ADESUA 59
Ɛkɔhora Kogyina Ɛpɔen Noa
Ɔngɔhyɛ koraa, Kristofoɛ mukoraati koyia ɛpɔen bɔ enu yɛ se paa ɔ. Aso odikyɛ yɛmaa esuroen kã yɛ anaa?
1. Nzuati yeɛ yɛnea ɛpɔen Atẽe ɔ?
Bible ne maa enu da berɛ kyɛ: “Bɛbɔ bɛpenakyɛ bɛfa nyamesom pá bɛtena ase kyɛ, Kristo Yesu sĩlilɛfoɛ ne mukoraati ne, bɛkɔpɔ bɛ.” (2 Timoteo 3:12) Ɔnate kyɛ Yesu amva yenwo anwurawura Satan wiase he anu nati, bɛpɔle ye. Yɛ koso, ɔnate kyɛ yɛmva yɛnwo yewurawura ewiase nanu ti, ɔnyɛ yɛ nwanwa koraa kyɛ, ewiase atumvoɛ ne nyamesom ahyehyɛdeɛ ahoroɛ ne pɔ yɛ sɔ ne.—Yohane 15:18, 19.
2. Yɛkɔyɛ sɛɛ ne yasiesie yɛnwo yama ɛpɔen?
Sɔ mmerɛ he yeɛ odikyɛ yɛhyɛ yɛne Yehowa afĩa abusuabɔ nanu serɛ ɔ. Nya mmerɛ bɔ ye mbaeɛ daabiala, na kenga Bible ne. Kɔ asafo nhyiamu daa. Sɔ bɔ ɛkɔyɛ ne kɔma w’anwoserɛ bɔ ehia, na ahora anya akokoduro afa gyina ɛpɔen biala noa, ɔmva yenwo po kyɛ w’abusuafoɛ yeɛ bɛkɔfa bɛkɔwa wɔ so ne. Somafoɛ Paul bɔ ne oyia ɛpɔen daa ne hworɔle kyɛ: “Yehowa te me bokafoɛ; Mengosuro.”—Hebrifoɛ 13:6.
Sɛ yɛyɛ asɛnga adwuma ne daa a, ɛhene koso kɔmaa yekonya akokoduro. Asɛnga adwuma ne boka yɛ maa yɛfa yɛnwo yɛto Yehowa so, na ɔmaa yedi sona nwo suroen biala so. (Anyandera 29:25) Sɛ enya akokoduro kã nzɛmba ne bie ɛnnɛ a, ɔkɔmaa ɛkɔhɔso kosiesie wɔnwo kɔyɛ asɛnga adwuma ne, mmerɛ bɔ awaen n’afa yesa ato y’adwuma naso ne.—1 Tɛsalonikafoɛ 2:2.
3. Sɛ yegyina ɛpɔen noa a, mvasoɛ beni yeɛ yenya yefi so ɔ?
Ɔwɔ nu kyɛ yeyia ɛpɔen a, yɛnye ngye yenwo de, nakoso sɛ yɛkora yegyina ye noa a, ɔmaa yɛ gyidie yɛ se. Ɔba sɔ a, ɔmaa yɛtwẽ yepingye Yehowa ofikyɛ yenya ye mmokalɛ so mvasoɛ, mmerɛ bɔ yɛte ngã kyɛ yɛngɔhora yegogyina nu ne. (Kenga Yakobo 1:2-4.) Sɛ yenwu amaneɛ a, ɔyɛ Yehowa ya, nakoso sɛ yɛkora yegyina nu a, ɔmaa yenye gye paa. Bible ne kã kyɛ: “Sɛ nikyee bɔ ɔte pá ti ɛmɔ nwu amaneɛ, na ɛmɔfa animia begyina nu a, ɛhe yeɛ ɔsɔ Nyameɛpiri nye ɔ.” (1 Petro 2:20) Yehowa kɔfa akatuaa bɔ yeɛ ole daa ngõa kɔma bɛbɔ bɛfale nahorɛlilɛ begyinane nu ne mukoraati, wɔ ewiase foforɛ bɔ bɛngɔpɔ nahorɛ asomvoɛ kõ nu.—Mateo 24:13.
SUA PẼE BOKASO
Sua kyɛbɔ ekoli nahorɛ kɔma Yehowa mmerɛ bɔ mmenia pɔ wɔ ne, na nea akatuaa bɔ ekonya ye ɔ.
4. Ɛkɔhora kogyina ɛpɔen bɔ abusuafoɛ fa ba wɔ so ne noa
Yesu mane enu lale berɛ pefee kyɛ, sɛ yesi gyinaeɛ kyɛ yɛkɔsõ Yehowa a, y’abusuafoɛ ne yɛ ngɔyɛ adwene. Kenga Mateo 10:34-36, na susu nzɛmmisa he anwo:
-
Sɛ abusua bie nuniɛ si gyinaeɛ kyɛ ɔkɔsõ Yehowa a, nzu yeɛ abusuafoɛ ne kɔhora kɔyɛ ɔ?
Sɛ ɛpena ɛhe anwo nneasoɛ a, bɔ VIDIO ne, na susu nzɛmmisa he anwo.
