UYONO 59
Wu na Sabu Vwo Edirin Ẹkparehaso
Phẹrẹkpẹ yanghene obaro na, Ilele Kristi ephian ina dẹrughwaroghwu ẹkparehaso. Ọrẹn, o fori nẹ ọrana ọ lẹrhẹ ofẹn mwu ọwan?
1. Mesoriẹ ọwan e fiẹrorhọ ẹkparehaso?
Baibol na o djerie fiotọre taghene: “Itiọrurhomẹmro, ana kparehaso ọsoso ihworho ri guọlọ hẹrokele i Kristi Jesu nyerẹn akpọ ọ ga Osolobrugwẹ.” (2 Timothy 3:12) A kparehaso i Jesu fọkime ọ ha usuẹn akpọ ọrẹ Echu-u. Ọwan a ji ha usuẹn akpọ na-a, omarana, o vwo rho gbe ọwan unu ọke igọmẹti akpọ na ọrhẹ ikoko ẹga sansan a kparahaso ọwa-an.—John 15:18, 19.
2. Marhẹ ene ru mwuegbe hẹrhẹ ẹkparehaso?
Ọwan ina vi bọn ẹruẹhaso ọwan kpahen i Jehova gbanhonrhọ vwana. Rha nẹrhomo vwe yi, jeghwai se Ẹmro ọnẹyen kẹdẹkẹdẹ. Rhe ji riẹ iyono ukoko ọke ephian. Enana ephian ina yọ omẹgbanhon ne wu sabu fiudugbere din ẹkparehaso, ọrhọ tobọ rhianẹ ekruon ya kparahasuọ. Ọnyikọ Paul, rọ mẹrẹn ẹkparehaso omamọ, ọrhọ ya: “Jehova yọ sa mẹ erhumu; mi zofẹ-ẹn.”—Hebrews 13:6.
Ọwan ina sabu ru uduefigbere ọwan gbanhonrhọ, nyoma re ne ghwoghwo ọke ephian. Owian aghwoghwo na o yono ọwan na rha hẹroso i Jehova, jeghwai fi ofẹn ituakpọ kparobọ. (Proverbs 29:25) Wu rhe fiudugbere rhe ghwoghwo vwana, ne wu na sabu ghwoghwo ọrhọ tobọ rhianẹ igọmẹti a kparahaso owian ọwan.—1 Thessalonians 2:2.
3. Erere ego ya mẹrẹn erhe vwo edirin ẹkparehaso?
Itiọrurhomẹmro, a vwa riamerhen ẹkparehaso-o, ọrẹn, arha sabu dien, esegburhomẹmro ọwan nọ gbanhanrhọ. Ọwan e tiẹkẹrẹ i Jehova rhọ, fọkime a mẹrẹn userhumu ọnẹyen uvuẹn ọke re roro taghene erhe vwo omẹgbanho-on. (Se James 1:2-4.) Ọ da i Jehova ọke rọ mẹrẹn ojẹriọ ọwan, Ọrẹn, oma ọ merhiẹn ọke rọ mẹriẹn taghene e vwo edirin. Baibol na ọrhọ ta: “We rhe vwo edirin ojẹriọ fọkime we ruẹ oborẹ orhomurun, ọnana oborẹ Osolobrugwẹ o vwo ekwerhọ kpahen.” (1 Peter 2:20) Osẹkwa ri Jehova ọnọ yẹ ọsoso ihworho ri vwo edirin ọrhẹ esegburhomẹmro, ọyẹ arhọ i bẹmẹdẹ uvuẹn akpọ ra na ja kparehaso ẹga urhomẹmro.—Matthew 24:13.
YONO KODO RHỌ
Yono oborẹ ọsoriẹ ana sabu sẹrorẹ atamwu ọwan kpahen i Jehova udabọ ẹkparehaso.
4. Wu na sabu vwo edirin ẹkparehaso ro nẹ abọ ekruon sa
Jesu ọ dabu rhe taghene ọkezẹko ekrun ọwan i hobọtua orhienbro ọwan ra na ga i Jehova-a. Se Matthew 10:34-36, orho ru, are i gba kpahenrhọ onọ ọnana:
-
Me yọ nọ sabu phia orhianẹ owuọwan uvuẹn ekrun owu o brorhiẹn rọ nọ ga i Jehova?
Ne wu sabu mẹrẹn udje ọnana, kporo IVIDIO na, orho ru, are i gba kpahenrhọ onọ ọnana.
