59 УРОКИ
Ащи те ачшовес верно е Йеховаске, кана дикхен те спиринен тут те служинес леске
О мануша ка дикхен те спиринен амен те служинас е Йеховаске. Даже ащи те керен амаро животос пхаро, за те на ачшовас леске верна. Ама требе ли те дарас?
1. Катар жанас, кай ка дикхен те спиринен амен те служинас е Йеховаске?
И Библия ясно пхенел аменге: „Саворе, колато манген те ачшовен верна е Девлеске сар о Исус Христос, също ка овен гониме.“ (2 Тимотей 3:12) О Исусес сине гониме, соскето на сине част таре Бенгескоро светос. Аме-да на синям част калке светостар, аке соске жанас, кай о политикя тай о хохавне религиес ка гонинен амен, за те спиринен амен те служинас е Йеховаске. (Йоан 15:18, 19)
2. Со те керас, за те овас готова те издържинас, кана ка дикхен те спиринен амен те служинас е Йеховаске?
Требе още акана те барярас амаро доверие кариг о Йехова. Требе те отделинес време секо диес те молинес тут леске тай те четинес лескоро Слово. Требе винаги те жас ко събрания. Калка букя ка ден тут силес те издържинес тай те овес смело, кана декхой дикхел те спиринел тут те служинес е Йеховаске, даже ако ов си тере семействостар. О апостол Павел, ковато често сине гониме, пишингяс: „О Йехова помагинел манге; нанай состар те дарав.“ (Евреи 13:6)
Ако проповединас често, ка ачшовас по-смела. Кана проповединас, сикльовас те мукас амен е Йеховаске андо васта тай те на дарас таро мануша. (Притчи 29:25) Ако иси тут смелост те проповединес акана, ка овес готово те продължинес те проповединес даже кана о мануша, колен иси власт, ка дикхен те спиринен амен те проповединас. (1 Солунци 2:2)
3. Соске си амаре лачшипнаске те ачшовас верна е Йеховаске, кана дикхен те спиринен амен те служинас леске?
Нанай аменге приятно, кана гонинен амен, ама кана издържинас тай ачшовас верна е Йеховаске, амари вяра барьол. Аме ачшовас по-лачше амала е Йеховаса, соскето дикхас сар ов помагинел аменге, кана вече нанай амен силес. (Четине Яков 1:2-4.) Е Йеховас дукхал, кана дикхел, кай си аменге пхаро, ама керел по барипе аменца, кана дикхел, кай издържинас. И Библия пхенел: „Ако издържинен, кана иси тумен проблемя, ашал далкхеске кай керен лачшипе, давкха си шукар е Девлеске андо якха.“ (1 Петър 2:20) И награда, която о Йехова ка дел саворен, колато ачшон леске верна, си вечно животос андо нево светос, кате никхой нанай те пречинел аменге те служинас леске. (Матей 24:13)
РОДЕ ПО-ХОРЕСТЕ
Дикх соске ащи те овас сигурна, кай ащи те ачшовас верна е Йеховаске даже кана гонинен амен, тай сар ов ка благословинел амен.
4. Ащи те издържинес, ако то семейство дикхел те спиринел тут те служинес е Йеховаске
О Исусес бут шукар жанелас, кай декхой амаре семействостар ащи те на мангел те служинас е Йеховаске. Четинен Матей 10:34-36 тай хоратинен калке въпросиеске:
-
Со ащи те ачшол, кана декхой таро семейство решинел те служинел е Йеховаске?
За те дикхен йекх примери, дикхен о КЛИПИ тай хоратинен калке въпросиеске:
-
Со ка керес, ако декхой те енданиендар или те амалендар, дикхел те спиринел тут те служинес е Йеховаске?
Четинен Псалм 27:10 тай Марко 10:29, 30. Палал секоне стихиесте хоратинен калке въпросиеске:
-
Сар кавка обещание ка помагинел туке, ако те енданя или те амала дикхен те спиринен тут те служинес е Йеховаске?
5. Продължине те служинес е Йеховаске даже кана гонинен амен
Требел аменге смелост те служинас е Йеховаске, кана гонинен амен. Дикхен о КЛИПИ тай хоратинен калке въпросиеске:
-
Сар о примеря таро клипи ден тут смелост?
Четинен Деяния 5:27-29 тай Евреи 10:24, 25. Палал секоне стихиесте хоратинен калке въпросиеске:
-
Соске си важно те продължинас те служинас е Йеховаске даже ако си забраниме те проповединас тай те овен амен събрания?
6. О Йехова ка помагинел туке те издържинес
Нито о терне, нито о пхуре пхрала тай пхеня ко цело светос на спиринен те служинен е Йеховаске даже кана гонинен амен. Дикхен о КЛИПИ, за те ахальовен со помагинел ленге тай хоратинен калке въпросиеске:
-
Со помагингяс е пхраленге тай е пхениенге таро клипи те издържинен?
Четинен Римляни 8:35, 37-39 тай Филипяни 4:13. Палал секоне стихиесте хоратинен калке въпросиеске:
-
Сар о стихи сикавел туке, кай ащи те издържинес секо йекх изпитание?
Четинен Матей 5:10-12 тай хоратинен калке въпросиеске:
-
Соске ащи те овес щастливо даже ако гонинен амен?
Бут служителя е Йеховаскере ачшиле леске верна, кана гонинде лен. Ту-да ащи те ачшовес леске верно!
ДЕСАВЕ МАНУША ПХЕНЕН: „Ме нанай те издържинав, ако гонинен амен.“
-
Саве стиховя ащи те помагинен калке манушенге те на даран?
СО СИКЛИЛЯМ
О Йехова керел по барипе аменца, кана служинас леске даже кана гонинен амен. Аме ащи те издържинас, соскето ов помагинел аменге!
О най-важна букя таро уроки
-
Катар жанас, кай ка дикхен те спиринен амен те служинас е Йеховаске?
-
Со ащи те керес акана, за те овес готово те издържинес, кана ка ачшон салка букя?
-
Соске ащи те овес сигурно, кай ащи те служинес е Йеховаске саве-да изпитания те овен тут?
АХАЛЬОВ ПО-БУТ
Дикх сар о Йехова помагингяс йекхе пхралеске те издържинел, кана сине чшивдо ко пханлибе, соскето на мангелас те овел част таро светос.
Ахальов со помагингяс йекхе пхралеске тай лескере семействоске те служинен е Йеховаске бут бреша тай те овен леске верна, въпреки кай гониненас лен.
Дикх со ка помагинел туке те овес смело, кана гонинен амен.
Подготви се за преследване отсега („Стражева кула“ юли 2019)
Со требе те мислинас, кана декхой амаре семействостар дикхел те спиринел амен те служинас е Йеховаске? Сар ащи те издържинас, кана иси амен салка изпитания?
Истината не носи „мир, а меч“ („Стражева кула“ октомври 2017)