-
Sɛ wɔ busuaniɛ anaa wɔ damvo bu w’abanu wɔ sõen bɔ ɛfa ma Yehowa nanwo a, nzu yeɛ ɛkɔyɛ ɔ?
Kenga Edwein 27:10 ɔne Marko 10:29, 30. Sɛ ɛkenga twerɔnzɛm nanu biala yie a, susu nzɛmmisa he anwo:
-
Sɛ eyia ɛpɔen fi wɔ busuaniɛ anaa wɔ nnamvomɔ berɛ a, sɛɛ yeɛ sɔ bɔhyɛ he kɔboka wɔ ɔ?
5. Sɛ eyia ɛpɔen po a, kɔso sõ Yehowa
Sɛ afoforɛ pɔ yɛ a, odé akokoduro kora na yahora yasõ Yehowa. Bɔ VIDIO ne, na susu nzɛmmisa he anwo.
-
Nneasoɛ beni yeɛ ɔwɔ vidio he anu bɔ ɔhyɛ wɔ serɛ ɔ?
Kenga Asomafoɛ Ne Nnwumaa 5:27-29 ɔne Hebrifoɛ 10:24, 25. Sɛ ɛkenga twerɔnzɛm nanu biala yie a, susu nzɛmmisa he anwo:
-
Sɛ bɛbra asɛnga adwuma anaa nhyiamu ahoroɛ a, nzuati yeɛ yenwo hia paa kyɛ ɛkɔso sõ Yehowa ɔ?
6. Yehowa kɔboka wɔ maa ekogyina nu
Yehowa Adanzefoɛ bɔ ɔsono nekaa bɔ ebiala fi, ɔne afoɛ bɔ ebiala ali ahɔso afa nahorɛlilɛ asõ Yehowa, ɔmva yenwo kyɛ beyia ɛpɔen ne. Sɛ ɛpena kyɛ enwu bɔ ɔbokale bɛ a, bɔ VIDIO ne. na susu nzɛmmisa bɔ ɔtoaso nanwo.
-
Wɔ vidio nanu ne, nzu yeɛ ɔbokale Adanzefoɛ hemɔ maa bɛhora begyinane ɛpɔen biala noa ɔ?
Kenga Romanfoɛ 8:35, 37-39 ɔne Filipifoɛ 4:13. Sɛ ɛkenga twerɔnzɛm nanu biala yie a, susu nzɛmmisa he anwo:
-
Sɛɛ yeɛ tworɔnzɛm he maa enya awerɛhyɛmuɛ kyɛ, ɛkɔhora kogyina ɛpɔen biala bɔ eyia ne noa ɔ?
Kenga Mateo 5:10-12, na susu nzɛmmisa he anwo:
-
Sɛ eyia ɛpɔen po a, nzuati yeɛ wɔnye kɔhora kɔgye ɔ?
Yehowa asomvoɛ million pẽe ahora agyina ɛpɔen ahoroɛ noa. Sɔ ala yeɛ wɔ koso ɛkɔhora kogyina yenoa ɔ!
EBIEMƆ KÃ KYƐ: “Mengɔhora ngogyina ɛpɔen noa.”
-
Twerɔnzɛm beni yeɛ ɛkɔfa kɔboka bɛ maa bɛkonya akokoduro ɔ?
YEMUABƆLƐ
Yehowa nye sɔ mmɔden bɔ yɛbɔ kyɛ yɛkɔsõ ye, ɔmva yenwo kyɛ yeyia ɛpɔen ne. Ɔnate ye mmokalɛ so ne, yɛkɔhora yekogyina nu!
Ndimu
-
Nzuati yeɛ odikyɛ Kristofoɛ nea atẽe kyɛ bekoyia ɛpɔen ɔ?
-
Sɛ ɔtaeɛ ba a, nzu yeɛ ɛkɔyɛ ye kesaalae kɔfa kosiesie wɔnwo ɔ?
-
Nzu yeɛ ɔkɔboka wɔ maa ekonya akokoduro kɔfa kɔsõ Yehowa, ɔmva yenwo ne ɛpɔen biala bɔ ekoyia ɔ?
NEA ƐHE KOSO
Nea abrandeɛ bie bɔ okyirekyire kyɛbɔ Yehowa bokale ye maa ɔhora gyinane ɛpɔen noa wɔ prisaen, ɔnate kyɛ waangyina bue biala sĩ nati.
Nea bɔ ɔbokale agyaafoɛ bie maa bɛfale nahorɛlilɛ bɛsõne Yehowa afoɛ pẽe, ɔmva yenwo ne ɛpɔen biala bɔ beyiale ne.
Nea kyɛbɔ ekonya akokoduro kɔfa kogyina ɛpɔen noa ɔ.
“Siesie Wɔnwo Kesaalae Ma Ɛpɔen” (The Watchtower, July 2019)
Sɛɛ yeɛ odikyɛ yebu ɛpɔen bɔ y’abusuafoɛ faba yɛ so ne ɔ, na yɛkɔyɛ sɛɛ na yagyina ɔhaw bɔ yekoyia ne noa ɔ?
“Nahorɛ Ne, ‘Ɔmva Asomdwee Mma, Na Mmom Dadeɛ” (The Watchtower, October 2017)