-
Me wu ne ruo orhianẹ ohworho ekruon yanghene ugbehian, ọ damoma rọ nọ lẹrhuọ ja ga i Jehova?
Se Psalm 27:10 ọrhẹ Mark 10:29, 30. Are i rhe se ekete i Baibol na owuowu hin, are i gba kpahenrhọ onọ ọnana:
-
Marhẹ ive ọnana ono ru ha userhumu wẹn orhianẹ ohworho ekruon yanghene ugbehian, ọ damoma rọ nọ lẹrhuọ ja ga i Jehova?
5. Rha ga i Jehova udabọ ẹkparehaso
A guọlọ uduefigbere na sabu ga i Jehova, orhianẹ awọrọ a damoma na ja rha ga ye. Kporo IVIDIO na, orho ru, are i gba kpahenrhọ onọ ọnana.
-
Marhẹ idje uvuẹn ividio na i ru bọn gbanhon?
Se Acts 5:27-29 ọrhẹ Hebrews 10:24, 25. Are i rhe se ekete i Baibol na owuowu hin, are i gba kpahenrhọ onọ ọnana:
-
Mesoriẹ ọ ghanren omamọ na ji rha ga i Jehova, ọrhọ tobọ rhianẹ igọmẹti i ta rẹn ọwan na dobọ iyono ọrhẹ aghwoghwo ji?
6. Jehova ọnọ ha userhumu wẹn vwo edirin
Iseri Jehova ri ha uvwre ẹgbukpe sansan, ri nẹ ẹkwotọre sansan rhe, a fuevwan ga i Jehova udabọ ẹkparehaso. Ne wu sabu mẹrẹn oborẹ ọ ha userhumu rẹn aye, kporo IVIDIO na. Orho ru, are i gba kpahenrhọ onọ ọnana.
-
Uvuẹn ividio na, me yọ ha userhumu rẹn Iseri Jehova na vwo edirin?
Se Romans 8:35, 37-39 ọrhẹ Philippians 4:13. Are i rhe se ekete i Baibol na owuowu hin, are i gba kpahenrhọ onọ ọnana:
-
Marhẹ ekete i Baibol ọnana o ru yọ imwẹro na taghene wu na sabu vwo edirin edamuni ephian?
Se Matthew 5:10-12, orho ru, are i gba kpahenrhọ onọ ọnana:
-
Mesoriẹ wu na sabu ghọghọ udabọ ẹkparehaso?
Iduduru ihworho ra ga i Jehova, i sabu vwo edirin ẹkparehaso ne. Wu na ji sabu ruie!
OBORẸ IHWORHO EZẸKO A TA: “Mi sabu vwo edirin ẹkparehaso-o.”
-
Ekete i Baibol ego yi na sabu yẹ aye uduefigbere?
ME WU YONORIN?
Jehova ovwo ọdaremẹro kpahen omẹdamu ọwan ra ga ye udabọ ẹkparehaso. Nyoma userhumu ọnẹyen, ana sabu vwo edirin ẹkparehaso!
Ẹzẹkoko
-
Mesoriẹ Ilele Kristi ine fiẹrorhọ ẹkparehaso?
-
Me wu ne ru vwana, neneyo wu sabu mwuegbe hẹrhẹ ẹkparehaso?
-
Me yọ nọ sabu yọ uduefigbere taghene wu na sabu ga i Jehova udabọ ẹkparehaso ephian?
GUỌLỌ IYẸNRẸN ERỌRỌ
Ni uphuphẹn ọhworhare owu rọ ta kpahen oborẹ i Jehova o ru ha userhumu riẹn vwo edirin, ọke re mwuien rhẹ ekanron fọkiẹ emevigbanhon ọnẹyen.
Se kpahen oborẹ ọ ha userhumu rẹn esa ọrhẹ ane owu fuevwan ga i Jehova ẹgbukpe buebun udabọ ẹkparehaso.
Yono oborẹ wu ne ru fiudugbere udabọ ẹkparehaso.
“Ha Ọke Ọnana Mwuegbe Hẹrhẹ Ẹkparehaso” (Oghwa Odẹrẹ, July 2019)
Ukẹro ọgo ya na ha ni ẹkparehaso ro nẹ abọ ekrun sa, marhẹ ene ru sabu fi ebẹnbẹn rọ rhua sa kparobọ?
“Urhomẹmro na ọ ha ‘Ọdan Ọlọko sa, Ukperẹ ono Rhiẹ Ufuoma’” (Oghwa Odẹrẹ, October 2017)
