LESONA 59
E Mafai Ona E Tumau e Ui i Sauāga
Ua toeitiiti ona fesagaʻia lea e Kerisiano uma teteega, pe oo lava ina sauāina. Pe e tatau ona faapopoleina ai i tatou?
1. Aiseā e tatou te faatalitalia ai sauāga?
Ua taʻua manino i le Tusi Paia: “E sauāina i latou uma e naunau e ola ma le faamaoni i le Atua ma aufaatasi ma Keriso Iesu.” (2 Timoteo 3:12) Na sauāina Iesu ona e leʻi avea o ia ma vaega o le lalolagi a Satani. E lē o i tatou foʻi o se vaega o lenei lalolagi. O lea, e lē o se mea e faateʻia ai pe a sauāina i tatou e faigāmalo ma faalapotopotoga faalelotu.—Ioane 15:18, 19.
2. E faapefea ona tatou sauniuni mo sauāga?
E tatau ona faamalosia lo tatou maufaatuatuaina o Ieova i le taimi lenei. Ia faaavanoa se taimi e tatalo atu ai iā te ia ma faitau se vaega o lana Afioga i aso taʻitasi. Ia auai e lē aunoa i sauniga. O le faia faapea o le a e maua ai le malosi e manaʻomia e fesagaʻia ai ma le lototele so o se sauāga, e tusa lava po o ni sauāga mai i lou lava aiga. Na tusi le aposetolo o Paulo o lē na masani ona sauāina: “O Ieova o loʻu fesoasoani ia; ou te lē fefe lava.”—Eperu 13:6.
O le faia foʻi e lē aunoa o so tatou sao i le talaʻiga, e mafai ona atiaʻe ai le lototele. E fesoasoani le talaʻiga iā i tatou ina ia maufaatuatuaina Ieova, ma foʻia le fefe i tagata. (Faataoto 29:25) Pe a e atiaʻe le lototele e talaʻi i le taimi lenei, o le a e nofosauni ai e talaʻi atu pea, e tusa pe faasā e faigāmalo la tatou galuega.—1 Tesalonia 2:2.
3. O ā aogā o lo tatou tumau e ui i sauāga?
O le mea moni, o sauāga e lē o se mea e olioli ai, ae o le tumau e ui i sauāga e faamalosia ai lo tatou faatuatua. E tatou te vavalalata atu ai iā Ieova, ona ua tatou tofo i lana fesoasoani pe a tatou lagona le vaivai. (Faitau le Iakopo 1:2-4.) E tigā faalogona o Ieova pe a tatou mafatia, ae faafiafiaina o ia pe a silasila mai o loo tatou tumau. Ua faapea mai le Tusi Paia: “Ae afai ua outou tutumau i puapuaga ona o le faia o mea lelei, o le mea lea e fiafia ai le Atua.” (1 Peteru 2:20) Pe a tatou tutumau faamaoni, o le a tauia i tatou e Ieova i le ola e faavavau i le lalolagi fou. O le a tapuaʻi atu tagata uma iā Ieova i lenā taimi, ma o le a lē toe iai ni tagata tetee.—Mataio 24:13.
SAʻILIʻILI ATILI
Iloilo le māfuaaga e mafai ai pea ona tatou tumau faamaoni iā Ieova e ui i sauāga, ma le auala o le a ia tauia ai i tatou.
4. E mafai ona e tumau e ui i sauāga mai i aiga
Na silafia lelei e Iesu e iai nisi o o tatou aiga e ono lē mananaʻo e tatou te auauna iā Ieova. Faitau le Mataio 10:34-36, ona talanoa lea i le fesili lenei:
-
O le ā e ono tupu pe a filifili se tasi o le aiga e auauna iā Ieova?
Mo se faataʻitaʻiga, faaali le VITIŌ. Pe a uma, ona talanoa lea i le fesili o loo mulimuli mai.
-
O le ā e te faia pe a taumafai se isi o lou aiga po o sau uō e taofia oe mai i le auauna iā Ieova?
Faitau le Salamo 27:10 ma le Mareko 10:29, 30. Ia faitau mau taʻitasi, ma talanoa i le fesili lenei:
-
E ono faapefea ona fesoasoani lenei folafolaga iā te oe pe a fesagaʻia teteega mai i ou tauaiga po o au uō?
5. Auauna pea iā Ieova e ui i sauāga
E manaʻomia le lototele ina ia auauna ai pea iā Ieova pe a taumafai isi e taofia i tatou. Faaali le VITIŌ, ona talanoa lea i le fesili o loo mulimuli mai.
-
E faapefea i faaaʻoaʻoga o loo i lenei vitiō ona e maua ai le lototele?
Faitau le Galuega 5:27-29 ma le Eperu 10:24, 25. Ia faitau mau taʻitasi, ma talanoa i le fesili lenei:
-
Aiseā e tāua ai le tapuaʻi atu pea iā Ieova, e tusa pe faasā la tatou galuega talaʻi po o sauniga?
6. O le a fesoasoani Ieova iā te oe ina ia e tumau
O loo faaauau pea ona tumau faamaoni Molimau a Ieova e ui i sauāga, e tusa po o le ā lo latou matutua ma talaaga. O le ā na fesoasoani iā i latou ina ia tumau ai? Faaali le VITIŌ, ona talanoa lea i le fesili lenei:
-
I le vitiō, o le ā na fesoasoani i nei Molimau ina ia tumau ai?
Faitau le Roma 8:35, 37-39 ma le Filipi 4:13. Ia faitau mau taʻitasi, ma talanoa i le fesili lenei:
-
E faapefea ona faamautinoa mai i lenei mau e mafai ona e tumau i so o se tofotofoga?
Faitau le Mataio 5:10-12, ona talanoa lea i le fesili lenei:
-
Aiseā e mafai ai ona e maua pea le fiafia e tusa pe sauāina oe?
O loo tumau faamaoni pea le faitau miliona o tagata tapuaʻi o Ieova e ui i teteega. E mafai foʻi ona e tumau!
UA FAAPEA MAI NISI: “E lē mafai ona ou onosaia sauāga.”
-
O ā mau e mafai ona e faamautinoa atu ai e mafai ona ia onosaia sauāga?
AOTELEGA
E tautele iā Ieova a tatou taumafaiga ina ia auauna iā te ia e ui i sauāga. O lana fesoasoani e mafai ona tatou tumau ai!
Fesili Autalu
-
Aiseā e tatau ai ona faatalitalia e Kerisiano sauāga?
-
O le ā e mafai ona e faia i le taimi lenei ina ia e nofosauni ai pe a oo mai sauāga?
-
O le ā e fesoasoani ina ia e mautinoa ai, e mafai ona e auauna iā Ieova e ui i tofotofoga?
MANATU FAAOPOOPO
Mātau le faamatalaga a se uso talavou i le auala na fesoasoani ai Ieova iā te ia, a o faafalepuipui ona o lona solitū.
Iloilo po o le ā na fesoasoani i se ulugalii e auauna faamaoni ai iā Ieova mo le tele o tausaga e ui i teteega.
E faapefea ona e fesagaʻia ma le lototele sauāga?
“Ia Sauniuni Nei Loa mo Sauāga” (Le Olomatamata, Iulai 2019)
O le ā la tatou vaaiga i teteega mai i aiga, ma e faapefea ona tatou tausia le filemu ma tumau faamaoni pea iā Ieova?
“E Lē Aumaia e le Upu Moni ʻle Filemu a o le Pelu’” (Le Olomatamata, Oketopa 2017)
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
