ƐZUKOALƐDEƐ 59
Ɛbahola Wɔagyinla Kpɔdekpɔdeyɛlɛ Nloa
Kɛ ɔde ye biala la, nɔhalɛ Kilisienema kɔsɔɔti bayia dwazotia, bie a bɛbayɛ yɛ kpɔdekpɔde bɔbɔ. Ɔwɔ kɛ ɛhye maa yɛ ahonle tu ɔ?
1. Duzu ati a yɛ nye la kɛ bɛbayɛ yɛ kpɔdekpɔde a?
Baebolo ne ka ye wienyi kɛ: “Bɛdabɛ mɔɔ bɛkulo kɛ bɛfa nyamenlezonlenlɛ kpalɛ bɛbɔ bɛ ɛbɛla kɛ Kelaese Gyisɛse ɛdoavolɛma la amuala, bɛbayɛ bɛdabɛ noko kpɔdekpɔde.” (2 Timote 3:12) Bɛyɛle Gyisɛse kpɔdekpɔde ɔluakɛ ɛnee ɔnle Seetan ewiade ne afoa. Yɛdayɛ noko yɛnle ewiade ne afoa, ɔti saa ewiade ɛhye anu arane ne mɔ nee ɛzonlenlɛ ngakyile yɛ yɛ kpɔdekpɔde a ɔnzi yɛ nwo.—Dwɔn 15:18, 19.
2. Kɛ ɔkɛyɛ na yɛaziezie yɛ nwo yɛamaa kpɔdekpɔdeyɛlɛ ɛ?
Ɔwɔ kɛ yɛmaa anwodozo mɔɔ yɛlɛ wɔ Gyihova anu la yɛ kpole kɛkala. Nyia mekɛ sɛlɛ ye alehyenlɛ biala na kenga ye Edwɛkɛ ne foa bie. Kɔ debiezukoalɛ dahuu. Ninyɛne ɛhye mɔ bamaa wɔ anwosesebɛ mɔɔ ɛhyia la amaa wɔanyia akɛnrasesebɛ wɔava wɔagyinla kpɔdekpɔdeyɛlɛ biala anloa, saa bɔbɔ wɔ mbusuafoɔ a ɛlɛfa ara ɛ nwo zo a. Ɛzoanvolɛ Pɔɔlo mɔɔ bɛyɛle ye kpɔdekpɔde fane dɔɔnwo la hɛlɛle kɛ: “Gyihova le me boavolɛ; menrɛzulo.”—Hibuluma 13:6.
Eza yɛkɔ daselɛlilɛ dahuu a ɔmaa yɛnyia akɛnrasesebɛ. Daselɛlilɛ maa yɛnyia Gyihova anu anwodozo na yɛkola yɛdi sonla nwo ɛzulolɛ zo konim. (Mrɛlɛbulɛ 29:25) Saa ɛnyia akɛnrasesebɛ ɛfa ɛdi daselɛ kɛkala a, ɛnee ɛlɛfa wɔaziezie ɛ nwo kɛ saa arane fa ɔ sa to yɛ gyima ne azo bɔbɔ a ɛbahɔ zo wɔali daselɛ.—1 Tɛsalonaekama 2:2.
3. Saa yɛgyinla kpɔdekpɔdeyɛlɛ nloa a kɛzi ɔboa yɛ ɛ?
Nɔhalɛ nu, yɛ nye ɛnlie nwo kɛ bɛbayɛ yɛ kpɔdekpɔde, noko saa yɛkola yɛgyinla kpɔdekpɔdeyɛlɛ nloa a, ɔmaa yɛ diedi yɛ kpole. Ɔmaa yɛbikye Gyihova ɔluakɛ yɛnwu kɛ ɔlɛboa yɛ wɔ mekɛ bɔbɔ mɔɔ yɛkɛde nganeɛ kɛ yɛ anwosesebɛ ɛwie la. (Kenga Gyemise 1:2-4.) Saa yɛlɛnwu amaneɛ a ɔyɛ Gyihova nyane, noko saa ɔnwu kɛ yɛlɛbɔ mɔdenle yɛagyinla ɔ nloa a ɔ nye die. Baebolo ne ka kɛ: “Saa bɛlɛyɛ kpalɛ la ati bɛnwu amaneɛ na bɛgyinla ɔ nloa a, yemɔ a sɔ Nyamenle anye a.” (1 Pita 2:20) Menli kɔsɔɔti mɔɔ kɛva nɔhalɛlilɛ kɛgyinla nu la, Gyihova bamaa bɛanyia dahuu ngoane wɔ ewiade mɔɔ awie biala ɛnrɛdwazo ɛnrɛtia nɔhalɛ ɛzonlenlɛ la anu.—Mateyu 24:13.
SUKOA DƆƆNWO
Sukoa deɛmɔti yɛbahola yɛava nɔhalɛlilɛ yɛazonle Gyihova ɔnva nwo kpɔdekpɔdeyɛlɛ nee nyilalɛ mɔɔ wɔ zolɛ la anwo debie.
4. Wɔ abusua ne dwazo tia wɔ a ɛbahola wɔagyinla ɔ nloa
Ɛnee Gyisɛse ze kɛ bie a yɛ abusua ne ɛnrɛlie kpɔkɛ mɔɔ yɛbazi kɛ yɛsonle Gyihova la ɛnrɛdo nu. Kenga Mateyu 10:34-36, na akee bɛzuzu kpuya ɛhye anwo:
-
Saa awie si kpɔkɛ kɛ ɔsonle Gyihova a duzu a ye abusua ne anu amra bahola ayɛ a?
