59 YACHACHIKUY
Chiqnisqa kaspapas amayá hukmanyaychu
Diosta serviqkunaqa hukkunapa chiqnisqanmi kasunchik, autoridadkunapas contranchikpim kanqaku. ¿Chayraykuchu manchakunanchik?
1. ¿Imanasqataq chiqnisqa kanchik?
Bibliam nin: “Jesucristota qatispan tukuy sunqunwan Diosta serviy munaqqa chiqnikuq runakunapa maskasqanmi kanqa”, nispa (2 Timoteo 3:12). Runakunaqa Jesustapas chiqnirqakum mana allin ruwasqankuman mana chaqrukusqanrayku. Chaynam ñuqanchiktapas chiqniwasun autoridadkuna hinaspa pantay religionpi punta apaqkuna mana allin ruwasqankuman mana chaqrukusqanchikrayku (Juan 15:18, 19).
2. ¿Imam yanapawasun chiqnisqa kaptinchik?
Kunanmantam Diospi hapipakunapaq kallpanchakunanchik. Chaypaqmi sapa punchaw Diosta mañakunanchik hinaspa palabranta estudiananchik. Chaymantapas, huñunakuykunamanmi rinanchik. Chaykunam yanapawasunchik qipakunata autoridadkuna utaq familianchikpas harkakuptinku llumpayta mana hukmanyarunapaq. Apostol Pablopas chiqnisqam karqa, ichaqa kaynatam nirqa: “Jehova Diosmi ñuqapa yanapawaqniyqa”, nispa (Hebreos 13:6).
Sapa kuti Diosmanta willakuyninchikqa ancha allinmi. Yanapawanchikmi Jehova Diospi astawan hapipakuspa runata mana manchakunapaq (Proverbios 29:25). Mana manchakuspa kunanmanta willakuspanchikqa qipakunata gobiernokuna harkakuwaptinchikpas hinallam willakusun (1 Tesalonicenses 2:2).
3. ¿Yanapawanchikchu chiqnisqa kaspa aguantasqanchik?
Manam munanchikchu chiqnisqa kaytaqa, ichaqa chiqniwaptinchik aguantaspaqa Jehova Diospim astawan hapipakunchik. Sasachakuypi tarikuspa mana ima ruwaytapas atiptinchik Dios yanapaykuwaptinchikqa paypim astawan hapipakunchik (leey Santiago 1:2-4). Sasachakuykunapi kaptinchikqa Diosqa llakikunmi, chaywanpas aguantaptinchikqa kusikunmi. Bibliapim nin: “Allin ruwasqaykichikmanta sasachakuykunapi kaspa aguantasqaykichikmi ichaqa Diospaqqa allinpuni”, nispa (1 Pedro 2:20). Sasachakuykunata aguantaspa Diospi hapipakuptinchikqa hamuq punchawpim payqa wiñay kawsayta quwasunchik, chaypiqa manañam kanqañachu chiqniwaqninchik runakunaqa (Mateo 24:13).
ASTAWAN YACHAYKUSUN
Yachaykusun sasachakuypi kaspapas Jehova Diospi hapipakuyta atisqanchikmanta. Yachasuntaqmi hinalla aguantaptinchikqa Dios tukuypi yanapawananchikmantapas.
4. Dios serviytaqa atiwaqmi familiayki harkakusuptikipas
Jesusqa nirqañam tayta-mamanchik utaq wakin familianchik Jehova Dios servinanchikta harkakunanmanta. Leeychik Mateo 10:34-36 hinaspa qatiqninmanta rimariychik:
-
Pipas Diosta servinanpaq tantiakuptinqa, ¿imaynam familian tarikunman?
Sasachakuypi kaqkunata riqsinaykichikpaq VIDEOTA qawaykuychik hinaspa rimariychik:
-
¿Imatataq ruwawaq familiayki utaq amistadnikikuna “religionnikita saqiy” nisuptiki?
