Mas sedu o mas tardi, tudu kristons na nfrenta jintis ku na sta kontra elis, o te mesmu pirsigi elis. Sera ki es dibi di pui pa no medi?

1. Pabia ku no dibi di spera kuma no na pirsigidu?

Biblia fala di un manera klaru: “Tudu kil ku misti vivi un vida puru na Kristu Jesus i ten ku sufri pirsigison.” (2 Timótiu 3:12) Jesus pirsigidu pabia i ka fasi parti di mundu di Satanas. Tambi, suma no ka fasi parti di mundu, no ka dibi di adimira ora ku no na pirsigidu pa guvernus di mundu ku organizasons riliẑiosu. — Jon 15:18, 19.

2. Kuma ku no pudi purpara pa pirsigison?

No pirsisa di fortalisi no konfiansa na Jeova desdi gosi. Tira tempu kada dia pa ora pa Jeova i lei un parti di si Palabra. Mati sempri runions di kongregason. Es atividadis na dau forsa ku bu pirsisa del pa nfrenta kualker pirsigison ku koraẑen, mesmu si i bin di membrus di bu familia. Apostulu Paulu, ku pirsigidu manga di bias, fala asin aserka di Jeova: “Siñor i ña Judadur; N ka na medi.” — Ebreus 13:6.

No pudi tene mas koraẑen ora ku no na prega sempri. Pregason ta sinanu konfia na Jeova i vensi kualker medu di omi. (Ditus 29:25) Si bu tene koraẑen di prega gosi, bu na pudi sta purparadu pa kontinua prega mesmu si guvernus tuji no tarbaju. — 1 Tesalonisensis 2:2.

3. Kuma ku no na benefisia si no aguenta pirsigison?

I bardadi kuma, no ka ta kontenti ora ku no pirsigidu, ma ora ku no aguenta pirsigison, no fe ta torna mas forti. No amizadi ku Jeova ta torna mas forti, pabia no oja kuma ki judanu na mumentu ku no sinti kuma no ka tene mas forsa. (Lei Tiagu 1:2-4.) Jeova ta fika tristi ora ki oja no na sufri, ma i ta kontenti ora ki oja no aguenta. Biblia fala: “Si bo fasi ben, bo kastigadu, bo nguenta ku pasensa, el ku ta sabi Deus.” (1 Pedru 2:20) Si no manti fiel, Jeova na danu vida ku ka ta kaba na nobu mundu. I tudu kilis ku na sta la na sirbi Jeova i ningin ka na sta kontra elis. — Mateus 24:13.

 APRINDI MAS

4. No pudi aguenta opusison di familia

Jesus rikuñisi di kuma no familia pudi ka apoianu na no disison di sirbi Jeova. Lei Mateus 10:34-36, dipus bo kombersa aserka des purgunta:

• Ke ku pudi akontisi ora ku un membru di familia disidi sirbi Jeova?

5. Kontinua adora Jeova mesmu si bu na pirsigidu

 6. Jeova na judau aguenta

 RUSUMU

Jeova ta da balur garandi pa sforsu ku no ta fasi pa sirbil mesmu ku pirsigison. Ku si ajuda no pudi sai ben na aguenta pirsigison!

Rekapitulason

• Ke ku manda kristons dibi di spera kuma e na pirsigidu?

• Ke ku bu dibi di fasi desdi gosi pa sta pruntu ora ki bin ten pirsigison?

• Ke ku pudi judau tene konfiansa di kuma bu pudi sirbi Jeova mesmu dianti di kualker difikuldadi?