59 YACHACHIKUY
Aguantallankin qatikachasqa kaytaqa
Noqanchis Diosta serviqkunataqa jayk’aqllapas pipas jark’awasunpunin, cheqniwasunpunin, hasta qatikachawasun imapaschá. ¿Manchakunanchischu chayta?
1. ¿Imaraykun mana admirakunachu jujkuna cheqniwaqtinchis?
Biblian nin: “Pipas Cristo Jesuswan jujllachasqa kaspa Diosta serviqqa qatikachasqallataqmi kanqa”, nispa (2 Timoteo 3:12). Señorninchis Jesucristotapas qatikacharqankun. ¿Imarayku? Mana kay pacha runakuna jinachu kasqanrayku. Noqanchispas Jesús jinan mana kay pacha runakuna jinachu kanchis, chaymi autoridadkunapas juj religionkunapi runakunapas qatikachawanchis (Juan 15:18, 19).
2. ¿Imatan ruwasunman aguantananchispaq?
Kunanmantapachan kallpachakunanchis Jehová Diosta astawan reqsinanchispaq, chhaynapin paypi confiasun. Chaypaqmi ichaqa tiempota t’aqananchis Diosmanta mañakunanchispaq, Bibliata estudiananchispaq ima, juñunakuykunamanpas manan faltakunanchischu. Sichus chaykunata ruwasun chayqa, manan manchakusunchu piña mayña qatikachawasun chaypas, familianchisña cheqnikuwasun chaypas. Apóstol Pablotapas sinchitan qatikachaqku, paymi nirqan: “Jehová Diosmi yanapawaqniyqa, manan manchakusaqchu”, nispa (Hebreos 13:6).
Diosmanta sapa kutilla willaypas yanapawasunmi mana manchakuq kananchispaq. Maypiña kaspapas rimashallasun chayqa, astawanmi yachasun Diospi confiayta manataq pitapas manchakusunchu (Proverbios 29:25). Chayrayku, sichus kunanmantapacha mana manchakuspa Diosmanta rimanki chayqa, autoridadkunaña jark’awasun chaypas manan manchakunkichu pimanpas willaytaqa (1 Tesalonicenses 2:2).
3. ¿Imapin yanapawasunman runakunaq qatikachawasqanchista aguantay?
Manan pimanpas gustawanchischu jujkunaq cheqnisqan kayqa, qatikachasqan kaypas. Ichaqa chaykunata aguantaymi yanapawasun allin iñiyniyoq kananchispaq. Chaymantapas Jehová Dios yanapawasqanchista rikuspan astawan payman asuykusunchis (leey Santiago 1:2-4). Jehová Diosqa llakikunmi sufrisqanchista rikuspa, aguantasqanchista rikuspataq kusikun. Biblian nin: “Allin kaqkunata ruwasqaykichisrayku ñak’ariykunata aguantaspan […] Diospa sonqonta kusichishankichis”, nispa (1 Pedro 2:20). Jehová Diosqa llapa aguantaqkunamanmi, imaña kaqtinpas pay sonqolla kaqkunamanmi wiñay kausayta qonqa, chaypiqa manañan kanqañachu Dios contra jatariq runakunaqa (Mateo 24:13).
ASTAWAN YACHASUNCHIS
Kaypin astawan yachasun imaynas qatikachasqaña kaspapas Dios sonqollapuni kasunman chayta. Ima bendicionkunatas aguantasqanchismanta pay qowasun chaytapas.
4. Familiaykiña qan contra kaqtinpas atillankin aguantayta
Jesusqa sut’intan willarqan imaynas Jehová Diosta servisqanchisrayku wakin familianchis noqanchis contra kananku karqan chayta. Leeychis Mateo 10:34-36 textota, jinaspa jamuq tapuyman jina parlariychis:
-
Pipas Diosta serviyta qallariqtin, ¿imaynatan yaqapas familian qhawarinman?
Imaynas wakin iñiqmasikunata familianku cheqnikurqanku chayta yachanapaq VIDEOTA qhawaychis, jinaspa jamuq tapuyman jina parlariychis:
-
¿Imatan ruwawaq familiaykipas amigoykipas Jehová Diosta ama servinaykipaq nisuqtiyki?
