MSOLO 59
Imwepo mungakwanise kupirira chidzudzo
Nthawe ikule panango ichepe, Akhrisitu wose adzatsutsiwe na kudzudziwa. Ko vimwivi vichadekana kutichitisa mantha?
1. Ndawa chani tichadikhirira kuti tidzadzudziwe?
Baibolo ichanena mobveka bwino kuti: ‘Wose womwe achada kukhala na moyo wodzipereka kwa Mulungu mwa Khrisitu Yesu adzadzudziwe.’ (2 Timoteyo 3:12) Yesu angadzudziwa ndawa yakuti iye wenzelini kumbali yadziko ya Satana. Isembo tilirini pomwe kusaidi ya dziko, ndipomwapa tichadabwalini maboma yadziko pabodzi na magulu yachipembedzo yakambatidzudza.—Yohane 15:18, 19.
2. Ko tingakonzekere tani chidzudzo?
Tichadekana kulimbisa kukhulupirira kwathu Yahova manjewuno. Mwakukhala na nthawe yopemphera kwa iye ntsiku iliyose na kulewenga Mawu yake na kugumanika pamisonkhano mokhazikika. Vochitika ninge vimwivi vidzatipase mphanvu yomwe tichadekana kuti tipirire chidzudzo molimba moyo, olo vidzudzo vochokera kwa azibale wathu. Mtumi Paulo yemwe adadzudiziwa adanemba kuti: ‘Yahova ndiye nthandizi wangu; nidzachitelini mantha.’—Aheberi 13:6.
Isembo tingakwanise kukhala wolimba moyo mwa kulalikira mokhazikika. Kulalikira kuchatithandiza kuthemba Yahova na kupirira mantha yogopa wanthu. (Miyambo 29:25) Imwepo mukakhala wolimba moyo mwakulalikira manjewuno, mudzakhale wokonzeka kulalikira basi olo vikadzakhala kuti maboma yalambiza basa yathu.—1 Atesalonika 2:2.
3. Ko tichaphindula tani tikakhala kuti tinkupirira chidzudzo?
Sikuti tichakondwa tikambadzudziwa, koma tikambapirira mwanjira yabwino chikhulupiriro chathu chichalimba. Tichamufenderera maninge Yahova tikambawona kuti iye ankutithandiza pomwe tinkuchita mantha. (Lewengani Yakobo 1:2-4.) Yahova vimuwawa maninge akaona kuti tinkubonera, koma iye achakondwera maninge akaona kuti tinkupirira. Baibolo ichati: ‘Peno imwepo munkudzudzika ndawa yakuchita vabwino, mwevi vichamukondweresa maninge Mulungu.’ (1 Petulo 2:20) Madaliso yomwe Yahova adzapereke kwa wose womwe achapirira mokhulupirika ni yosapera mu dziko ilibe wanthu wotsutsa kupemphera chaiko.—Mateyu 24:13.
PFUNZIRANI VIZINJI
Onani pomwe kuti ndawa chani nivokwanisika na vaphindu kupitiriza kukhala wokhulupirika kwa Yahova olo kuti tikutsutsiwa.
4. Imwepo mungakwanise kupirira chidzudzo
Yesu adadziwa kuti anango wa m’banja yathu adzakondwelini na vomwe tidzasalule vakutumikira Yahova. Lewengani Mateyu 10:34-36, ndipo patsogolo pake kambiranani mbvunzo uyu:
-
Ko ni chani chomwe chingachitike munthu m’bodzi m’banja akasalula kutumikira Yahova?
Kuti muone chitsanzo cha vimwevi, wonesani VIDIYO, ndipo patsogolo pake kambiranani mbvunzo uyu.
-
Ko imwepo mungachite tani peno azibale wanu panango azishamwali akuyesa kukufowokesani kutumikira Yahova?
Lewengani Salimo 27:10 na Maliko 10:29, 30. Mukamaliza kulewenga lemba iliyose kambiranani mbvunzo uyu:
-
Ko polomisi mweyi ingakuthandizeni tani imwepo peno munkutsutsiwa na azibale wanu panango azishamwali?
5. Pitirizani kutumikira Yahova olo kuti munkutsutsiwa
Vichadekana kulimba moyo vikakhala kuti anango ankutikangisa kutumikira Yahova. Wonesani VIDIYO, ndipo patsogolo pake kambiranani mbvunzo uyu.
-
Ko chitsanzo cha mu vidiyo mweyi chakulimbikisani tani imwepo?
Lewengani Machitidwe 5:27-29 na Aheberi 10:24, 25. Mukamaliza kulewenga lemba iliyose kambiranani mbvunzo uyu:
-
Ndawa chani ni vodekana kupitiriza kutumikira Yahova olo kuti basa yathu yolalikira panango misonkhano yathu niyolambiziwa?
6. Yahova adzakuthandizeni kupirira
Mboni za Yahova za misinkhu yosiyanasiyana na chikhalidwe chosiyana ankupitiriza kutumikira Yahova olo kuti ankudzudziwa.Kuti muone chomwe chawathandiza, wonesani VIDIYO. Patsogolo pake kambiranani mbvunzo uyu.
-
Mu vidiyo, ni chani chathandiza Mboni ile kuti ipirire?
Lewengani Aroma 8:35, 37-39 na Afilipi 4:13. Mukamaliza kulewenga lemba iliyose kambiranani mbvunzo uyu:
-
Ko mavesi mwaya yachakulimbikisani tani imwepo kuti mungakwanise kupirira bvuto iliyose?
Lewengani Mateyu 5:10-12, ndipo patsogolo pake kambiranani mbvunzo uyu:
-
Ndawa chani mungakhale wokondwa olo kuti munkudzudziwa?
Mamidyau yazinji ya Mboni za Yahova yapirira chidzudzo mwabwinobwino. Imwepo mungakwanisembo!
WANTHU ANANGO ACHATI: ‘Ningakwaniselini kupirira chidzudzo.’
-
Ko ni lemba iponi yomwe mungamulewengere munthu muyu kuti akhale na chidaliro chomwe achadekana?
CHIGWATO
Yahova achalemekeza khama yanu yakumutumikira olo kuti munkudzudziwa. Na thandizo yake, tingakwanise kupirira!
Kubwerezera
-
Ndawa chani Akhrisitu achadikhira chidzudzo?
-
Ko ni chani chomwe imwepo mungachite manjewuno kuti mukhala wokonzeka chidzudzo chikadzabwera?
-
Ko ni chani chomwe chingakuthandizeni kukhala na chitsimikizo chakuti imwepo mudzakwanise kumutumikira Yahova olo munkugumana na mabvuto?
KUTI MUDZIWE VIZINJI
Nyang’anirani mulumbwana munango pomwe akufotokoza momwe Yahova adamuthandizira kupirira pomwe wenze mangiwe ndawa yakusakhala kwake kusaidi ya dziko.
Onani chomwe chidathandiza banja inango kutumikira Yahova kwa magole yazinji olo kuti angatsutsiwa.
Onani momwe mungapiririre chidzudzo molimba moyo.
‘Konzekerani manje uno chidzudzo’ (Nsanja ya Olonda ya Julho, 2019)
Ko tichadekana kuchiona tani chidzudzo chochokera kwa achibale, ndipo ko tingapirire tani bvuto mwanjira yabwino?
‘Chonadi chichabweresa, ‘osati ntendere, koma chibemba’’ (Nsanja ya Olonda Outubro, 2017)
