WEKELO 59
Wɛ koka mbikikɛ ɛhɛnyɔhɛnyɔ
Oyadi nshi nyɛ kana lo nshi yayaye, Akristo tshɛ wayohomana l’ɔlɔshamelo ndo kaanga l’ɛhɛnyɔhɛnyɔ. Onde dui sɔ pombaka totsha wɔma?
1. Lande na kahombaso nongamɛ ɛhɛnyɔhɛnyɔ?
Bible mbutaka hwe ɔnɛ: “Wanɛ tshɛ wakombola nsɛna la omamemelo le Nzambi kaamɛ la Kristo Yeso, vɔ lawɔ wayɔhɛnyahɛnyama.” (2 Timɔte 3:12) Yeso akahɛnyahɛnyama nɛ dia nde komonga onto la l’andja ɔnɛ waki Satana. Sho lawɔ keema anto wa l’andja ɔnɛ, diakɔ diele sho hatambe etena katɔhɛnyahɛnya mandji ya l’andja ɔnɛ ndo atshunda w’ɛtɛmwɛlɔ.—Joani 15:18, 19.
2. Ngande wakokaso ndjalɔngɔsɔla lo dikambo di’ɛhɛnyɔhɛnyɔ?
Tekɔ l’ohomba wa nkeketsha wɛkamu aso le Jehowa oma ko kakianɛ. Lushi tshɛ, ɔsaka etena ka mbɔɔlɔmbaka ndo ka mbadiaka etenyi kɛmɔtshi k’Ɔtɛkɛta ande. Ɔtɔka lo nsanganya mbala la mbala. Akambo asɔ wayokosha wolo weyɛ l’ohomba dia mbikikɛ ɛhɛnyɔhɛnyɔ tshɛ la dihonga, oyadi vɔ ndja oma le ase nkumbo. Ɔpɔstɔlɔ Pɔɔlɔ, lakahɛnyahɛnyama mbala efula, akafunde ate: “Jehowa kele okimanyedi ami, dimi hantoka wɔma.”—Hɛbɛru 13:6.
Sho kokaka nto nkeketsha dihonga diaso lo sambishaka mbala la mbala. Esambishelo tetshaka woho wa ndjaɛkɛ le Jehowa ndo dia minya wɔma w’onto. (Tokedi 29:25) Naka wɛ monga la dihonga dia nsambisha nshi nyɛ, kete wɛ ayoyalɔngɔsɔla dimɛna dia ndjotetemala nsambisha kaanga etena kayoshimba lɛɛta olimu aso.—1 Tɛsalɔnika 2:2.
3. Wahɔ akɔna wakondjaso lo mbikikɛ ɛhɛnyɔhɛnyɔ?
Lo mɛtɛ, sho hatɔngɛnangɛna pɛnyahɛnyama, koko etena kakikɛso ɛhɛnyɔhɛnyɔ dimɛna, mbetawɔ kaso keketshamaka efula. Sho ndekaka ndjasukanya la Jehowa nɛ dia sho mɛnaka woho watokimanyiyande kaanga etena kokaso dia hatoyokoka mbikikɛ. (Adia Jakɔba 1:2-4.) Jehowa nyangaka etena katɛnande tasowa, koko nde ngɛnangɛnaka etena kɛnande takikɛ. Bible mbutaka ɔnɛ: “Naka nyu mbikikɛ asui l’ɔtɛ wakanyasale ɔlɔlɔ, ɔsɔ ekɔ dikambo di’ɔlɔlɔ le Nzambi.” (1 Petero 2:20) Difuto diayosha Jehowa wanɛ tshɛ wakikɛ la kɔlamelo ele lɔsɛnɔ la pondjo l’andja wele ɔtɛmwɛlɔ wa mɛtɛ hawotɔlɔshama nto.—Mateo 24:13.
NYOMOTSHIMOLA
Vusola lande na kele ntshikala la kɔlamelo le Jehowa ekɔ dui diakokaso nsala ndo diele la difuto.
4. Wɛ koka mbikikɛ ɔlɔshamelo w’oma le ase nkumbo
Yeso akeyaka dia mbala mɔtshi ase nkumbo kaso hawotosukɛ yɛdikɔ yaso ya ntɛmɔla Jehowa. Nyadia Mateo 10:34-36, ndo oma laasɔ, nyɔkɛtshanya dimbola nɛ:
-
Kakɔna kakoka ntomba etena kɔsa ose nkumbo ɔmɔtshi yɛdikɔ ya kambɛ Jehowa?
Dia mɛna ɛnyɛlɔ kɛmɔtshi ka dui sɔ, nyende VIDƐO, ndo oma laasɔ, nyɔkɛtshanya dimbola diayela nɛ:
-
Kakɔna kayoyosala naka owotɔ kana ɔngɛnyi ayɛ ɔmɔtshi ohemba kɔtɛwɔla dia wɛ ntshika kambɛ Jehowa?