Leeychis Salmos 27:10; Marcos 10:29, 30 textokunata. Sapanka textota leesqaykichis qhepaman kaypi kaq tapuyman jina parlariychis:
-
¿Yanapasunkimanchu kay leesqanchis texto familiaykipas amigoykipas Dios servinaykita jark’asuqtiyki?
5. Qatikachasqaña kaspapas amapuni Jehová Diostaqa saqeychu
Jujkunaña Diosta servinanchista jark’awasuman chaypas manan manchakunanchischu. VIDEOTA qhawaychis, jinaspa jamuq tapuyman jina parlariychis:
-
¿Kay video qhawasqanchismanta imakunan kallpachasunki ama manchakuspa Diosta servinaykipaq?
Leeychis Hechos 5:27-29; Hebreos 10:24, 25 textokunata. Sapanka textota leesqaykichis qhepaman kaypi kaq tapuyman jina parlariychis:
-
Autoridadkunaña jark’awasunman chaypas, ¿imaraykun Diosta servishanallanchis? ¿Imaraykun juñunakushanallanchis Diosmantapas willashanallanchis?
6. Jehová Diosmi yanapasunki
Jehová Diospa testigonkunaqa qatikachasqaña kaspapas manapunin Diostaqa saqerqankuchu. ¿Iman paykunata yanaparqan aguantanankupaq? VIDEOTA qhawaychis, jinaspa jamuq tapuyman jina parlariychis:
-
¿Iman videopi rikusqanchis hermanokunata yanaparqan qatiykachasqa kaspapas aguantanankupaq?
Leeychis Romanos 8:35, 37-39; Filipenses 4:13 textokunata. Sapanka textota leesqaykichis qhepaman kaypi kaq tapuyman jina parlariychis:
-
Kay texto leesqanchis jina, ¿imapas Diosmanta t’aqayta atiwasunmanchu? ¿Pin noqanchiswan kashan?
Leeychis Mateo 5:10-12 textota, jinaspa jamuq tapuyman jina parlariychis:
-
¿Imaraykun qatikachasqaña kaspapas kusisqa kasunman?
Millonninpi Diosta serviqkunan qatikachasqaña kaspapas servishallanku Jehová Diosta. ¡Qanpas imaña kaqtinpas atinkin Diosta serviytaqa!
WAKIN RUNAKUNAN NINKU: “Manapunin noqaqa ima qatikachasqa kaytapas ni jark’asqa kaytapas aguantaymanchu”, nispa.
-
¿Mayqen textokunan yanapanman chhayna piensaqkunata?
IMATAN YACHAMURQANCHIS
Jehová Diosqa anchatan kusikun qatikachasqaña kaspapas, cheqnisqaña kaspapas payta servinanchispaq kallpachakusqanchista rikuspa. ¡Paypa yanapayninwanqa imatapas aguantallasunmi!
Yuyarisun
-
¿Imaraykun mana admirakunanchischu qatikachasqa, cheqnisqa kaspanchis?
-
¿Imaynatan kunanmantapacha preparakuwaq qatikachay tiempopi aguantanaykipaq?
-
¿Iman kallpachasunki imaña kaqtinpas Jehová Diosta servishanallaykipaq?
ASTAWAN YACHANAYKIPAQ
Juj waynatan carcelman apasqaku ejercitoman mana risqanrayku. Paymanta kaypi yachay.
Kay videopin yachanki imaynas juj casarasqa iñiqmasikuna jark’asqaña kaspapas tukuy sonqo Jehová Diosta servirqanku chayta.
Kaypin yachanki imaynatas mana manchakuspa ima qatikachaytapas aguantawaq chayta.
“Preparakusun qatikachayta aguantanapaq” (Qhawaq, 2019 watapi julio killa)
Mayninpiqa familianchismi jark’awasun Dios servinanchista. Chhaynapi tarikuspa, ¿imatan ruwasunman ama pitapas phiñachinapaq, Diostapas ama saqenapaq?
“Wakinqa cheqnikuwasunpaschá Diosta servisqanchisrayku” (Qhawaq, 2017 watapi octubre killa)
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
