LESON 59

Ou pe andur la pèrsékusion

ÉKOUT AN

To ou tar, tout bann krétien va konèt lopozision, é mèm la pèrsékusion. Èske sa i devré fé peur aou ?

1. Poukosa nou atann anou èt pèrsékuté ?

La Bib i di bien : « Tout sak i ve viv dan latachman Bondieu é uni èk Kris Jézu i sra zot osi pèrsékuté » (2 Timoté 3:12). Jézu lété pèrsékuté parske li té fé pa parti le monn Satan. Anou osi, nou fé pa parti se monn la. Donk nou lé pa étoné kan nou lé pèrsékuté par bann gouvèrnman oubien par bann lorganizasion relijieu dan le monn la (Jan 15:18, 19).

2. Koman nou prépar anou pou la pèrsékusion ?

Nou doi rann for nout konfians an Jéova depui koméla mèm. Tou lé jour, pran le tan priyé é lir la Bib. Asis souvan bann rénion. Bann zabitud la, va donn anou la fors é kouraj afront tout kalité pèrsékusion, mèm sak i vien de nout fami. Lapot Pol, ke la souvan été pèrsékuté, la ékri : « Jéova lé mon sekour ; mi nora pa peur » (Ébreu 13:6).

Nou nora ankor plus kouraj si nou prèch souvan. Préché i aprann anou fé konfians Jéova é pa tranm devan domoun (Provèrb 29:25). Dukou si in jour bann zotorité i intèrdi nout bann zaktivité, nou sra paré pou afront se situasion la é nou va kontinué préché èk kouraj (1 Tésalonisien 2:2).

3. Kèl bienfé nou néna kan nou andur la pèrsékusion ?

Nou ièm pa èt pèrsékuté, mé andur la pèrsékusion i rann nout foi plu for. É resanti lèd Jéova kan nou na pu la fors, i raproch anou ankor plus koté li (lir Jak 1:2-4). Jéova lé vréman tris kan nou souf, mé li lé kontan kan li voi ke nou tienbo. La Bib i di : « Si zot i andur bann soufrans parske zot la fé le bien, sa sé in bon zafèr pou Bondieu » (1 Pièr 2:20). Jéova va béni sak i andur é i rès fidèl. Li va donn azot la vi pou toultan, dan in monn ousa nora pu lopozision kont le vré ladorasion (Matieu 24:13).

ALON APRANN PLUS

Alon voir sak va èd anou rès fidèl malgré la pèrsékusion é koman Jéova va béni anou.

4. Ou pe andur lopozision dan out fami

Jézu lavé prévnu anou ke nout fami i sré petèt pa dakor, si nou désid sèrv Jéova. Lir Matieu 10:34-36 é koz su késtion la :

Kan in moun i désid sèrv Jéova, koman son fami i pouré réaji ?

Pou voir in légzanp, gard le VIDÉO. Aprésa, koz su le késtion ki vien apré.

VIDÉO : Jéova la akeuy anou (5:13)

Kosa ou va fé, si out fami oubien in kamarad i ésèy anpèch aou sèrv Jéova ?

Lir Psom 27:10 é Mark 10:29, 30. Aprésa, koz su késtion la :

Koman promès la, i pe èd aou surmont lopozision dan out fami oubien sak in kamarad ?

5. Kontinué ador Jéova malgré la pèrsékusion

I fo kouraj pou sèrv Jéova kan i ésèy anpèch anou sèrv ali. Gard le VIDÉO é koz su le késtion ki vien apré.

VIDÉO : Kourajeu malgré la pèrsékusion (6:27)

Kosa ou la trouv ankourajan dan bann légzanp la ?

Lir Akt 5:27-29 é Ébreu 10:24, 25. Aprésa, koz su késtion la :

Poukosa lé vréman inportan kontinué ador Jéova, mèm si la prédikasion oubien bann rénion lé intèrdi ?

6. Jéova va èd aou pou anduré

Bann Témoin Jéova tout laj é tout péi, la rès fidèl Jéova malgré la pèrsékusion. Pou konèt sak la èd banna, gard le VIDÉO. Aprésa, koz su le késtion ki vien apré.