59 KAQ YACHAKUNËKIPAQ
Chikiyäshuptikipis Jehoväta sirwir sïgui
Jehoväta sirwinata michäkuyaptin, y chikir imëkata ruramashqam llapantsikpis mana allikunapa pasashun, peru manam mantsakänantsiktsu.
1 KAQ: ¿Imanirtan mantsakänantsiktsu nuna chikimashqaqa?
Bibliachömi kënö nin: “Cristu Jesuspa llapan qateqninkunatam, imëkata rurar sufritsiyanqa” (2 Timoteu 3:12). Jesusqa manam wakin nunakunanötsu Satanas munanqanta rurarqan, tsëmi chikiyarqan. Noqantsikpis Jesusnömi Satanas munanqanta rurantsiktsu, tsëmi gobiernukuna y mana alli religionkuna chikimantsik (Juan 15:18, 19).
2 KAQ: ¿Imatan yanapamäshun nunakuna chikimashqapis Jehoväta sirwir sïguinapaq?
Teytantsik Jehoväman llapan shonquntsikwan confiakunqantsikmi. Tsëmi pëman cada junaq mañakunantsik, Palabran Bibliata leyinapaq tiempuntsikta alli patsätsinantsik, y reunionkunamanmi mana faltëpa ëwanantsik. Tsëkunam yanapamäshun, chikimashqa o familiantsikkuna Jehoväta sirwinata michäkuyaptimpis Teytantsik Jehoväta sirwir sïguinapaq. Apostol Pablutapis alläpam chikiyarqan, tsëmi kënö nirqan: “Teyta Jehovämi yanapamaqnï. Manam imatapis mantsashaqtsu” (Hebrëus 13:6).
Nunakunata Diospita yachatsinqantsikpis yanapamantsikmi valienti kanapaq, nunakunata mana mantsanapaq y Jehoväman mas confiakunapaq (Proverbius 29:25). Seguïdu yachatsikunqantsikmi yanapamantsik, gobiernukuna michäkuyaptimpis mana mantsakuypa yachatsikunapaq (1 Tesalonicensis 2:2).
3 KAQ: ¿Chikir imëkata ruramanqantsikqa yanapamashwantsuraq?
Chikishqa këtaqa manam munantsiktsu. Peru chikir imëkata ruramashqapis alli tsarakunqantsikqa Diosman mas markäkunapaq o yärakunapaqmi yanapamantsik. Tsëchömi cuentata qokuntsik tsarakuyta mana puëdinapaq kaqta pensashqapis, Teytantsik Jehovä yanapëkamanqantsikta (leyi Santiägu 1:2-4). Teytantsik Jehoväqa alläpam llakikun chikir imëkata ruramashqa, peru alläpam kushikun imëkapa pasarpis sirwir sïguishqaqa. Tsëmi Bibliachö kënö nin: “Allita rurayanqëkipita sufrimientuta aguantayaptikiqa, Teyta Diosmi alläpa kushikun” (1 Pëdru 2:20). Chikir imëkata rurayaptimpis Jehoväta mana dejëpa sirweqkunaqa, juk shumaq Patsachömi imëyaqpis kawakuyanqa y Jehovällatanam sirwiyanqa. Tsëchöqa manam pipis sufrinqanatsu (Mateu 24:13).
MASLLA YACHAKUSHUN
Chikir imëkata ruramashqapis Jehoväta sirwir sïguinapaq y bendicionkunata chaskinapaq kaqtam yachakushun.
4 KAQ: Familiëkikuna michäkuyaptimpis, Jehoväta sirwitaqa puëdinkim
Jesusqa willakurqanmi Jehoväta sirwinata wakin familiantsikkuna michäkuyänampaq kaqta. Leyiyë Mateu 10:34-36 ima ninqanta y këpaq parlayë:
-
Pipis Jehoväta sirwinampaq decidiptin, ¿imatataq familiankuna niyan?
Familiankuna michäkuykäyaptimpis Jehoväta sirwiyänampaq decidiyanqanta VIDEUCHÖ rikäyë y këpaq parlayë:
-
¿Imataraq rurankiman familiëki o amïguykikuna Jehoväta sirwinëkita michäkuyaptinqa?
