LES 59
Yu kan horidoro awinsi sma e frufolgu yu
Ala Kresten kan fruwakti taki sma o wani tapu den fu dini Yehovah. Kande sma o frufolgu den srefi. A sani disi musu meki taki wi frede?
1. Fu san ede wi e fruwakti taki sma o frufolgu wi?
Bijbel e taki: „Sma o frufolgu ala den wan di wani dini Gado fayafaya leki bakaman fu Krestes Yesus” (2 Timoteyus 3:12). Den ben frufolgu Yesus fu di a no ben de wan pisi fu a grontapu fu Satan. Wi srefi no de wan pisi fu a grontapu disi tu. Dati meki wi no e skreki te den tiriman nanga den kerki e frufolgu wi.—Yohanes 15:18, 19.
2. Fa wi kan sreka wisrefi gi frufolgu?
Nownow kaba wi musu du sani di o yepi wi fu frutrow Yehovah moro. Ala dei wi musu meki ten fu begi èn fu leisi Bijbel. Wi musu go na den konmakandra tu. Den sani disi o yepi yu fu horidoro te sma e frufolgu yu, awinsi na yu famiri srefi. Sma ben frufolgu na apostel Paulus furu leisi. Ma luku san a taki: „Yehovah na mi yepiman. Mi no o frede.”—Hebrewsma 13:6.
Te wi e preiki, dan dati e yepi wi tu fu abi deki-ati. A e yepi wi fu frutrow tapu Yehovah èn fu no frede libisma (Odo 29:25). Efu now yu abi a deki-ati fu preiki, dan awinsi lanti tapu a wroko fu wi, toku yu o tan preiki.—1 Tesalonikasma 2:2.
3. Sortu wini wi o kisi te wi e horidoro te sma e frufolgu wi?
Wi no lobi en te sma e frufolgu wi. Ma te wi e horidoro, dan wi bribi e kon moro tranga. Wi e tron moro bun mati fu Yehovah tu fu di wi e si fa a e gi wi a krakti te wi e firi leki wi no man moro. (Leisi Yakobus 1:2-4.) A e hati Yehovah fu si taki wi e pina, ma a breiti te a e si taki wi no e gi abra. Bijbel e taki: „Efu unu e horidoro te unu e nyan pina, fu di unu e du bun, dan dati e plisi Gado” (1 Petrus 2:20). Te wi e horidoro, dan Yehovah o gi wi têgo libi na ini wan nyun grontapu. Na a ten dati nowan sma o gens wi moro.—Mateyus 24:13.
SORTU TRA SANI YU KAN LERI?
Wi o si fu san ede wi man horidoro te sma e frufolgu wi èn wi o si tu fa Yehovah o blesi wi.
4. Yu kan horidoro te yu famiri e gens yu
Yesus ben sabi taki son famiriman fu wi no ben o wani taki wi dini Yehovah. Leisi Mateyus 10:34-36 èn taki fu na aksi disi:
-
Te wan sma e bosroiti fu dini Yehovah, dan san den famiriman fu en kan taki noso du?
Efu yu wani si wan eksempre fu disi, dan prei a FELEM. Baka dati taki fu na aksi disi:
-
San yu ben o du efu wan famiri noso wan mati e pruberi fu tapu yu fu dini Yehovah?
Leisi Psalm 27:10 nanga Markus 10:29, 30. Baka te yu leisi ibri tekst, dan taki fu na aksi disi:
-
Fa a pramisi disi kan yepi yu te famiri noso mati wani tapu yu fu dini Yehovah?
5. Tan dini Yehovah awinsi sma e frufolgu yu
Wi abi deki-ati fanowdu fu dini Yehovah te trawan wani tapu wi fu du dati. Prei a FELEM èn taki fu na aksi disi:
-
Fa den sma na ini a felem e gi yu deki-ati?
Leisi Tori fu den apostel 5:27-29 nanga Hebrewsma 10:24, 25. Baka te yu leisi ibri tekst, dan taki fu na aksi disi:
-
Fu san ede a prenspari fu tan preiki èn fu tan go na den konmakandra awinsi lanti tapu a wroko fu wi?
6. Yehovah o yepi yu fu horidoro
Yehovah Kotoigi na heri grontapu, yonguwan nanga owruwan, tan dini Yehovah awinsi sma ben frufolgu den. Prei a FELEM fu si san yepi den. Baka dati taki fu na aksi disi:
-
San yepi den Kotoigi na ini a felem fu horidoro?
Leisi Romesma 8:35, 37-39 nanga Filipisma 4:13. Baka te yu leisi ibri tekst, dan taki fu na aksi disi:
-
Fa a tekst disi e sori taki yu kan horidoro awinsi sortu tesi yu e kisi?
Leisi Mateyus 5:10-12 èn taki fu na aksi disi:
-
Fu san ede yu kan de koloku awinsi sma e frufolgu yu?
SON SMA E TAKI: „Efu mi kisi frufolgu, mi no o man horidoro.”
-
Sortu Bijbeltekst kan gi en deki-ati?
SAN YU LERI?
Yehovah breiti te wi e tan dini en awinsi sma e frufolgu wi. A kan yepi wi fu horidoro!
Fa yu ben o piki den aksi disi?
-
Fu san ede Kresten kan fruwakti taki sma o frufolgu den?
-
San yu kan du nownow kaba fu sreka yusrefi gi frufolgu?
-
Fu san ede yu kan de seiker taki yu o man tan dini Yehovah awinsi yu e kisi tesi?
TRA SANI DI YU KAN LUKU
Na ini a felem disi wan yongu brada e fruteri fa Yehovah yepi en di sma sroto en fu di a no ben wani go na ini a legre.
Na ini a felem disi yu o si san yepi wan trowpaar fu tan dini Yehovah aladi lanti ben tapu a wroko fu wi furu yari langa.
Na ini na artikel disi yu o si san o yepi yu fu abi deki-ati te sma e frufolgu yu.
Fu san ede wi kan fruwakti taki famiri o gens wi te wi wani dini Yehovah èn san kan yepi wi fu horidoro?
„A tru anbegi no e tyari freide kon, ma a e tyari wan feti-owru” (A Waktitoren, oktober 2017)