Ap hako christeste well ko tsiro, kai haiwell lo pharo koowa, oder kai well lo palla lino. Hunte well menge kanna traash doleske?

1. Hoske djinah mer, kai lenn le men palla?

I bibla penella direkt: “Kola, kai patsenn ap o Jesus Christeste un kamenn te krenn, hoi job kamella, wenn palla lino” (2. Timoteo 3:12). O Jesus was palla lino doleske, kai his job gar o bengeskro swettestar. Mer ham witar gar kawa swettestar, doleske djinah ninna, kai i swetteskre pralstune un kol pralstune dran i kangri men ninna palla lenna (Johanni 15:18, 19).

2. Hoi hunte kras mer glan ko tsiro, kai wah palla lino?

Maro patsepen ap i Jehoweste hunte kras mer kanna sorleder. Le tuke hako diwes tsiro, te nai rakress leha an o mangepen, te draweress nai an i bibla, un dja ninna an o Khetnepen hako kurko. Kowa halauter dell tuke koi soor, te nai atchess sorles tardo, te wenn phare tsire, oder te krell tiri familja tuke o djipen phares. O bitchepaskro Paulo, kai was ninna bud kope palla lino, tchinas: O Jehowah “hi ap miri rig, me hunte darap gar” (Hebrearja 13:6).

Jaake budeder mer mari Debleskri Budi krah, jaake bareder well ninna mari soor. Hoske hi kowa jaake? Doleske, kai tchiwah mer maro patsepen ap i Jehoweste, un doleske, kai djah mer pral koi traash glan menshende (Gosewe Laba 29:25). Tu te aneh kanna i sorjah o latcho lab, hi tuke kowa mishto an ko tsiro, te kamenn pralstune, te mukas mari Debleskri Budi (1. Tessalonikarja 2:2).

3. Hoske hi menge kowa mishto, te rikrah win tel phare tsire?

Shukar hi menge kowa gar, te wah palla lino. Hoi menge mishto hi: Te rikrah tel pharo koowa win, well maro patsepen sorleder. Ninna well maro malepen i Jehoweha feteder doleske, kai haiwah, job hi menge koi, te patsah, kai djal buder gar dureder (Dik pal an Jakobo 1:2-4). Ninna te dukell les mari bibacht, hi lo bachteles, te dah gar pre. I bibla penella: “Te krenn tumer latcho koowa, un jon dukrenn tumen dran kowa, palle sharell tumen o Dewel” (1. Petro 2:20). Mer te rikrah win, dell o Jehowah men an o newo swetto o djipen hake tsireske. Kote dell buder kek tchilatcho, kai lell men palla — kote djiwenn kokres sawe, kai kamenn i Jehoweske te djiwell (Mateo 24:13).

 RODAS DUREDER

4. Atch sorles, te krell i familja tiro djipen phares

O Jesus djinas: Gar hakeno an jekeskri familja kamell, kai nashah o Jehoweskro drom. Dikenn pal an Mateo 10:34-36, un rakrenn khetne pral:

• Hoi nai hunell jek halauter peskri familjatar, te kamell lo o Jehoweskro drom te djal?

5. Djip i Jehoweske, ninna te lenn le tut palla

 6. O Jehowah hi tuke koi, te nai rikress win

 HOI KATE PENLO WAS

I Jehoweske hi kowa bud moldo, mer te atchah tel pharo koowa ap leskri rig. Te hi job pash mende, nai rikrah mer win — hi jek, hoi wella!

Hoi penals tu?

• Hoske wenn christe palla lino?

• Har nai kreh tu tiri soor glan i pharo tsiro bareder?

• Hoske patseh tu, kai nai atcheh tu i Jehoweske loyaltikes tel hako pharo koowa?