa, ka gobane re tla be re bona gore o a re thuša e bile o a re thekga ge re ikwa re se na matla. (Bala Jakobo 1:2-4.) Jehofa o kwa bohloko ge a bona re tlaišwa, eupša o a thaba ge a bona re kgotlelela. Beibele e re: “Ge e ba le kgotlelela tlaišego ka baka la ge le dira botse, gona se ke selo se se kgahlišago go Modimo.” (1 Petro 2:20) Ge e ba re ka dula re tshepega, Jehofa o tlo re šegofatša ka go phela go ya go ile lefaseng le lefsa. Ke moka, batho bao ba tla bego ba phela lefaseng leo le lefsa, ba tla be ba hlankela Jehofa e bile go se na motho yo a ba ganetšago.—Mateo 24:13.
ITHUTE KA MO GO TSENELETŠEGO
Ekwa gore ke ka baka la eng re re go a kgonega go dula re tshepagalela Jehofa le ge batho ba bangwe ba re tlaiša. O kwe le gore Jehofa o tlo re šegofatša bjang ge e ba re tshepega.
4. O ka kgona go kgotlelela le ge ba geno ba go ganetša go hlankela Jehofa
Jesu o be a tseba gabotse gore ba bangwe ka malapeng a gabo rena ba ka se thabe ge ba bona re hlankela Jehofa. Balang Mateo 10:34-36, gomme le boledišaneng ka potšišo e latelago:
-
Ba bangwe ka lapeng ba ka dira’ng ge ba bona o kgetha go hlankela Jehofa?
E le gore o bone gore ka lapeng ba bangwe ba ka se thabe ge o hlankela Jehofa, bapalang BIDIO ye, gomme le boledišaneng ka potšišo e latelago:
-
Wena o ka dira’ng ge e ba mogwera wa gago goba yo mongwe wa geno a nyaka go go thibela go hlankela Jehofa?
Balang Psalme 27:10, gomme le boledišaneng ka potšišo ya ka mo fase. Balang le Mareka 10:29, 30, gomme le boledišaneng ka potšišo e latelago:
-
Lengwalo le, le ka go thuša bjang ge e ba bagwera ba gago goba ba geno ba leka go go ganetša go hlankela Jehofa?
5. Tšwela pele o hlankela Jehofa le ge o tlaišwa
Go nyakega gore re be le sebete gore re tšwele pele re hlankela Jehofa le ge batho ba bangwe ba leka go re thibela go dira bjalo. Bapalang BIDIO ye, gomme le boledišaneng ka potšišo e latelago:
-
Mehlala ya batho ba mo bidiong ye, e go thuša bjang gore o be le sebete?
Balang Ditiro 5:27-29, gomme le boledišaneng ka potšišo ya ka mo fase. Balang le Baheberu 10:24, 25, gomme le boledišaneng ka potšišo e latelago:
-
Ke ka baka la’ng go le bohlokwa gore re tšwele pele re hlankela Jehofa le ge mmušo o thibetše mošomo wa rena wa go bolela ditaba tše dibotse le go ya dibokeng?
6. Jehofa o tla go thuša gore o kgotlelele
Dihlatse tša Jehofa lefaseng ka moka tša mengwaga ya go se swane, di ile tša tšwela pele di hlankela Jehofa ka go tshepega le ge di be di tlaišwa. Go kwa gore di thušitšwe ke eng, bapalang BIDIO ye. Ke moka le boledišaneng ka potšišo e latelago:
-
Bidiong ye, ke’ng seo se ilego sa thuša bana babo rena le dikgaetšedi gore ba dule ba kgotleletše?
Balang Baroma 8:35, 37-39, gomme le boledišaneng ka potšišo ya ka mo fase. Balang le Bafilipi 4:13, gomme le boledišaneng ka potšišo e latelago:
-
Go ya ka lengwalo le, ke’ng seo se go dirago gore o tshepe gore o ka kgona go kgotlelela bothata le ge e le bofe?
Balang Mateo 5:10-12, gomme le boledišaneng ka potšišo e latelago:
-
Ke ka baka la’ng o ka kgona go thaba le ge o tlaišwa?
Dihlatse tša Jehofa tše dintši di ile tša kgona go hlankela Jehofa ka go tshepega le ge di be di tlaišwa. Le wena o ka kgona!
BATHO BA BANGWE BA RE: “Nna yena nka se kgone go kgotlelela ge ke tlaišwa.”
-
Ke mangwalo afe ao o ka ba balelago ona go ba thuša go bona gore ba ka kgona go kgotlelela?
O ITHUTILE ENG?
Jehofa o thaba kudu ge a bona re mo hlankela le ge re tlaišwa. E bile o tla re thuša gore re kgone go kgotlelela!
Dipotšišo
-
Ke ka baka la’ng Bakriste ba se ba swanela go makala ge ba tlaišwa?
-
O ka dira’ng gona bjale gore o tle o kgone go kgotlelela ge o tlaišwa?
-
O ka thušwa ke’ng go bona gore o ka kgona go hlankela Jehofa go sa šetšwe bothata le ge e le bofe?
ITHUTE KA MO GO OKETŠEGILEGO
Ekwa gore mofsa yo mongwe o re Jehofa o ile a mo thuša bjang ge a be a golegilwe ka baka la go gana go tšea karolo dintweng.
Ekwa gore ke eng seo se thušitšego banyalani ba bangwe go hlankela Jehofa ka go tshepega ka mengwaga e mentši le ge ba be ba ganetšwa.
Ekwa gore o ka thušwa ke eng go kgotlelela ge o tlaišwa.
“Itokišeletše Gona Bjale go tlo Tlaišwa” (Morokami wa July 2019.)
Ekwa gore o swanetše go dira eng ge ka lapeng ba go ganetša go hlankela Jehofa, le gore o ka dira eng gore o dule o phedišana le bona gabotse eupša o dutše o tshepagalela Jehofa.
“Therešo e ‘Tliša Tšhoša, e Sego Khutšo’” (Morokami wa October 2017.)
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