Amaa wɔanwu ɛhye anwo neazo la, ye VIDIO ne, na akee bɛzuzu kpuya ɛhye anwo.
-
Saa ɛ nwo sonla anzɛɛ ɛ gɔnwo bie bɔ mɔdenle kɛ ɔmaa wɔagyakyi Gyihova ɛzonlenlɛ a duzu a ɛbayɛ a?
Kenga Edwɛne 27:10 yɛɛ Maake 10:29, 30. Ɛkenga tɛkese ko biala ɛwie a, bɛzuzu kpuya ɛhye anwo:
-
Saa wɔ abusua ne anzɛɛ ɛ gɔnwo mɔ dwazo tia wɔ a kɛzi ɛwɔkɛ ɛhye baboa wɔ ɛ?
5. Kɔ zo sonle Gyihova ɔnva nwo kpɔdekpɔdeyɛlɛ
Saa awie mɔ bɔ mɔdenle kɛ bɛnrɛmaa yɛnrɛzonle Gyihova a ɔhyia akɛnrasesebɛ na yɛahola yɛayɛ zɔ. Ye VIDIO ne, na akee bɛzuzu kpuya ɛhye anwo.
-
Kɛzi neazo ngakyile mɔɔ wɔ vidio ɛhye anu la maa wɔ anwosesebɛ ɛ?
Kenga Gyima ne 5:27-29 yɛɛ Hibuluma 10:24, 25. Ɛkenga tɛkese ko biala ɛwie a, bɛzuzu kpuya ɛhye anwo:
-
Saa bɛfa bɛ sa bɛto yɛ edwɛkɛhanlɛ gyima ne anzɛɛ yɛ debiezukoalɛ ne azo a, duzu ati a ɔhyia kɛ ɛkɔ zo ɛsonle Gyihova a?
6. Gyihova baboa wɔ yeamaa wɔagyinla ɔ nloa
Gyihova Alasevolɛ mɔɔ asolo bɛ ɛvolɛ nee ɛleka mɔɔ bɛvi la ɛhɔ zo ɛva nɔhalɛlilɛ ɛzonle Gyihova wɔ mekɛ mɔɔ bɛlɛyɛ bɛ kpɔdekpɔde la. Amaa wɔanwu mɔɔ boale bɛ la, ye VIDIO ne. Akee bɛzuzu kpuya ɛhye anwo.
-
Duzu a boale Alasevolɛ mɔɔ wɔ vidio ne anu la maanle bɛholale bɛgyinlanle a?
Kenga Wulomuma 8:35, 37-39 yɛɛ Felepaema 4:13. Ɛkenga tɛkese ko biala ɛwie a, bɛzuzu kpuya ɛhye anwo:
-
Kɛzi tɛkese ɛhye maa ɛnyia anwodozo kɛ ɛbahola wɔagyinla sɔnea biala anloa ɛ?
Kenga Mateyu 5:10-12, na akee bɛzuzu kpuya ɛhye anwo:
-
Saa bɛlɛyɛ wɔ kpɔdekpɔde bɔbɔ a duzu ati a ɛ nye bahola alie a?
Gyihova azonvolɛ mgbe dɔɔnwo ɛhola ɛgyinla dwazotia nloa. Ɛdawɔ noko ɛbahola!
BIE MƆ KA KƐ: “Menrɛhola menrɛgyinla kpɔdekpɔdeyɛlɛ nloa.”
-
Ngɛlɛlera boni mɔ a bamaa bɛanyia anwodozo a?
EDWƐKƐ TITILI
Gyihova anye die mɔdenle mɔɔ yɛlɛbɔ yɛazonle ye ɔnva nwo kɛ bɛyɛ yɛ kpɔdekpɔde la anwo. Ɔlua ye moalɛ zo, yɛbahola yɛagyinla ɔ nloa!
Ndinu
-
Duzu ati a ɔwɔ kɛ Kilisienema anye da kɛ bɛbayɛ bɛ kpɔdekpɔde a?
-
Duzu a ɛbahola wɔayɛ ye kɛkala wɔava wɔaziezie ɛ nwo wɔamaa kpɔdekpɔdeyɛlɛ a?
-
Duzu a baboa wɔ yeamaa wɔanyia anwodozo kɛ ɛbahola wɔazonle Gyihova ɔnva nwo sɔnea biala a?
KPONDƐ DƆƆNWO
Nea adiema kpavolɛ bie mɔɔ ɛlɛka kɛzi Gyihova boale ye ɔmaanle ɔholale ɔgyinlanle wɔ mekɛ mɔɔ bɛdole ye efiade ɔluakɛ yeangyinla afoa biala la.
Nea mɔɔ boale agyalɛma bie ɔmaanle bɛvale nɔhalɛlilɛ bɛzonlenle Gyihova ɛvolɛ dɔɔnwo ɔnva nwo kpɔdekpɔdeyɛlɛ la.
Sukoa kɛzi ɛbahola wɔava akɛnrasesebɛ wɔagyinla kpɔdekpɔdeyɛlɛ nloa la.
“Siezie Ɛ Nwo Kɛkala Maa Ɛkpɔlɛ” (Ɛzinzalɛ Arane, July 2019)
Saa yɛyia dwazotia wɔ yɛ abusua nu a duzu a ɔwɔ kɛ yɛyɛ ye wɔ nwo a, na kɛ ɔkɛyɛ na yɛahola yɛali ngyegyelɛ mɔɔ ɔfa ɔba la anwo gyima ɛ?
“Nɔhalɛ Ne Ɛnva ‘Anzodwolɛ Ɛmba, Emomu Konle Dadeɛ’” (Ɛzinzalɛ Arane, October 2017)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
