YE TI MANDA 59
Tongana a sara ye ti ngangu na mo, mo peut ti gbu ngangu
Lawa lawa, aChrétien kue ayeke tingbi na kangango lege wala a yeke sara même ye ti ngangu na ala. Tënë so adoit ti mû mbeto na e?
1. Ngbanga ti nyen la e yeke ku ti tene a sara ye ti ngangu na e?
Bible atene polele, atene: “Azo kue so aye ti voro Nzapa na bê ti ala kue na yâ ti gigi ti ala na dutingo beoko na Christ Jésus, a yeke sara ande aye ti ngangu na ala nga.” (2 Timothée 3:12). A sara lani ye ti ngangu na Jésus ndali ti so lo yeke ti dunia ti Satan ape. E nga kue, e yeke ti dunia so ape; tongaso li ti e akpe ape tongana agouvernement nga na abungbi ti vorongo nzapa ti dunia so asara ye ti ngangu na e.—Jean 15:18, 19.
2. Tongana nyen la e peut ti leke terê ti e kozo ti tene a sara ye ti ngangu na e?
A lingbi e sara confiance mingi na Jéhovah laso. Mû ngoi lâ oko oko ti sambela lo nga ti diko Bible. Gue na abungbi lakue. Aye so ayeke mû na mo ngangu so mo bezoin ni ti gbu ngangu sân mbeto tongana a kanga lege na mo, même tongana a yeke azo ti sewa ti mo. Bazengele Paul, so fani mingi a sara ye ti ngangu na lo, atene: “Jéhovah ayeke zo ti mungo maboko na mbi; mbeto ayeke sara ande mbi pëpe.”—aHébreu 13:6.
Tongana e fa tënë lakue ayeke mû nga maboko na e ti sara ye na mbeto ape ahon ti kozo. Tongana e yeke fa tënë, e yeke manda ti sara confiance na Jéhovah nga ti sara mbeto ti zo ape (aProverbe 29:25). Tongana mo gi ti fa tënë sân mbeto laso, mo yeke leke terê ti mo nzoni ti ngbâ ti fa tënë même tongana gouvernement akanga lege na kua ti e.—1 aThessalonicien 2:2.
3. Tongana e gbu ngangu na ngoi so a sara ye ti ngangu na e, e yeke bâ nzoni dä tongana nyen?
Ti tâ tënë ni, a nzere na e ape ti tene a sara ye ti ngangu na e, me tongana e gbu ngangu dä, mabe ti e ayeke kpengba mingi. E yeke ga nduru mingi na Jéhovah ndali ti so lo mû maboko na e na ngoi so e bâ so e yeke na ngangu encore ape. (Diko Jacques 1:2-4.) Jéhovah ayeke na vundu tongana e bâ pasi, me lo yeke na ngia tongana e gbu ngangu. Bible atene: “Tongana ala yeke sara ye ti nzoni si ala bâ pasi na ala gbu ngangu dä, so ayeke mbeni ye so azia ngia na bê ti Nzapa.” (1 Pierre 2:20). Futa so Jéhovah ayeke mû na azo kue so agbu ngangu ayeke fini ti lakue lakue na yâ ti fini dunia so na yâ ni zo oko ayeke kanga lege na tâ vorongo Nzapa ape.—Matthieu 24:13.
GI TI HINGA AYE MINGI
Gi ti hinga ndani so lege ayeke dä ti tene mo duti be-ta-zo na Jéhovah même tongana a sara ye ti ngangu na mo nga tongana nyen la lo yeke futa mo.
4. Mo peut ti gbu ngangu na yâ ti kangango lege ti azo ti sewa ti mo
Jésus ahinga lani so peut-être azo ti sewa ti e ayeke yeda pëpe ti tene e voro Jéhovah. Diko Matthieu 10:34-36, na pekoni kiri tënë na hunda so:
-
Nyen la apeut ti si tongana membre ti mbeni sewa amû desizion ti sara na Jéhovah?
Ti bâ mbeni tapande ti ye so ayeke si, zia VIDÉO ni, na pekoni kiri tënë na hunda so:
-
Nyen la mo yeke sara tongana mbeni fami wala mbeni kamarade ti mo agi ti découragé mo ti sara na Jéhovah?