Leyiyë Salmus 27:10 y Marcus 10:29, 30 ima ninqanta, y cada textuta leyirir këpaq parlayë:
-
Familiëkikuna o amïguykikuna Jehoväta sirwinëkita michäkuyaptin, ¿imanötan yanapashunki kë textuchö Jehovä änikunqan?
5 KAQ: Chikir imëkata rurayäshuptikipis Teytantsik Jehoväta dejëtsu
Jehoväta sirwinata michäkuyaptinqa valientim kanantsik sirwir sïguinapaq. VIDEUTA rikäyë y këpaq parlayë:
-
Videuchö willakayämunqampita, ¿imatan mas valienti kanëkipaq yanapashunki?
Leyiyë Hëchus 5:27-29 y Hebrëus 10:24, 25 ima ninqanta, y cada textuta leyirir këpaq parlayë:
-
Diospita yachatsikunata y reunionnintsikkunaman ëwanata autoridäkuna michäkuyaptimpis, ¿imanirtan Jehoväta sirwir sïguinantsik?
6 KAQ: Jehovämi yanapashunki sirwir sïguinëkipaq
Chikir imëkata rurayaptimpis mëtsë nacionpita wawqi panikunam edäna o jövinllaraq karpis, Jehoväta sirwir sïguikäyan. Pëkunata ima yanapanqanta VIDEUCHÖ rikäyë y këpaq parlayë:
-
Videuchö rikanqantsik wawqi panikunataqa, ¿imatan yanaparqan chikir imëkata rurayaptin?
Leyiyë Romänus 8:35 y 37-39, y Filipensis 4:13 ima ninqanta, y cada textuta leyirir këpaq parlayë:
-
Kë textuchö ninqannöpis, ¿imanirtan següru këkankiman chikir imëkata rurayäshuptikipis Jehoväta sirwir sïguinëkipaq kaqta?
Leyiyë Mateu 5:10-12 ima ninqanta y këpaq parlayë:
-
¿Imanirtan chikir imëkata rurayäshuptikipis kushishqa këta puëdinki?
WAKIN IMA NIYANQAN: “Chikimar imëkata rurayämaptinqa manam aguantëta puëdishaqtsu”.
-
Tsënö pensaqkunataqa, ¿Bibliachö ima ninqanraq yanapanman Jehoväman mas confiakuyänampaq?
KËTAM YACHAKURQUNKI
Chikir imëkata rurayäshuptikipis, Teytantsik Jehoväqa alläpam valoran mana dejëpa sirwinqëkita, y pëmi yanapashunki sirwir sïguinëkipaq.
¿Yarpankiku?
-
¿Imanirtan chikir imëkata ruramantsik?
-
¿Imatataq ruranëki chikir imëkata rurayäshuptikipis aguantanëkipaq?
-
¿Imanirtan següru këkankiman imëka pasakuptimpis Jehoväta sirwir sïguinëkipaq kaqta?
MASTA YACHAKUY
Ejercituman ëwëta mana munaptin carcelayanqan wawqita Jehovä imanö yanapanqanta rikë.
Diospita yachatsikuyänanta michäkuyaptimpis juk wawqiwan warmin Jehoväta sirwir sïguiyänampaq ima yanapanqanta rikë.
Imëka mana allikuna pasanqan tiempuchömi Jehoväta sirwiyarqö (7:11)
Chikir imëkata rurayäshuptikipis mana mantsapakuypa Jehoväta sirwir sïguinëkipaq ima yanapashunëkipaq kaqta yachakuy.
“Chikir sufritsimänantsik tiempupaq alistakushun” (Täpakoq, juliu 2019)
¿Imanirtan familiakuna michäkuyan Jehoväta sirwishqa? ¿Imatataq rurashwan pëkunawan alli kanapaq y Jehoväta sirwir sïguinapaq? Ima yanapashunëkipaq kaqta yachakuy.
“Jehoväta sirwinata familiantsik michäkuptin” (Täpakoq, octubri 2017)