PFUNZIRO 59
Imwepo Mungakwanise Kupirira Mukambazunzidwa
Ziwande ntsiku ayai zicepe, Mkristau ali-wentse an’dzazunzidwa. Kodi imwepo mumbacita thupo na nkhani imweyi?
1. Thangwe ranyi ifepano timbadziwa kuti tin’dzazunzidwa?
Bibliya limbati: “Wentse omwe an’funa kukhala na moyo wakubzipereka kwa Mulungu mwakubverana na Kristu Jezu, an’dzagumanambo na mabvuto.” (2 Timotio 3:12) Jezu adazunzidwa thangwe iye akhacita lini mbali ya dziko la Sathaniri. Ifepano timbacitambo lini mbali ya dzikoli, ndipopa timbadabwa lini tikambazunzidwa na maboma ya m’dzikoli pabodzi na magereja yakunama. — Juwau 15:18, 19.
2. Kodi tingakonzekere tani pomwe tikanati tazunzidwa?
Ifepano tin’funika kulimbisa cikhulupiro cathu kwa Yahova kuyambira tsapano. Mbapembani kwa iye ndipo mbawerengani Fala lace ntsiku zentse. Mbayendani ku mitsonkhano yentse ya gwere. Kucita bzimwebzi kun’dzakuthandizani kulimbisa cikhulupiro canu comwe cin’dzakucitisani kupirira mabvuto yomwe mungadzagumane nayo, napo yacicokera kwa adzinza wanu. Mpostolo Paulo, omwe akhazunzidwa kawiri-kawiri adanemba kuti: “Yahova ni mthandizi wangu, nin’dzagopa lini cinthu.” — Ahebereu 13:6.
Kupalizira kawiri-kawiri kumbatithandizambo kukhala wakukhwimika. Kupalizira kumbatithandiza kuthemba Yahova na kuleka kumbagopa wanthu. (Mimwani 29:25) Imwepo mukakhwimika kuti mupalizire ntsiku zino, bzin’dzakunesani lini kupalizira napo boma likadzaletsa basa lathu. — 1 Atesalonika 2:2.
3. Kodi timbagumana phindu liponi tikambapirira mazunzo?
Kulewa cadidi, ifepano timbakomedwa lini tikazunzidwa, koma tikapirira mazunzoyo, cikhulupiro cathu cimbalimba kwene-kwene. Ifepano timbakhala pa uxamwali bwakulimba na Yahova tikambawona iye akutithandiza pa nthawe yomwe bzinthu bzatineseratu. (Werengani Tiyago 1:2-4.) Yahova bzimbamuwawa kwene-kwene tikambazunzidwa, tsono ambakomedwa akatiwona tikupirira. Bibliya limbalewa kuti: “Penu mun’pirira mabvuto thangwe ra kucita bzabwino, Mulungu ambakomedwa na bzimwebzi.” (1 Pedru 2:20) Tikapitiriza kukhala wakukhulupirika kwa Yahova, iye an’dzatipasa moyo wamuyaya m’dziko lipsa. Ndipo wentse omwe an’dzakhala m’dzikolo an’dzatumikira Yahova ndipo palibe omwe an’dzawazunza pomwe. — Mateu 24:13.
FUFUDZANI BZINANGO
Onani thangwe ranyi mpsakukwanisika kupitiriza kukhala wakukhulupirika kwa Yahova napo tikuzunzidwa ndipo onanimbo momwe iye an’dzatisimbira.
4. Imwepo mungapirire adzinza wanu akakuzunzani
Jezu ambadziwa kuti adzinza wathu winango ambafuna lini kuti titumikire Yahova. Werengani Mateu 10:34-36, ndipo mukamala cezeranani mbvunzo wakutewerayu:
-
Kodi adzinza angacite ciyani m’bale wawo akayamba kutumikira Yahova?
Kuti muwone ciratizo pa nkhaniyi, onani VIDIYO, ndipo mukamala cezeranani mbvunzo wakutewerayu.
