59 CAJ YACHACUY
Diosta sirvinanchipäga valurcharcunanchirämi
Chiquicojcunaga ilajpitami contranchicho imaycata rurar galaycärinman. Chayraycur manchacur imarga, ¿imataraj rurashwan?
1. ¿Imatataj Bibliaga mayna wilacurgan?
Caytami wilacurgan: “Chaynölami Jesucristo munashganno cawaj cajtaga pitapis chiquir nacachipäcunga” (2 Timoteo 3:12). Jesustapis alapa chiquipäcurgan cay munduwan mana talucashganraycur. Diablupa maquincho cay mundo caycaptenga, noganchipa contranchichopis imaycatachi rurapäcunga (Juan 15:18, 19).
2. ¿Imatataj cananlapitana ruraycashwan?
Chiquicojcunaga contranchicho imaycatapis rurapäcunmanchi, chaymi cananlapitana calpachacuycashwan yäracoj runa canapaj. Diosninchita mañacuycashwan y Palabrantapis leiycashwan. Mana faltaylapa reuniunninchimanpis aywaycashwan. Chaycunata ruraptinchega, imacuna pasaptinpis manami guepaman cutichimäshunchu, autoridäcuna o quiquin familianchicuna contranchicho sharcuptinpis. Apóstol Pablutaga chiquirmi gaticachapäcurgan, pero payga caytami nej: “Tayta Diosga yanapaycämanmi. Chaymi imatapis mana manchacöchu” (Hebreos 13:6).
Jina cananlapitana ali valurcharcur Diospita yachachicuycashwan. Bibliapita cutin cutin parlarga masraj Jehovaman yäracushun (Proverbios 29:25). Cananpitami canga shamoj tiempucho imacunatapis aguantanapaj (1 Tesalonicenses 2:2).
3. ¿Yangalapächuraj canga ima pruebatapis aguantaycashganchi?
Imaycatapis aguantaycarga yäracuyninchega sinchiyarcungami. Jehová imano yanapaycalämashganchitapis ricäshunmi (leiriy Santiago 1:2-4). Mayraj Jehová laquicun waquincuna chiquimashganchiraycur nacaptinchi, pero cushicunmi imacunapis guepaman mana cutichimaptinchi. Biblia cayno nin: “Allita ruraycarpis ñacaycunata päsarmi ichanga Tayta Diospaj alli caycanqui” (1 Pedro 2:20). Cananlapita ali yäracur imaycatapis aguantaptinchega, mana ushacaj cawaytami Jehová tarichimäshun, chaychoga pï maywanpis jaucala goyäcushun (Mateo 24:13).
SHUMAJ YACHACURCUNAPAJ
Yachacushun imacunata rurartaj Jehovapitaga raquicäcushwanchu, waquincuna pasaypa chiquimaptinchipis. Y ima bendiciuncunatataj Diosninchi tarichimäshun.
4. ¿Diosta sirviptiqui castayqui chiquishuptiquega?
Jesusga wilacurganmi Jehovata sirvishganchiraycur waquin castanchicunapis contranchicho sharcunanpaj. Leipäcuy Mateo 10:34-36 y caypita parlapacäriy:
-
Pipis Jehovata sirvir galaycuptenga, ¿öraga ima ningaraj familiancuna?
Waquin hermanunchicunataga familiancuna chiquipäcunmi, ¿imaraycur? VIDEUTA ricapäcuy. Nircur caypita parlapacäriy:
-
¿Imataraj ruranqui castayquicuna o amiguyquicuna Diosta jaguinayquipaj nishuptiqui?
Leipäcuy Salmo 27:10 y Marcos 10:29, 30. Textucunata leirir caypita parlapacäriy:
-
¿Imanotaj cay textucuna shacyächicun maygan castanchipis o amigunchipis jaguiramaptinchi?
5. Jehovalata aduray chiquircaycäshuptiquipis
Jehovata sirvinapaj pipis michäcuptenga, ¡valurcharcunanchirämi! VIDEUTA ricapäcuy y caypita parlapacäriy:
-
¿Imacunacho masraj calpachacunayquipätaj cay video yanapäshunqui?
Leipäcuy Hechos 5:27-29 y Hebreos 10:24, 25. Textucunata leirir caypita parlapacäriy:
-
¿Imanirtaj Jehovata sirvishganchitaga jaguirishwanchu, autoridäcuna ‘predicaychu o juntacäriychu’ nimaptinchipis?
6. Jehovawan caycarga imapis vencimäshunchu
Maypita captinpis, ima edäyoj captinpis, maychicaj testigucuna Jehovata jaguipäcushgachu waquincuna pasaypa chiquircaycaptinpis. Caypita parlaj VIDEUTA ricapäcuy. Nircur caypita parlapacäriy:
-
¿Imataj cay Testigucunata yanapashga chiquejnincuna imaycata rurashga captinpis?
Leipäcuy Romanos 8:35, 37-39, jina Filipenses 4:13. Textucunata leirir caypita parlapacäriy:
-
¿Imanotaj leishgayqui textucunaga tantiachishunqui ima pruebacunatapis aguantanayquipaj?
Leipäcuy Mateo 5:10-12 y caypita parlapacäriy:
-
¿Imanirtaj cushishga ricacushwan chiquicojcuna imaycata contranchicho ruraptinpis?
Jehovata adurajcuna imaycacunapa pasarpis aguantapäcushgami. ¡Gampis puedinquimi!
WAQUINCUNA NIPÄCUN: “Quevä aguantäman chiquicojcuna conträcho sharcur imaycata ruraptenga”.
-
¿Ima textucunaraj yanaparcunman chayno parlajcunata?
ICHIC YACHACUY
Jehovaga noganchiwanmi imaypis caycanga. Pipis o imapis paypitaga raquichimashwanchu. Calpantaga goycalämäshunmi.
Yarpänapaj
-
¿Bibliaga wilacurgannacu canan wichan chiquishga canapaj?
-
¿Imatataj cananlapitana ruraycanquiman?
-
¿Imaycacunapa pasarpis Jehovata mana jaguinayquipäga seguruchu caycanqui?
MASLATA YACHACUNAYQUIPAJ
Ricäriy imanotaj Jehová juc hermanuta yanapargan preso cashgan wichan.
Yachacuy imataj yanapargan juc matrimoniuta, imaycacunapa pasarpis Diospita mana raquicärinanpaj.
Jehovalata sirvipäcushcä imacunapis contranchicho caycaptin (7:11)
Valurcharcuy imatapis vencinayquipaj.
“Alistacuycäshun, imacunapis ilajpitami pasarinman” (Wilacamoj, julio 2019)
¿Diosta sirvinanchita castanchicuna mana munaptenga? ¿Imanotaj jaucala caycar Dioslata imaypis sirvishwan?
“Rasunpa cajwan ‘jaucala caycarpis, raquicaytami apamun’” (Wilacamoj, octubre 2017)