Diko Psaume 27:10 nga na Marc 10:29, 30. Na peko ti so mo diko aversê so awe, kiri tënë na hunda so alingbi na versê oko oko:
-
Tongana mbeni fami wala mbeni kamarade ti mo agi ti kanga lege na mo ti sara na Jéhovah, zendo so apeut ti aidé mo tongana nyen?
5. Ngbâ ti voro Jéhovah atâa a sara ye ti ngangu na mo
A hunda ti tene e sara ye na mbeto ape si e ngbâ ti sara na Jéhovah na ngoi so ambeni zo agi ti kanga lege na e ti sara ni. Zia VIDÉO ni, na pekoni kiri tënë na hunda so:
-
Tongana nyen la atapande ti yâ ti vidéo so akpengba mo?
Diko Kusala 5:27-29 nga na aHébreu 10:24, 25. Na peko ti so mo diko aversê so awe, kiri tënë na hunda so alingbi na versê oko oko:
-
Ngbanga ti nyen la a yeke kota ye mingi ti ngbâ ti voro Jéhovah même tongana gouvernement ahunda na e ti fa tënë ape wala ti sara abungbi ape?
6. Jéhovah ayeke aidé mo ti gbu ngangu
A-Témoin ti Jéhovah na yâ ti dunia kue, amaseka nga na ambakoro, angbâ ti sara na Jéhovah be-ta-zo atâa so a sara ye ti ngangu na ala. Ti hinga ye so a-aidé ala, zia VIDÉO ni. Na pekoni kiri tënë na hunda so:
-
Na yâ ti vidéo so, nyen la a-aidé aTémoin ni ti gbu ngangu?
Diko aRomain 8:35, 37-39 nga na aPhilippien 4:13. Na peko ti so mo diko aversê so awe, kiri tënë na hunda so alingbi na versê oko oko:
-
Tongana nyen la aversê so asara si mo hinga biani so mo peut ti gbu ngangu na yâ ti atara kue?
Diko Matthieu 5:10-12, na pekoni kiri tënë na hunda so:
-
Ngbanga ti nyen la mo peut ti duti na ngia atâa a sara ye ti ngangu na mo?
Awakua ti Jéhovah kutu mingi angbâ ti sara na lo be-ta-zo atâa so a kanga lege na ala. Mo kue mo peut ti ngbâ be-ta-zo.
AMBENI ZO ATENE: “Tongana a sara ye ti ngangu na mbi, mbi peut ti gbu ngangu ape.”
-
Aversê wa la apeut ti sara si ala duti na confiance so ala peut ti gbu ngangu?
NA NDURU TËNË
Jéhovah abâ na nene ni a-effort so e sara ti sara na lo atâa a sara ye ti ngangu na e. Grâce na mungo maboko ti lo, e peut ti gbu ngangu.
Dango bê
-
Ngbanga ti nyen la a yeke nzoni aChrétien aku ti tene a sara ye ti ngangu na ala?
-
Nyen la mo peut ti sara laso tongaso si mo leke terê ti mo ndali ti ngoi so a yeke sara ande ye ti ngangu na mo?
-
Nyen la apeut ti aidé mo ti duti na confiance so mo peut ti sara na Jéhovah atâa atara kue so mo yeke wara?
GI NDA TI YE
Bâ mbeni ita-koli so ade maseka so afa tongana nyen la Jéhovah a-aidé lo ti gbu ngangu na ngoi so a kanga lo ndali ti so lo ke ti sara kua ti turugu.
Bâ ye so a-aidé mbeni couple ti sara na Jéhovah be-ta-zo ngu mingi atâa so a kanga lege na ala.
Gi ti hinga tongana nyen la mo peut ti sara ye na mbeto ape na ngoi so a sara ye ti ngangu na mo.
Tongana azo ti sewa ti e akanga lege na e, a yeke nzoni e bâ ni tongana nyen? Tongana nyen la e peut ti ngbâ ti duti na siriri na ala nga ti ngbâ be-ta-zo na Jéhovah?
“Tâ tënë ayeke ga na ‘siriri pëpe,’ me na ‘épée’” (Tour ti Ba Ndo ti octobre 2017)
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