-
Kodi n’ciyani comwe mungacite penu wadzinza ayai xamwali wanu akuyeza kukutazisani kutumikira Yahova?
Werengani Salimo 27:10 na Marko 10:29, 30. Mukamala cezeranani mbvunzo wakutewerayu:
-
Kodi mafala ya m’mavesiya yangakuthandizeni tani penu wadzinza ayai xamwali wanu akukuuzani kuti musiye kutumikira Yahova?
5. Pitirizani kunamata Yahova napo mukuzunzidwa
Tin’funika kukhwimika pomwe tikutumikira Yahova napo wanthu winango angayezere kutiletsa. Onani VIDIYO, ndipo mukamala cezeranani mbvunzo wakutewerayu.
-
Kodi ciratizo comwe mwawona mu vidiyoyi cakulimbikisani tani?
Werengani Mabasa 5:27-29 na Ahebereu 10:24, 25. Mukamala cezeranani mbvunzo wakutewerayu:
-
Thangwe ranyi kupitiriza kunamata Yahova n’kwakufunika kwene-kwene napo boma licitiletsa kupalizira na kutsonkhana?
6. Yahova an’dzakuthandizani kupirira
Mboni za Yahova za magole yakusiyana-siyana na mbuto zakusiyana-siyana zidapitiriza kutumikira Yahova mwakukhulupirika napo zikhazunzidwa. Kuti mudziwe bzomwe bzidawathandiza, onani VIDIYO. Mukamala cezeranani mbvunzo wakutewerayu:
-
Mu vidiyoyi, kodi n’ciyani cidathandiza Mbonizi kuti zipirire?
Werengani Aroma 8:35, 37-39 na Afilipi 4:13. Mukamala cezeranani mbvunzo wakutewerayu:
-
Kodi mafala ya m’mavesiya yakuthandizani tani kuwona kuti mungapirire mazunzo?
Werengani Mateu 5:10-12, ndipo mukamala cezeranani mbvunzo wakutewerayu:
-
Thangwe ranyi imwepo mungakomedwe napo mukazunzidwa?
Mboni za Yahova zizinji zikupitiriza kutumikira Yahova mwakukhulupirika napo zikuzunzidwa. Imwepo mungakwanisembo!
WANTHU WINANGO AMBALEWA KUTI: “Inepano ningakwanise lini kupirira mazunzo.”
-
Kodi ni vesi liponi lomwe mungamuwerengere kuti mumuthandize kuwona kuti iye angakwanise?
KODI MWAPFUNZA CIYANI?
Yahova ambawona nyongo yomwe timbacita pomwe tikumutumikira napo tikuzunzidwa. Na thandizo lace ifepano tingapirire!
Mibvunzo yakubwerezera
-
Thangwe ranyi Akristau ambadziwa kuti an’dzazunzidwa?
-
Kodi n’ciyani comwe mun’funika kucita kuti mudzakwanise kupirira mukadzazunzidwa?
-
Kodi n’ciyani comwe cingakuthandizeni kuwona kuti mungakwanise kupirira napo mukuzunzidwa?
ONANI POMWE IBZI
Onani tswaka lomwe likufotokoza momwe Yahova adamuthandizira kupirira pomwe akhali m’kawoko thangwe ra kusaya kupitira nkhani za ndale.
Onani bzomwe bzidathandiza banja linango kutumikira Yahova mwakukhulupirika magole mazinji napo likhazunzidwa.
Onani momwe mungakhalire wakukhwimika mukazunzidwa.
“Khalani Wakukonzeka Kulimbana na Mazunzo”(Ntsanza ya Mulindiri ya Julho, 2019)
Kodi tingacite tani kuti tikhale pa mtendere na adzinza wathu ticikhalambo wakukhulupirika kwa Yahova?
“Cadidi Cimbabweresa ‘Sikuti Mtendere, Koma Mphanga’” (Ntsanza ya Mulindiri ya Outubro, 2017)
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