Nyadia Osambo 27:10 ndo Makɔ 10:29, 30. L’ɔkɔngɔ wa mbadia divɛsa tshɛ, nyɔkɛtshanya dimbola nɛ:
-
Ngande wakoka daka sɔ kokimanyiya naka wɛ ekɔ lo ndɔshama oma le ase nkumbo kana angɛnyi ayɛ?
5. Tetemala ntɛmɔla Jehowa kaanga l’atei w’ɔlɔshamelo
Nɔmbamaka monga la dihonga dia kambɛ Jehowa etena kasala anto akina la wolo dia totshimba dia sho nsala dikambo sɔ. Nyende VIDƐO, ndo oma laasɔ, nyɔkɛtshanya dimbola diayela nɛ:
-
Ngande wambokosha bɛnyɛlɔ dia lo vidɛo nyɛ dihonga?
Nyadia Etsha 5:27-29 ndo Hɛbɛru 10:24, 25. L’ɔkɔngɔ wa mbadia divɛsa tshɛ, nyɔkɛtshanya dimbola nɛ:
-
Lande na kele ekɔ ohomba ntetemala ntɛmɔla Jehowa kaanga etena kamboshimbama olimu aso w’esambishelo ndo wɔtwɛlɔ aso wa lo nsanganya?
6. Jehowa ayokokimanyiya dia mbikikɛ
Ɛmɛnyi wa Jehowa wele l’ɛnɔnyi ndo la nsɛnɔ yotshikitanyi wakatetemala kambɛ Jehowa la kɔlamelo kaanga etena kakawahɛnyahɛnyamaka. Dia mɛna kɛnɛ kakakimanyiya, nyende VIDƐO. Ndo oma laasɔ, nyɔkɛtshanya dimbola diayela nɛ:
-
Lo vidɛo yɛnyiso, kakɔna kakakimanyiya Ɛmɛnyi wa Jehowa engo dia mbikikɛ?
Nyadia Rɔmɔ 8:35, 37-39 ndo Filipɛ 4:13. L’ɔkɔngɔ wa mbadia divɛsa tshɛ, nyɔkɛtshanya dimbola nɛ:
-
Ngande wakoshikikɛ divɛsa nɛ dia wɛ kokaka mbikikɛ ohemba tshɛ?
Nyadia Mateo 5:10-12, ndo oma laasɔ, nyɔkɛtshanya dimbola nɛ:
-
Lande na kakokayɛ monga l’ɔngɛnɔngɛnɔ kaanga l’atei w’ɛhɛnyɔhɛnyɔ?
Miliyɔ y’atɛmɔdi wa Jehowa wakakikɛ ɔlɔshamelo lo yoho ya dimɛna efula. Wɛ lawɔ koka mbikikɛ!
ANTO AMƆTSHI MBUTAKA ƆNƐ: “Dimi hakoke mbikikɛ ɛhɛnyɔhɛnyɔ.”
-
Avɛsa akɔna wakoka mbasha eshikikelo kewɔ la tɔ ohomba?
LO TSHENA PE
Jehowa mbɔsaka la nɛmɔ welo wadjaso dia mbookambɛ kaanga l’atei w’ɛhɛnyɔhɛnyɔ. La ekimanyielo kande, sho koka mbikikɛ l’ɔngɛnɔngɛnɔ tshɛ!
Ovuswelo
-
Lande na kahomba Akristo nongamɛ ɛhɛnyɔhɛnyɔ?
-
Kakɔna kakokayɛ nsala kakianɛ kayoyokokimanyiya dia monga suke dia mbikikɛ ɛhɛnyɔhɛnyɔ wayohomana la yɛ?
-
Kakɔna kayokokimanyiya dia monga l’eshikikelo dia wɛ koka kambɛ Jehowa oyadi ohemba akɔna tshɛ?
SALA EYANGELO
Enda woho walembetshiya ɔnangɛso ɔmɔtshi l’ɔlɔngɔlɔngɔ woho wakokimanyiya Jehowa dia mbikikɛ etena kakandadjama lo lokanu l’ɔtɛ wa lomangemange lande.
Enda kɛnɛ kakakimanyiya atshukanyi amɔtshi dia kambɛ Jehowa la kɔlamelo tshɛ l’edja k’ɛnɔnyi efula kaanga l’atei w’ɔlɔshamelo.
Eka woho wa ndɔshana l’ɛhɛnyɔhɛnyɔ la dihonga tshɛ.
“Yalɔngɔsɔla oma ko kakianɛ dikambo di’ɛhɛnyɔhɛnyɔ” (Tshoto y’Etangelo, Ngɔndɔ k’esambele 2019)
Ngande wahombaso mbɔsa ɔlɔshamelo w’oma le nkumbo, ndo ngande wakokaso ndɔshana dimɛna l’ekakatanu watela dui sɔ?
“Akambo wa mɛtɛ hela wɔladi, koko ‘lokuwa la ta’” (Tshoto y’Etangelo, Ngɔndɔ ka dikumi 2017)
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