Leeychik Salmos 27:10 hinaspa Marcos 10:29, 30. Chaymantañataq rimariychik:
-
¿Kallpanchasunkichu kay leesqanchik Dios servinaykita harkakuptinku?
5. Chiqnisqa kaspaykipas amayá Diostaqa saqiychu
Pi runaña harkakuwaptinchikpas mana manchakuspam Jehova Diostaqa hinalla servinanchik. VIDEOTA qawaykuychik hinaspa qatiqninmanta rimariychik:
-
Qawasqanchik videopi iñiqmasinchikkunapa, ¿ima ruwasqantaq yanapasunki mana manchakuq kanaykipaq?
Leeychik Hechos 5:27-29 hinaspa Hebreos 10:24, 25. Chaymantañataq qatiqninmanta rimariychik:
-
¿Imanasqataq hinalla Diosmanta willakunanchik hinaspa huñunakunanchik autoridadkuna harkakuptinpas?
6. Imaña kaptinpas Diosqa yanapasunkim
Achka iñiqmasinchikkunam hinalla Diosman sunqu karqaku autoridadkuna contranpi hatariptinkupas. Chaymanta yachanaykipaq VIDEOTA qawaykuychik. Chaymantañataq qatiqninmanta rimariychik:
-
¿Imataq iñiqmasinchikkunata yanaparqa sasachakuypi kaptinku Diosman sunqu kanankupaq?
Leeychik Romanos 8:35, 37-39 hinaspa Filipenses 4:13. Chaymantañataq qatiqninmanta rimariychik:
-
¿Imaynatataq kay leesqanchik yanapasunkiman sasachakuykunapi tarikuptiki?
Leeychik Mateo 5:10-12 hinaspa qatiqninmanta rimariychik:
-
¿Imanasqataq kusisqa kachwan chiqnisqa kaspapas?
Waranqantin Jehova Diospa testigonkunam chiqnisqa kaspankupas chaynataq presochasqa kaspankupas hinalla Diospi hapipakurqaku. Qampas atiwaqmi paykuna hina kaytaqa.
WAKINKUM NINKU: “Dios servisqayrayku ñakarichiwaptinkuqa manam ñuqaqa aguantaymanchu”, nispa.
-
Chaynata pipas niptin, ¿ima textowantaq yanapawaq Diospi astawan hapipakunanpaq?
YUYARIYKUSUN
Jehova Diosqa anchatam kusikun runakuna chiqniwaptinchikpas hinalla serviptinchikqa. Yanapakuyninwanqa atisunmi payman sunqu kaytaqa.
¿Ima niwaqtaq?
-
¿Imanasqataq Diosta serviqkunaqa chiqnisqa kanchik?
-
¿Imatam kunanmanta ruwanayki sasachakuykuna kaptin aguantanaykipaq?
-
¿Imanasqataq mana iskayrayanaykichu imaña kaptinpas Jehova Dios yanapasunaykimanta?
ASTAWAN YACHANAYKIPAQ
¿Imaynatam Dios yanaparqa musullaraq iñiqmasinchikta soldado kayta mana munaptin presocharuptinku? Chaymanta qawaykuy.
Qawaykuy casado iñiqmasinchikkuna willakunankuta autoridadkuna unay wata harkakuptinku ima yanapasqanmanta.
¿Imataq yanapasunki chiqnispa maskawaptinchik hawkalla kanaykipaq? Chaymanta kaypi leeykuy.
“Kunanmantayá kallpanchakusun mana manchakuq kanapaq” (Willakuq, julio 2019)
¿Imataq yanapawasun Dios servinanchikta familianchik harkakuptin? ¿Imaynatam paykunawan hinaspa Dioswan allinlla kachwan? Chaymanta leeykuy.
“Manam hawkayay kananpaqchu hamurqaniqa, aswanqa runakunata rakinachiqmi” (Willakuq, octubre 2017)
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
